وڭتۇستىكتە وبلىس اكىمى اسقار مىرزاحمەتوۆ اۋدان, قالا اكىمدەرىنىڭ التى ايعى جۇمىس قورىتىندىسى بويىنشا ەمتيحان الىپ جاتىر.
بۇرىنعى اكىمدەر دە الاتىن. بىراق, كوپ الدىندا ەمەس. كوبىنە كابينەتىنە شاقىرادى. جەتىستىكتەر مەن كەمشىلىكتەر سارالاناتىن. الداعى دامۋ جوسپارلارى بەلگىلەنەتىن. مىقتىسىنىڭ ارقاسىنان قاعىپ, “بولتى بوساعانىنىڭ” شاڭىن قاعىپ الاتىن. اركىمنىڭ باسقارۋ ءستيلى ءار باسقا. ءبىر ەسەپتەن, كوپشىلىكتى قاتىستىرا وتىرىپ, تەرگەي جاۋاپ الۋ قيسىندى دا شىعار. بىراق, ول قانشالىقتى ادىلەتتى؟ اكىمدەردىڭ جۇمىسىن باعالايتىن رەيتينگ جۇيەسىنىڭ كۇنگە قاراپ وسەتىن كۇنباعىس سياقتى ءامىرشىسىنىڭ ىرقىنا باعىناتىنىن جۇرت ءبىلىپ تە بولدى. ءوزىمىز دە كورگەنبىز. ءبىر اكىمنىڭ كەزىندە كوش سوڭىندا جۇرەتىن قالا اكىمى وزىمەن دوس-جار وبلىس باسشىسىنىڭ كەزىندە اي ارالاتپاي كوش باسىنا شىعىپ كەتكەن.
ايتپەسە, ەكى جىل ىستەگەن اكىمنىڭ جۇمىسىنان ەكشەپ ۇستار ەكى وڭدى ءىس تاپپاي, ەكى اي اكىم بولعان ازاماتتىڭ اسىعى الشىسىنان تۇرعانداي باعالانۋى كوڭىلگە ءتۇرلى وي تۋعىزادى ەكەن.
اڭگىمەنى نەگە بىلاي باستادىق. سەبەبى بار. حالىقتى قارا توبىر, الدىنا سالىپ ايداساڭ ارتىنا قارايلامايتىن, القىمىنا پىشاق تاقاساڭ كوزى باقىرايىپ جاتا بەرەتىن قوي سەكىلدى كورەتىندەر قاتتى قاتەلەسەدى. حالىقتان ۇلكەن سىنشى جوق. جۋىردا ءبىر اقساقال رەداكتسيا قوسىنىنا تەلەفون شالدى.
– وبلىس باسشىسى اسقار بالامىزعا راحمەت. كوپ تىرلىكتىڭ باسىن قايىردى. شىمكەنتتىڭ اجارىن كىرگىزدى. بىراق, سوڭعى كەزدەرى كادرلاردى استاۋداعى سۋدى ساپىرعانداي ابدەن اۋىستىردى عوي. وسىنىسى قانشالىقتى قيسىندى. كەيبىر ىسكەر جىگىتتەرگە قيانات بولىپ جاتقان جوق پا؟ قازاقستانداعى ەڭ ۇلكەن, بەدەلدى گازەت وكىلىسىزدەر, وسىعان تالداۋ جاساپ قويۋلارىڭىزعا بولادى عوي. وبلىستا نە بولىپ جاتىر ءوزى؟
اقساقال مازاسىزداناتىنداي, راس, كەيىنگى كەزدە كادرلار ءجيى اۋىسىپ كەتتى. سوڭعى ەكى-ءۇش جىلدا 15 اۋدان, قالا اكىمدەرىنىڭ 12-ءسى ات اۋىستىرىپ ءمىندى. وبلىستاعى باسقارمالاردىڭ بارلىعى دەرلىك, كەيبىرىندە ەكى-ۇشتەن باستىق اۋىستى. وسىنىڭ بارىنە وبلىس باسشىسى ىستەر شارۋاسى تاۋسىلىپ, زەرىككەنىنەن جاساپ وتىر دەۋگە اۋىز بارمايدى. جىگىتتەردىڭ قاي-قايسىنا دا ءوزىن كورسەتۋگە مۇمكىندىك بەرىلگەن.
