ءحانتاڭىرىنىڭ مۇزبالاعى اتانعان اقيىق اقىن مۇقاعالي ماقاتاەۆتىڭ تۋعان كۇنىنە وراي تۇركىستاندا, سونداي-اق شىمكەنتتە اسەرلى ادەبي-سازدى كەشتەر ءوتتى.
«مەدياكراتيا» قوعامدىق بىرلەستىگىنىڭ قولداۋىمەن, «مارحابات» جۋرنالىنىڭ جانە شىمكەنتتەگى قالام ۇستاعان, ادەبيەتسۇيەر, ونەرسۇيەر ءبىر شوعىر جاستاردىڭ ۇيىمداستىرۋىمەن وتكەن «كۇن قايدا اسىعادى؟» اتتى كەش شىمىلدىعى تاعىلىمدى بەينەروليكپەن ءتۇرىلىپ, اقىننىڭ ولەڭدەرى وقىلدى, سوزىنە جازىلعان اندەر شىرقالدى. باعدارلامانىڭ نەگىزگى ارقاۋى «ماڭگىلىككە وزىممەن الا كەتكەن, مەنىڭ نازىك جانىمدى كىم تۇسىنەر؟» دەپ جىرلاعان اقىننىڭ ليريكالىق ولەڭدەرى مەن اندەرى بولدى.
كەش بارىسىندا اشىق ميكروفون جاريالانىپ, كورەرمەندەر ولەڭ وقىپ, جۇرەكجاردى لەبىزدەرىن ءبىلدىردى. «وڭتۇستىكتەگى قالامىن ۇشتايىن, تالانتىن شىڭدايىن دەگەن ادەبيەتكە ءبىرتابان جاقىن جاستاردىڭ ءبارى دەرلىك كوزى تىرىسىندە كلاسسيك جازۋشى مارحابات بايعۇتتىڭ توڭىرەگىنە شوعىرلانىپ جۇرەتىن. ەندى وسى ءداستۇر «مارحابات» جۋرنالىنىڭ توڭىرەگىندە جالعاسىن تابۋعا ءتيىس, شىمكەنتتە ادەبيەت پەن ونەردى قادىرلەيتىن جاستاردىڭ باس قوساتىن ءبىر شاڭىراعى بولۋى كەرەك دەگەن نيەتپەن وسىنداي ءبىر ىزگى باستامانى قولعا العان جايىمىز بار. ولەڭمەن عۇمىر كەشكەن اقىننىڭ بولمىسىن اشا تۇسۋگە ءداستۇرلى انشىلەر مەن ادەبيەتسۇيەر قاۋىم, ونەرلى جاستار اتسالىسىپ وتىر.
جىل سوڭىندا «مارحابات» جۋرنالى پروزالىق, پوەزيالىق جانە پۋبليتسيستيكالىق باعىتتار بويىنشا «مارحابات» جۋرنالىنىڭ لاۋرەاتتارىن» انىقتايدى. قورىتىندى كەشتە قازىلار شەشىمىمەن لاۋرەات اتانعان قالامگەرلەرگە قارجىلاي سىيلىقتار تابىستالادى», دەيدى اقىن, «مارحابات» جۋرنالىنىڭ باس رەداكتورى سەزىم مەرگەنباي.
تۇركىستاندا وبلىستىق «فاراب» امبەباپ عىلىمي كىتاپحاناسىنىڭ ۇيىمداستىرۋىمەن وتكەن «تۋلا, جۇرەك» اتتى پوەزيا كەشى دە كوپتىڭ كوڭىلىنەن شىقتى. قازاق پوەزياسىنىڭ زاڭعار تۇلعاسى, مۇزبالاق اقىن مۇقاعالي ماقاتاەۆتىڭ 95 جىلدىق مەرەيتويىنا وراي وتكەن كەش بارىسىندا اقىننىڭ سىرشىل, تەرەڭ ماعىنالى ولەڭدەرى وقىلدى. «بولاشاق» كوللەدجىنىڭ ستۋدەنتتەرى مەن ۇلتتىق ۇلاننىڭ 5574 اسكەري ءبولىمى ساربازدارى ارنايى دايىنداعان جىرلارىن مانەرلەپ وقىپ, كورەرمەنگە ەرەكشە اسەر سىيلادى. سونىمەن قاتار اشىق ميكروفون فورماتىندا ەركىن پىكىر الماسۋ ۇيىمداستىرىلىپ, قاتىسۋشىلار مۇقاعالي پوەزياسىنداعى ادام, ماحاببات, ءومىر جانە تۋعان جەر تاقىرىپتارى توڭىرەگىندە وي ءبولىستى. مۇقاعالي اقىننىڭ رۋحاني مۇراسىن زاماناۋي فورماتتا ناسيحاتتاۋ جانە جاستاردىڭ ادەبيەتكە دەگەن قىزىعۋشىلىعىن ارتتىرۋدى كوزدەگەن «تۇنگى كىتاپحانا» جوباسى اياسىندا قولعا الىنعان پوەزيا كەشىنىڭ سوڭىندا كىتاپحانا ديرەكتورى جانات سادىبەكقىزى جۇرەكجاردى لەبىزىن ءبىلدىرىپ, كوپشىلىككە العىس ايتتى.