14 000 000 000 وڭىردە ەلباسىنىڭ “100 مەكتەپ, 100 اۋرۋحانا” باعدارلاماسىمەن 6 اۋرۋحانا سالۋعا وسىنشاما تەڭگە قاراستىرىلعان.
حالىقتىڭ دەنساۋلىعىن قورعاۋ ماڭىزدى مىندەتتەردىڭ قاتارىندا بولعاندىقتان, وڭىردە باعدارلاما بويىنشا ناقتى جۇمىستار قولعا الىنىپ, ونىڭ تياناعى كەلتىرىلۋدە. مىسالى, باعدارلاماعا سايكەس جوسپارلانعان 6 اۋرۋحانا قۇرىلىسىنا 14 ملرد. تەڭگە قاراستىرىلسا, ونىڭ تورتەۋىندە جۇمىس قىزا تۇسكەن. مەردىگەر ۇيىمدار بەلگىلەنگەن قۇرىلىس-قۇراستىرۋ جۇمىستارىن تولىق كولەمدە ورىنداپ, نىسانداردىڭ ساپالى سالىنۋىنا ءمان بەرگەنى وسىنىڭ دالەلى. ولاردىڭ قاتارىندا ىلە اۋدانى وتەگەن باتىر كەنتىندەگى 200 توسەكتىك الماتى وڭىرلىك بالالار اۋرۋحاناسى مەن 450 ادامدى قابىلدايتىن ەمحانا, ەڭبەكشىقازاق اۋدانى, ەسىك قالاسىنداعى 250 توسەكتىك ورتالىق اۋرۋحانا جانە الاكول اۋدانىنداعى دوستىق كەنتىندەگى 50 توسەكتىك اۋىلدىق اۋرۋحانا قۇرىلىستارىن ايتۋعا بولادى. ال قالعان ەكى دەنساۋلىق ساقتاۋ نىسانىنا بايلانىستى تيپتىك جوبالاردى جاساۋ اياقتالىپ, جۇمىس كەستەگە ساي جالعاستىرىلۋدا.
كۇمىسجان بايجان. الماتى وبلىسى.
* * *
400 000 000 اقتوبە قالاسىنداعى تاحاۋي احتانوۆ اتىنداعى وبلىستىق دراما تەاترىن كۇردەلى جوندەۋگە بيۋدجەتتەن وسىنشاما تەڭگە قارجى بولىنگەن. بۇل قارجىنىڭ 150 ميلليون تەڭگەسى رەسپۋبليكالىق بيۋدجەتتەن, قالعانى جەرگىلىكتى بيۋدجەتتەن ءبولىنىپ وتىر. وتكەن جىلدىڭ مامىر ايىندا باستالعان كۇردەلى جوندەۋ جۇمىستارى الداعى قىركۇيەك ايىندا اياقتالادى دەپ كۇتىلۋدە. تەاتردىڭ ءىشى-سىرتى ادام تانىماستاي وزگەرەدى. جيھازدار, كورەرمەندەر زالىنداعى وتىرعىشتار, جىلجىمالى ساحنا, اسپالى شامدار, باسقا دا زاتتار تولىقتاي جاڭارتىلادى. جيھازدار مەن باسقا قۇرال-جابدىقتار ساۋد ارابياسىنان, تۇركيادان, رەسەيدەن اكەلىنۋدە. تەاتردىڭ كۇردەلى جوندەۋ جۇمىستارىن “وكسيبيلد” كومپانياسى جۇرگىزۋدە. مۇندا 70 ادام ەڭبەك ەتۋدە. بۇعان دەيىن تەاتردىڭ باس اۋرۋىنا اينالىپ كەلگەن جىلۋ ماسەلەسى دە وڭ شەشىمىن تاپپاق. تەاتر عيماراتىنىڭ دەربەس جىلۋ قازاندىعى دا سالىنىپ جاتىر.
ساتىبالدى ءساۋىرباي. اقتوبە وبلىسى.
* * *
83 000 وتكەن جىلى وڭىرگە وسىنشاما ادام تۋريستىك ساپارمەن كەلدى. وبلىس بويىنشا 12 تۋريستىك فيرما جۇمىس ىستەيدى. باياناۋىلداعى جاسىباي كولى جاعاسىندا تۋريستەرگە ارنالعان 20-شاقتى دەمالىس ءۇي بار. بۇل جەردىڭ تۋريستىك مارشرۋتىن تانىمدىق-ەتنوگرافيالىق تاريحي تۋريزم ورتالىعى دەپ تە اتاۋعا بولادى. جىل سايىن وسى جەردەگى ۇلتتىق ساياباق شارۋاشىلىعى 35-40 ميلليون تەڭگەدەي پايدا تاۋىپ وتىر. ىشكى ءتۋريزمنىڭ وركەنيەتكە ىلەسە باستاۋىنىڭ ارقاسىندا مويىلدى كۋرورتىنا, قالاتۇز شيپاجايىنا رەسەيدەن, گەرمانيادان تۋريستەر كوپتەپ كەلۋدە. سونىمەن قاتار, وبلىستاعى تۋريستىك فيرمالار سىرتقى تۋريزم سالاسىنا دا ناقتى نازار اۋدارۋدا. مىسالى, وبلىستان شەتكە شىققان تۋريستەردىڭ 96,2 پايىزى تمد-دان تىس ەلدەردى تاڭداعان. وبلىس تۇرعىندارىنان 2009 جىلى تۇركياعا –3110 ادام, قىتايعا – 1132, ءباا – 408, گەرمانياعا – 332, تايلاندقا – 291, مىسىرعا– 235, چەحياعا –112 ادام بارىپ قايتقان.
فاريدا بىقاي. پاۆلودار وبلىسى.