وبلىس اكىمى بولىپ تاعايىندالعاننان كەيىن مىرزاحمەتوۆ ات ۇستىنەن تۇسپەي, اۋدان, قالاعا ءوزى باس بوپ, ورىنباسارلارىنا توپ قۇرىپ بەرىپ, وڭتۇستىكتەگى توعىز جۇزگە جۋىق اۋىلداردى قويماي ارالادى.
نەگىزىنەن پروبلەمالارىن, اتقارىلاتىن جۇمىستاردىڭ رەتىن تاۋىپ, ارقايسىسىنا جەكە كارتا اشىپ قويدى. مۇنىسى ەندى – ىسكەرلىك.
قاي وڭىردە قانداي شەشىلمەگەن پروبلەما بار دەپ امەريكا اشقانداي تاڭىرقاپ وتىرمايدى. كومپيۋتەردىڭ قاۋاشاعىنا قاراپ جىبەرىپ, شەتىنەن كەرتىپ الا بەرەدى. وسى كەزدە اۋىلداستارىنىڭ جاعدايىن جاقسى بىلمەيتىن, ات ءىزىن سالماعان, شارۋاسى قوجىراپ جۇرگەن اكىمدەرگە ەسكەرتۋ بەرىلگەن. كەيىن اۋدان, قالالاردىڭ دامۋ كورسەتكىشتەرى پارامەترلەر بويىنشا ەكشەلىپ, رەيتينگ تۇزىلگەندە جاسالماعان جۇمىستار قۇرت جەپ تەسكەن اۋرۋ تىستەي شىعا كەلدى. وسىنىڭ ءبارى ەسەپ بەرۋ مەرزىمىندە ەسكەرىلدى.
تاپ وسى جەردە جۇرت كوكەيىندە ءبىر تۇيتكىل قالىپ قويادى. كەنتاۋ قالاسىنىڭ بۇرىنعى اكىمى كوكتەمبەك تابىلديەۆ ونەركاسىپتى قالانى ورگە سۇيرەۋ ءۇشىن قۇلاعىنان ابدەن تارتقان ازاماتتاردىڭ ءبىرى ەدى. ءبىر جەردە جۇمىسى ءجۇردى, ءبىر كەزەڭىندە شاتقاياقتاتىپ الدى. شاماسى جەتپەگەن شىعار. بىراق, ك.تابىلديەۆ قىزمەتىنەن كەتكەندە, وتىرىك جاعىنۋ دەگەندى بىلمەيتىن كەنشى قالانىڭ تۇرعىندارى جۇمىسىن جاقسى باعالادى, تۇيتكىلدەردى شەشۋگە بار ىنتاسىمەن تالپىنعانىن ايتتى. ء“اي, كاپىر” دەگەن ەشقايسىسى جوق.
وبلىس اكىمى ونىڭ ورنىنا بۇعان دەيىن شىمكەنت قالاسى اكىمىنىڭ ورىنباسارى بولعان نۇرجىگىت قالمىرزاەۆتى اكەپ وتىرعىزدى. ىسكەر-اق جىگىت شىعار. بىراق, وسى قالمىرزاەۆتى جاۋاپ بەرەتىن سالاسىنا وراي وبلىس باسشىسى تالاي رەت شاڭىن قاعىپ العانى, ساۋساعىن بەزەپ, ەسكەرتۋ جاساعانىن حالىق ۇمىتقان جوق قوي.
بايدىبەك اۋدانىنىڭ اكىمى سادىق كەنجەباەۆ تا اۋداندى تىعىرىقتان شىعارۋ ءۇشىن قولىنان كەلگەنىن جاسادى. سۋبسيديامەن جانىن باعىپ وتىرعان اۋدان تىزگىنى ەندى كەشە عانا اۋدان اكىمىنىڭ اپپاراتىنىڭ جەتەكشىسى, اۋدان اكىمىنىڭ ورىنباسارى بولعان رايىمبەك جولداسوۆتىڭ قولىنا كوشتى. اۋدان, قالا اكىمدەرى ورىنباسارلارىنىڭ ىشىنەن اكىم بولعاندا سۋىرىلىپ شىققان, تۇركىستاندا جاقسى ءىزى قالعان, قازىر وتىراردا ەرەن ەڭبەكتەر جاساپ جاتقان ىسكەر اكىم بەيبىت سىزدىقوۆتاي ابىرويلى بولۋىن وسى قوس ازاماتقا تىلەر ەدىك.
