جاڭا وقۋ جىلىنىڭ باستالۋىنا ساناۋلى كۇندەر قالدى. سوعان وراي ءبىلىم جانە عىلىم مينيسترلىگى جاڭا وقۋ جىلىنىڭ دايىندىق شارالارىنا اسا ءمان بەرىپ, ولاردىڭ ساپالى ءارى ناتيجەلى ورىندالۋىنا ەرەكشە دەن قويىپ وتىر دەسەك, ءبىلىم جانە عىلىم مينيسترلىگىندە ايتارلىقتاي ءمانى زور ەكى باسقوسۋ وتكىزىلدى. ەلىمىزدەگى مەكتەپ وقۋشىلارىنىڭ بىرىڭعاي فورمالارى مەن ناشاقورلىققا قارسى كۇرەستە اتالمىش ۆەدومستۆونىڭ ىقپالى جانە مىندەتتەرى وسى باسقوسۋلاردا تالقىلاندى.
الدىمەن ءبىلىم جانە عىلىم ءمينيسترى جانسەيىت تۇيمەباەۆتىڭ قاتىسۋىمەن ناشاقورلىققا قارسى ءىى حالىقارالىق سەمينار-فورۋم ءوتتى.
وندا مينيستر جاس ۇرپاقتىڭ دەنساۋلىعىنا نازار اۋدارۋ ماسەلەسىن جانە جاستار ورتاسىندا ناشاقورلىققا قارسى جۇمىس بارىسىن سەمينار-فورۋمعا قاتىسۋشىلارعا تانىستىرا كەلە, بۇل باعىتتاعى جۇمىستاردى بىرلەسە اتقارۋ كەرەكتىگىنە توقتالدى.
“ەلىمىزدىڭ بارلىق وقۋ وردالارىندا ەسىرتكىگە قارسى شارالاردى جۇزەگە اسىراتىن, ناسيحاتتاۋ جۇمىستارىمەن جان-جاقتى اينالىساتىن قىزمەتتىك ۇيىمدار بولادى. مۇنداي باعىتتاعى قىزمەتتەر سالاماتتى ءومىر سالتىن ناسيحاتتاپ قانا قويماي, دەنى ساۋ ۇلتتى تاربيەلەپ, قالىپتاستىرۋعا ىقپال ەتەدى. سونىمەن قاتار ءبارىمىز ءۇشىن حالىقارالىق تاجىريبەلەردى قولدانۋدىڭ دا بەرەرى كوپ. بۇل ورتاق مىندەتكە, ارينە, ناشاقورلىقتىڭ الدىن-الۋ جانە تاۋەلدىلىكتى جويۋ ءۇشىن ماماندار دايارلاۋ كەرەك” –دەدى مينيستر ءوز سوزىندە.
سەمينار-فورۋمعا قاتىسۋشىلار دا ءوز پىكىرلەرىن ورتاعا سالدى. ماسەلەن, حالىقارالىق سالاماتتىق اكادەمياسىنىڭ پرەزيدەنتى الەكساندر مايۋروۆ ەسىرتكىمەن كۇرەسۋ قوعامنىڭ بارلىق سالاسىن قامتيتىن الەۋمەتتىك ماسەلە ەكەنىن, سول سەبەپتى دە وعان قوعامنىڭ بارلىق مۇشەسى اتسالىسۋى قاجەتتىگىن تىلگە تيەك ەتتى.
ونلاين رەجىمىندە وتكىزىلگەن “مەكتەپ فورماسى جانە قازاقستان پەداگوگتارىنىڭ قازىرگى زامان كيىم ۇلگىسى” اتتى رەسپۋبليكالىق سەمينار-كەڭەسكە وبلىستىق, استانا ءجانە الماتى قالالارىنىڭ ءبىلىم باسقارمالارىنىڭ, قالالىق, اۋداندىق ءبىلىم بولىمدەرىنىڭ باسشىلارى, بالالار كيىمدەرىن شىعاراتىن وندىرۋشىلەر, ۇستازدار جانە اتا-انالار قاۋىمى قاتىستى. بۇل جيىندا نەگىزىنەن وقۋشىلارعا ارنالعان مەكتەپ فورمالارىنىڭ, سپورتتىق كيىمدەردىڭ, جالپى ءبىلىم بەرەتىن مەكتەپتەردەگى پەداگوگ قىزمەتكەرلەرگە ارنالعان كيىم ۇلگىلەرى مەن باعالارى تۋرالى ءسوز بولدى.
رەسپۋبليكانىڭ ءار وڭىرىنەن 700-دەن استام ءبىلىم بەرۋ ۇيىمدارى قاتىسقان ينتەراكتيۆتى فورۋم بارىسىندا اقتوبە, اتىراۋ, جامبىل, باتىس قازاقستان, قوستاناي, پاۆلودار وبلىستارىنىڭ جانە الماتى قالاسىنىڭ مەكتەپ فورماسىن ەنگىزۋ جونىندەگى تاجىريبەلەر تانىستىرىلدى.
سەمينار-كەڭەستە سويلەگەن مامانداردىڭ سوزىنە قاراعاندا قازاقستان بويىنشا مەكتەپ فورمالارىنىڭ ورتاشا باعاسى 11 مىڭ مەن 24 مىڭنىڭ ارالىعىندا كورىنەدى. ارينە, 24 مىڭنان 40 مىڭعا دەيىن تۇراتىن ۇلگىلەر دە بار ەكەن. ءبىر ايتا كەتەتىن جايت, بۇگىنگى كۇنى ەلدىڭ 9 ايماعىندا وقۋشىلار بىرىڭعاي مەكتەپ فورماسىنا اۋىسىپتى. ال ماڭعىستاۋ مەن باتىس قازاقستان وبلىستارىندا ءبىرىنشى سىنىپ تابالدىرىعىن اتتاعان وقۋشىلار جەرگىلىكتى بيۋدجەت ەسەبىنەن كيىنەدى ەكەن. ال جالپى قازاقستان نارىعىندا بالالار كيىمدەرىن شىعاراتىن 14 ءوندىرۋشى بار كورىنەدى.
سونداي-اق مينيسترلىك وكىلىنىڭ ايتۋىنشا, بيىلعى وقۋ جىلىنان باستاپ قىزىلوردا وبلىسىنداعى ءبۇتىن ءبىر اۋدان ءوز قاراجاتتارى ەسەبىنەن مۇعالىمدەرگە دە بىرىڭعاي كيىم كيىندىرمەك. ءبىلىم جانە عىلىم مينيسترلىگى 12-15 مىڭ تەڭگە ارالىعىندا باعالانىپ وتىرعان مۇعالىمدەردىڭ كيىم ۇلگىلەرىن بىرتە-بىرتە بارلىق وڭىرلەرگە ەنگىزۋدى كوزدەپ وتىر.
اراي ۇيرەنىشبەكقىزى.