كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ تمد ەلدەرىمەن تانىسۋ اياسىندا قازاقستانعا كەلگەن جاپونيا پارلامەنتى وكىلدەر پالاتاسى (تومەنگى پالاتا) حالىقارالىق ىستەر جونىندەگى كوميتەتىنىڭ توراعاسى مۋنەە سۋدزۋكيمەن كەزدەسۋى بولدى, دەپ حابارلادى قر ءسىم-ءىنىڭ ءباسپاسوز قىزمەتى.
كەزدەسۋ بارىسىندا تاراپتار ەكىجاقتى ىنتىماقتاستىقتىڭ اعىمداعى جاعدايى مەن بولاشاعىن, ەكى ەلدىڭ حالىقارالىق ءبىرلەستىكتەر شەڭبەرىندەگى ىقپالداستىعىن, سونىمەن قاتار, قازىرگى زامانعى حالىقارالىق قاتىناستاردى, سونىڭ ىشىندە ورتالىق ازياداعى جاعدايدى, قورشاعان ورتانى قورعاۋ ماسەلەلەرىن تالقىعا سالدى.
وسى ورايدا ق.ساۋداباەۆ جاقىندا بولعان جاپونيا سىرتقى ىستەر ءمينيسترى كاتسۋيا وكادانىڭ قازاقستانعا رەسمي ساپارىن جانە “ورتالىق ازيا+جاپونيا ۇنقاتىسۋى” كەزدەسۋىن جوعارى باعالادى.
قاۋىپسىز الەم عالامدىق ءماسەلەسىن كوتەرە وتىرىپ, تاراپتار يادرولىق قارۋسىزدانۋ جانە بەيبىت اتومدى دامىتۋ سالالارىندا ءوزارا ىقپالداسۋ جونىندە پىكىر الماستى. وسىعان وراي قازاقستاندىق ءسىم باسشىسى قايعىلى كەزەڭدى ەسكە الدى – وسىدان 65 جىل بۇرىن حيروسيما جانە ناگاساكيگە يادرولىق بومبا تاستالعان بولاتىن. مەملەكەتتىك حاتشى 40 جىلعا سوزىلعان سەمەي پوليگونىنداعى يادرولىق سىناقتاردان ميلليونداعان وتانداستارىمىز جاپا شەككەندىگىن اتاپ ءوتتى. ءوز كەزەگىندە جاپوندىق پارلامەنت مۇشەسى ءبىزدىڭ ەلىمىزدىڭ جاھاندىق قاۋىپسىزدىكتى نىعايتۋعا قوسىپ وتىرعان ۇلەسى اۋقىمدى ەكەنىن ايتىپ كەتتى. تاراپتار يادرولىق قارۋدان ادا الەم قۇرۋ ماقساتىندا ەكى ەل كۇشتەرىن بىرىكتىرۋ قاجەتتىگىنە توقتالدى.
حالىقارالىق ۇيىمدار فورماتىنداعى ىنتىماقتاستىقتى ايتا كەلە ق.ساۋداباەۆ جاپونيانىڭ بۇۇ-نى رەفورمالاۋ ءجونىندەگى ۇسىنىسىنا جانە كۇنشىعىس ەلىنىڭ بۇۇ قاۋىپسىزدىك كەڭەسىنىڭ تۇراقتى مۇشەلىگىنە ەنۋىنە قازاقستاننىڭ قولداۋ بىلدىرەتىنىن جەتكىزدى.
ساۋدا-ەكونوميكا سالاسىنداعى ىنتىماقتاستىقتى قوزعاي وتىرىپ, تاراپتار قازىرگى ءوزارا تاۋار اينالىم كورسەتكىشى شىن مانىندەگى مۇمكىندىكتەرگە ساي ەمەستىگىن قۋاتتادى. ولاردىڭ ءپىكىرىنشە, وسى جىلدىڭ كۇزىندە جاپونيادا وتەدى دەپ جوسپارلانىپ وتىرعان ۇكىمەتتىك جانە جەكە سەكتوردىڭ بىرلەسكەن كوميسسيا وتىرىسى اتالعان كورسەتكىشتى جاقسارتۋعا سەپتەسەتىن بولادى.