اكىمدەردى مەيلىنشە اۋىستىرماي, ۇزاق ءارى جەمىستى جۇمىس جاساۋىنا مۇمكىندىك بەرگەن وبلىس باسشىلارىنان بەردىبەك ساپارباەۆتى اتاۋعا بولادى.
بەكەڭ ۇلكەن اۆتوبۋسقا اۋدان, قالا اكىمدەرىمەن قوسا باق وكىلدەرىن وتىرعىزىپ, جۇمىسى جاقسى ءجۇرىپ جاتقان اكىمدەردىڭ جۇمىس ءتاجىريبەسىمەن تانىستىراتىن. قۇرىلىس دەپارتامەنتىندە جۇرگەن جەرىنەن بولات جىلقىشيەۆتى سول كەزدە پروبلەماسى شاشەتەكتەن كەنتاۋ قالاسىنا اكىم ەتىپ تاعايىندادى. بولات ءاپجاپار ۇلى ءوندىرىستى قالانىڭ تىنىسىن اشتى, ينۆەستيتسيا تارتتى. قالانى قۇلدىراۋدان امان الىپ قالدى. كەيىن ونى شىمكەنت قالاسىنا الىپ كەلدى. وبلىس اكىمدىگىنە مۇراگەر دەپ تانىدى.
يسلام ابىشەۆ ورداباسى اۋدانىنىڭ تىزگىنىن ۇستاعان ەدى. اۋلالارعا سۋبۇرقاق ورناتىپ, كوشەگە گۇل ەگۋدى باستاعان وسى ازامات. اۋداندا تۇرسا دا قازاق مال ۇستاماي تۇرا الاتىن با ەدى. كوشەتىن ەشكى كەمىرىپ, گ ۇلىن ج ۇلىپ جەپ كەتىپ جۇرسە دە وسى يسلام گۇل ەگۋىن قويمادى. نە ەشكى يەسى ۇيالدى, نە ەشكىنىڭ ءوزى ۇيالدى, ايتەۋىر سول گۇلدەرگە كەيىن ەشكىم تيمەيتىن بولدى.
بيزنەستە دە, مەملەكەتتىك قىزمەتتە دە ءابدەن پىسكەن ازاماتتىڭ ءبىرى – يسلام ابىشەۆ. بۇل ازاماتتىڭ ەڭ جاقسى قاسيەتى – ءوزىم بىلەمىن, وزگەنىڭ ءتىلىن المايمىن دەگەن پيعىلىنىڭ جوقتىعىندا. قيراعان سالاعا قارجى تارتۋعا شەبەر. ۇكىمەت بانكتەردىڭ قىسىمىن ازايتۋ ءۇشىن تەتىكتەر ىزدەستىرە باستاعاندا پايىزى از, قايتارىمى كۇمانسىز شارۋا سەرىكتەستىگى جۇيەسىن رەسپۋبليكادا ەڭ العاش ويلاپ تاپقان, شارۋالار ەڭبەگىن جەڭىلدەتكەن كىسىڭىز وسى. “ورداباسى نەسيە سەرىكتەستىگىنەن” كەيىن وسى شارۋا رەسپۋبليكالىق قارقىن الدى.
كەيىن وبلىس اكىمىنىڭ ءبىرىنشى ورىنباسارى بولعاندا دا شاعىن جانە ورتا بيزنەسكە ەكىنشى دارەجەلى بانكتەردىڭ ءوز اياعىمەن كەلىپ, اقشا سالۋىنا ۇيىتقى بولدى.
