اقش-تىڭ نيۋ-يورك قالاسىندا الەمگە تانىمال رۋبين ونەر مۋزەيى (Rubin Museum of Art) اتتى مەكەمە بار. وتكەن عاسىردىڭ 70-جىلدارى امەريكالىق بيزنەسمەن دونالد رۋبين قالا ورتالىعىنداعى Barneys عيماراتىن ساتىپ الىپ, ونى بەرتىندە مۋزەيگە اينالدىرعان ەدى.
قازىر اتالعان مەكەمە كوللەكتسياسىندا مىڭنان استام ەكسپونات بار. بۇلاردىڭ دەنى – ءارتۇرلى مۇسىندەر, كارتينالار, قولجازبالار, عۇرىپتىق زاتتار جانە گرافيكالىق تۋىندىلار. بۇل جادىگەرلەر ۋاقىتتىق تۇرعىدان – ءبىزدىڭ زامانىمىزدىڭ ءىى عاسىرىنان باستاپ, حح عاسىر ارالىعىنداعى دۇنيەلەر.
وسىلاردىڭ ىشىندە دالا كوشپەلىلەرىنە ءتان قۇندى زات – اشەكەيلى ەرتوقىم. مۋزەي انىقتاماسىندا – ەردىڭ ولشەمى 13 ح 26 ح 14 ديۋيم (باس بارماق ولشەمى – شامامەن 2,5 سم) دەپ كورسەتىلىپ, جالپى تۇلعاسى (كورپۋسى) اعاشتان شاۋىپ قۇراستىرىلعان, الدىڭعى قاسى شارشى پوشىمداس بيىك بىتكەن. ونىڭ قاس بەتى التىن ويۋمەن اشەكەيلەنگەن. ويۋدىڭ بەزەندىرىلۋ سيپاتى – شىعىس ءستيلىن ساقتاعان. اسا نازىك ءھام اڭ بەينەلى مۇسىندەرمەن شەبەر كومكەرىلگەن. ارتقى قاسى جايپاق. وتىرۋعا وتە قولايلى. ەردىڭ قوس قاپتالىنىڭ قانجىعالىعىنا التىن ورنەك سالىنعان.
جادىگەردىڭ تاعى ءبىر ەرەكشەلىگى – قاپتالى مەن قاسىنىڭ قىرى بەرىك تەمىر بۇيىممەن كومكەرىلىپ, كوپشىگى جۇمساق ماتامەن جاسالسا, تەبىنگى توقىمىنا جىبەك پۇل پايدالانىلىپ, ءىشى ماقتامەن استارلانىپتى. جاسالعان ۋاقىتى – حVIII نەمەسە ءحىح عاسىر شاماسى دەيدى ماماندار.
«جادىگەردىڭ اقى يەسى كىم؟» دەگەنگە توقتالساق زەرتتەۋشىلەر ءبىراۋىزدان: «ەرتوقىم يەسى كوشپەلىلەر», دەيدى. ءبىر قىزىعى, بۇل ەر ەكى عاسىر بۇرىن پاتشالىق رەسەي قۇرامىنداعى ازيادان (قازاق دالاسى) مەتروپوليتەن ونەر مۇراجايىنا (اقش) جەتكىزىلگەن ەرلەرگە قاتتى ۇقساس. وسىعان قاراپ بۇل ەر-تۇرمان قازاقتىڭ بۇيىمى بولۋى مۇمكىن.
ەكسپوناتتى مۋزەي قورىنا 2013 جىلى امەريكالىق كوللەكتسيونەر, مەتسەنات, لەون دج. ۆەيل (Leon J. Weil) سىيعا تارتىپتى. بۇل كىسى 1984–1987 جىلدارى اقش-تىڭ نەپالداعى ەلشى ءمينيسترى قىزمەتىن اتقارعان كەزىندە تيبەتتىك تۇلعادان ساتىپ العانى تۋرالى ايتىلادى.