ايتساق ۇزاپ كەتەدى. بىلمەيتىنىن بىلەتىننەن سۇراپ الۋعا ارلانبايتىن, ەندى ءبىر مەزەتتە سول سالانى ءوزى ۇيرەتكەن ازاماتتان ارتىق ءبىلىپ, اقىلىن ايتىپ تۇراتىنى تاعى بار.
وڭتۇستىكتى شەگىرتكە بۋعاندا قىناداي قىرۋدىڭ باسىندا ءجۇردى. كەيبىرەۋلەردەي شەگىرتكە دەگەن نە دەمەي, شوبەرە-شوپشەگىنە دەيىن تاراتىپ ايتىپ بەرەتىن.
وڭتۇستىكتىڭ ءۇش اۋدانىنداعى ەكى مىڭعا تارتا ءۇيدى قارعىن سۋ العاندا كەرزى ەتىگى كۇرپىلدەپ, كۇندىز-ءتۇنى سول جەردە ءجۇردى. سۋدىڭ دىمى كەپپەي تۇرىپ, كوميسسيا قۇرعىزىپ, ۇكىمەتتىڭ كوزىن جەتكىزىپ, جاڭا ءۇي سالۋىنا ۇيىتقى بولعانىن ايتپاساق, ەلگە جاقسىلىقتى ۇمىتقانىمىز.
ونىڭ قادىرىن وبلىس باسشىسى بولعان ومىرزاق شوكەەۆ جاقسى بىلەدى. شىعىس قازاقستان وبلىسىندا قارعىن سۋدان توتەنشە جاعداي تۋىنداعاندا پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ وسكەمەن قالاسىنىڭ اكىمى يسلام ابىشەۆتى سول كوميسسيانىڭ باسشىسى ەتىپ بەكىتۋى, تىعىرىقتان الىپ شىعارىنا سەنگەنى عوي.
ارينە, بەس ساۋساق بىردەي ەمەس. ابىشەۆتىڭ دە ءوز قايشىلىقتارى بار. ول اكىمنىڭ ءبىرىنشى ورىنباسارى قىزمەتىندە جۇرگەندە بۇرىنعى فيرماسىنىڭ مەملەكەتتىك ساتىپ الۋ بايگەسىندە جولى تىم بولعىش بولعاندىعى, بەردىبەك ساپارباەۆ قارا بازاردان ارەڭ تازارتقان قاجىمۇقان اتىنداعى ستاديوننىڭ الدىنان كەرىسكەدەي بيزنەس عيماراتىن سالىپ العاندىعى وسى وبلىسقا بولسىن دەيتىن ازاماتتىڭ ءبىرى رەتىندە كوڭىلگە قونباعانىمەن, يسلام ابىشەۆتى وبلىس اۋماعىنان شىعارىپ العانىمىزعا ءىشىمىز اشيتىنىن جانە جاسىرا المايمىن.
وڭتۇستىكتىڭ قازىرگى كەزدە سىرتتا جۇرگەن كادرلارى تۋرالى كەڭ بايانداپ جاتقانىمىز, بۇگىنگى باسشىلىققا وسىنداي ىسكەر ازاماتتاردى تاۋىپ السا دەگەن نيەت قوي بىزدىكى.
اسقار مىرزاحمەتوۆ وبلىستىڭ كادر ساياساتىنا جاڭا لەپ اكەلگىسى كەلدى. جاس كادرلاردى وسىرمەك ويى بولدى. كادر ەرەجەسىن بەكىتتى, تالقىلاۋعا ۇسىندى. نيەت جاقسى. بىراق, ءبارى ويداعىداي بولدى ما؟ شاحمات ويناعانداي كەيبىر باسقارمالاردا باستىقتاردى بىرنەشە مارتە وزگەرتىپ كوردى.
ماسەلەن, كاسىپكەرلىك جانە ونەركاسىپ باسقارماسىنىڭ باسشىلىعىنا يلياسوۆ عالىمجاندى تاعايىندادى. جىلى ءسوز ايتتى. كەيىن ونى الىپ تاستاپ, وندىردەي جاس جىگىت نۇرجان التاەۆتى قويدى.
ءوزى قازاق بولا تۇرىپ قازاق ءتىلىن قاقپايتىن وسى جىگىتتىڭ ەسەبىنە قاتىسقانبىز. كاسىپكەرلىكتى ورگە باستىرۋ جايىندا كوپ ايتادى. وگىزدەي سۇيرەيتىن لوكوموتيۆ كەرەكتىگى تۋرالى ايتادى. اكىم سۇراپ ەدى, ونىڭ قانداي لوكوموتيۆ ەكەندىگىن ءوزى بىلمەي, جاۋابىنان ءسۇرىندى.
وسى باسقارمادا بارا جاتقاننىڭ بالتاسىن, كەلە جاتقانىن كەتپەنىن الىپ قالا الاتىن, ىسكەرلىگى مەن وتكىر مىنەزى قابىسىپ جاتاتىن, ەلباسىنىڭ الدىندا وبلىس ءوندىرىسى جونىندە ەسەپ بەرگەن روزا نازاربەكوۆا بار ەدى. مەملەكەتتىڭ قىزمەتتىڭ كورىگىندە شىڭدالعان كادىربەكوۆ كەرىمحان كىمنەن كەم؟!
“لوكوموتيۆ” ىزدەپ جۇرگەن التاەۆتاردى مىقتى كادر ەتىپ وسىرۋگە, ابدەن پىسىرۋگە وسى ازاماتتاردىڭ قاۋھارى ابدەن جەتەر ەدى.
ەنەرگەتيكا جانە كوممۋنالدىق شارۋاشىلىق باسقارماسىندا دا وسىنداي جاعدايلار ورىن الدى.
رەسمي باسىلىمنىڭ وكىلى بولعاننان كەيىن اكىمنىڭ باسقارۋ مەحانيزمىن تۇسىنگىمىز كەلەدى. بىراق, حالىقتىڭ اۋزىنا قاقپاق قويا المايسىڭ عوي.
وڭتۇستىكتە كادردىڭ قادىرىنە بايلانىستى سىبىر-كۇبىر ءسوز ارىستاندى قاراباستىڭ ءبىر سوقسا اپتالاپ, ايلاپ سوعاتىن جەلىندەي گۋلەپ تۇر.
ول سوزاق اۋدانىنىڭ اكىمى سوزاقباي ءابدىقۇلوۆقا قاتىستى.
ونجىلدىق اكىمدىك قىزمەتىندە ارتىنا جامان ءسوز ەرتپەگەن يماندى اكىمنىڭ ورىنتاق ماسەلەسى استانادا شەشىلىپ قويىلعان دەگەن جەل ءسوزدىڭ وسى وڭىردە ۇرى يتتەي سۋماڭ قاعىپ جۇرگەنى قاشان. ەگەر وسى اقپارات راسقا اينالسا, جەتىسكەن-اق ەكەنبىز.
سوزاق اۋدانىنىڭ اكىمى ارقايسىسىنىڭ استىنا ءبىر-ءبىر تاي مىنگىزبەسە دە جۋرناليستەردىڭ دەنى ونىڭ قىزمەتىن باعالايدى. وڭتۇستىك وڭىردەگى ىسكەر اكىمدەردىڭ كوش باسىنا قويادى. جانە ونىسى نەگىزسىز ەمەس.
اقىرى ءسوز بولعاننان كەيىن ەلگە سىيلى وسى ازامات جايلى از-كەم ايتا كەتكەن ءجون بولار.
سوزاقباي ابدىقۇلوۆ – بەردىبەك ساپارباەۆتىڭ كەزىندە اتقا قونعان وسى ءوڭىردىڭ تۋماسى ەدى. مەملەكەتتىك قىزمەتكە ادالدىعىنا, ادىلدىگىنە, ىسكەرلىگىنە وبلىس باسشىلارى ەشقاشان شەك قويعان ەمەس. الاقولدىعى جوق, جەڭ ۇشىنان جالعاسۋ دەگەن وعان جات. مەملەكەتتىك ساتىپ الۋدا جەڭىسكە جەتكەن كاسىپكەرلەر ىرىمىن جاساعىسى كەلسە, “اينالايىن, مەن ارامنان مال جەمەيمىن, قارجىڭ ارتىلىپ جاتسا, اۋداندا كەم-كەتىك جەرلەر كوپ, سوعان سال” دەيدى ەكەن. ونى كاسىپكەرلەردىڭ وزدەرى ايتىپ جۇرەدى.
بولات جىلقىشيەۆ وبلىس اكىمى بولىپ تۇرعان كەزدە ءۇش ءجۇز مىڭعا جۋىق حالقى بار اۋدان اكىمىنە قاراتىپ “وسى سىزدەر قارجى جوق دەپ بيۋدجەتكە اۋىز اشا بەرەسىزدەر. سول سىزدەرگە جوق ينۆەستورلاردىڭ ابدىقۇلوۆتى شىر اينالىپ شىقپايتىندىعى نەسى ەكەن” دەگەنىن ءوز قۇلاعىمىزبەن ەستىگەنبىز. بۇرىن سوزاققا وبلىس باسشىلارى قىرىنا العان اكىمدەردى جىبەرەر ەكەن. ءبۇگىنگى سوزاق – ەرتەگى ىسپەتتى قالا. سوزاق ءوندىرىستى قالا بولعاننان كەيىن قارجىسى كوپ دەپ ايتقىسى كەلەتىندەر دە بار. “قازاتومپروم” ۇلتتىق كومپانياسى مەن بىرلەسكەن كاسىپورىن باسشىلارىنا قۇزىرلى مەكەمەلەر مەن فيرمالار سالىعىن جەرگىلىكتى جەرگە تولەۋگە ابدىقۇلوۆتىڭ مىندەتتەۋى ارقاسىندا كەلگەنىن نەگە مويىنداۋعا بولمايدى. قازاقستاندا كەننىڭ ۇستىندە وتىرىپ تاقياسىنىڭ جىرتىعىن جاماپ وتىرعان قالا, اۋداندار كوپ قوي.
جاقىندا سوزاقتىڭ اكىمى ەسەپ بەردى. سوزاقتا تاۋارلى ءونىم ءوندىرۋ كولەمى بىلتىرعى جىلدىق ەسەپتى مەرزىمىمەن سالىستىرعاندا 138 پايىزعا ءوسىپ, 36 ملرد. 625 ملن. تەڭگەگە جەتكەن.
بۇل وبلىس بويىنشا وندىرىلگەن ءونىمنىڭ 26 پايىزىن قۇرايدى.
تارتىلعان ينۆەستيتسيا كولەمى بىلتىرعى جىلدىڭ ەسەپتى مەرزىمىمەن سالىستىرعاندا 141 پايىزعا ءوسىپ, 15 ملرد. 54 ملن.تەڭگەنى قۇراعان. ول وبلىس بويىنشا تارتىلعان ينۆەستيتسيانىڭ 20 پايىزىنا جەتەدى.
باسقا جاقسىلىقتاردى تەرمەلەمەگەندە وسى ەكى دەتالدىڭ ءوزى سوزاقتا ۇيلەسىمدى جۇمىستار جاسالىپ جاتقانىن بايقاتادى.
ەسەپ بەرۋدە وبلىس اكىمىنىڭ ورىنباسارلارى, باسقارما باسشىلارى سويلەدى.
وبلىس اكىمىنىڭ ورىنباسارى ءالي بەكتاەۆ ءبىلىم, الەۋمەتتىك سالا, سپورت كەشەندەرى جاعىنان باسقا اۋدان, قالا اكىمدەرىنە سوزاقتىڭ ۇلگى بولاتىندىعىن ايتتى. بالاباقشالاردى پايدالانۋعا بەرۋدە رەسپۋبليكالىق كورسەتكىشتەن جوعارى ەكەندىگى ايتىلدى. كاسىپكەرلىك سالاسىندا جاعىمدى جاڭالىقتار بار.
بۇگىندە وبلىستا ەكونوميكالىق دامۋ كورسەتكىشتەرى جونىنەن ەڭ مويىن وزىعى وتىرار اۋدانىنىڭ اكىمى بەيبىت سىزدىقوۆ. تۇز تاتىعان سورعا سۋ شىعارىپ, جاسىل جەلەكتى جايقالتىپ قويعان سىزدىقوۆ ء“بىزدىڭ ۇلگى الارىمىز, الدىمىزداعى تەمىرقازىعىمىز – سوزاقباي ابدىقۇلوۆ. ەلگە سول كىسىدەي سىيلى بولىپ, ەڭبەك سىڭىرە الساق اكىمدىك قىزمەتىمىزدىڭ اقتالعانى” دەپ ەدى.
ابدىقۇلوۆقا ادۆوكات كەرەگى جوق. ءوز قۇقىعىن ءوزى قورعاي الادى. الايدا, ازامات ەردىڭ باسىن بۇلت شالعاندا اقيقاتىن ايتپاساق – ارعا سىن.
ابدىقۇلوۆتاي اكىمدەردىڭ قىزمەتىن الىپ قويۋ ەمەس, ولاردىڭ قاتارىن كوبەيتە الساق, وڭتۇستىكتىڭ ايى وڭىنان تۋار ەدى.
كادردان قادىر قاشپاسا ەكەن دەگەندە ايتارىمىز كوپ ەدى. استاناداعى دوكەيلەردىڭ ءوتى جارىلاپ كەتسە دە, مۇنداي ىسكەر اكىمدەردى ات قۇيرىعىنا بايلاپ جىبەرۋ – ازاماتتىققا جاتپايدى.
اسقار مىرزاحمەتوۆ – قازىردىڭ وزىندە وڭتۇستىكتە ۇلكەن ءىزىن قالدىرعان ازامات. وڭتۇستىكتىڭ زيالىلارى ەكى ءسوزىنىڭ بىرىندە ابايدى مىسالعا العانىمەن, ساياباقتا جۇرەسىنەن وتىرعان ەسكەرتكىشىنە عانا مالدانىپ كەلدى.
ا.مىرزاحمەتوۆ قازاق اقىل-ويىنىڭ پاديشاسى اباي بابامىزدىڭ تاريحي مۇراجايىن ىسكە قوسىپ بەردى. تاۋەلسىزدىك الاڭىن كوتەردى. تاۋ تۇعىرعا قازاقستان بايراعىن جەلبىرەتتى. وتان سوعىسىنا قاتىسقان بارلىق مايدانگەرلەردىڭ اتى-ءجونىن تۇگەندەتىپ, “داڭق” مەموريالىن ىسكە قوستى. اسانباي اسقاروۆتان قالعان كوز “دەندروباقتىڭ” باعىن اشتى. ءان پاديشاسى ء“شامشى ساياباعىن” پايدالانۋعا بەرىپ, شەرتپە كۇيدىڭ اتاسى سۇگىردەن باستاپ اتى-جوندەرىن “جۇلدىزدار اللەياسىنا” جازدىردى. سوفىلىق ءىلىمنىڭ نەگىزىن قالاعان قوجا احمەت ءياساۋيدىڭ حيكمەتتەرىن ءتۇركىستانعا قىزىل گرانيتكە قاشاپ جازعىزدى. ارينە, بيزنەستىڭ الەۋمەتتىك جاۋاپكەرشىلىگى اياسىندا.
وسىنداي ۇلان-عايىر جۇمىستارعا ۇيىتقى بولعان وبلىس باسشىسىنىڭ كادر تاڭداۋدا قاتەلەسپەي, مىقتىلارىنا قورعان بولعانىن قالار ەدىك. بۇگىندە جۇرتتىڭ ءبارى اقىلدى. جاناشىرلىقپەن ايتىلعان ويلاردى ءارى-بەرى ۇيىتقىتىپ, وبلىس باسشىسىنا تەرىسىنەن جەتكىزۋگە تىرىساتىندار دا كوپتەپ تابىلادى. بىراق, ولاردىڭ ءسوزى شوت ەمەس. جاقسى نيەتپەن ايتتىق. بىزدىكى – جۇرتتىڭ پىكىرىن ءبىلدىرۋ, تالعامىنا تاتىپ جاتسا, وي قوسۋ.
ء“ىس تەتىگىن كادر شەشەدى”. بۇل ءبىز ويلاپ تاپقان ناقىل ەمەس...
باقتيار تايجان.
وڭتۇستىك قازاقستان وبلىسى.