بۇل ماڭايدا جامانتاۋدىڭ بوكتەرىندە ورنالاسقان ەس-164/4 قاتاڭ رەجىمدەگى كولونيانى بىلمەيتىن جان كەمدە-كەم. مەكەمەدە اسا اۋىر قىلمىس جاساپ, ۇزاق مەرزىمگە باس ەركىنەن ايرىلعان رەتسيديۆيست-قىلمىسكەرلەر جازاسىن وتەيدى. مۇندا ەلدىڭ زارە-قۇتىن قاشىرىپ, الاتايداي شاپقىنعا تۇسىرەتىن جاعدايلار ورىن الىپ جاتاتىنى جاسىرىن ەمەس. وسىدان ونشاقتى جىل بۇرىن جازاسىن وتەپ جاتقان ەكى قىلمىسكەردىڭ قاماۋدان تاپا-تال تۇستە وپ-وڭاي سىتىلىپ شىعىپ, 8 ادامدى ءجانتاسىلىم ەتكەن قاندى ويران كەزىندە ۇلكەن ءدۇمپۋ تۋعىزعان بولاتىن. سودان كەيىن ءتارتىپ بارىنشا قاتاڭدانىپ, دۇربەلەڭ وقيعالار پىشاق كەسكەندەي تىيىلىپ ەدى. ەندى, مىنە, 21 شىلدەدە وسىنداعى 27 سوتتالۋشىنىڭ وزىنە-ءوزى قول جۇمساپ, دەنەلەرىنە ءتۇرلى جاراقات سالۋى ۇمىتىلا باستاعان ەسكى جارانى قايتادان قوزعاعانداي بولدى. كەيىن جاراقات الۋشىلاردىڭ سانى 38-گە جەتكەنىن قۇزىرلى ورگاندار راستادى. ورىن العان وقيعاعا وراي ارنايى كوميسسيا قۇرىلىپ, تەرگەۋ جۇمىستارىن باستاپ كەتكەن بولاتىن. سونىڭ العاشقى قورىتىندىلارىن وبلىس پروكۋرورى ا. دوسەكەنوۆ باق وكىلدەرىمەن وتكەن بريفينگتە جاريالادى.
پروكۋروردىڭ ايتۋىنا قاراعاندا, تۇرمە ىشىندە تارتىپسىزدىكتىڭ بەلەڭ الۋىنا وسىنداعى كەيبىر قىلمىستىق توپتار مۇددەلى بولعان ءتارىزدى. نارازىلىق كەزىندە وزدەرىنىڭ جاعىمسىز قىلىقتارىمەن بارىنشا كوزگە تۇسكەن 12 جازالانۋشىنى باسقا كولونياعا اۋىستىرۋ ماسەلەسى شەشىلۋدە. پروكۋرور جازاسىن وتەپ جاتقاندارعا الەۋمەتتىك-تۇرمىستىق, مەديتسينالىق كومەكتەردىڭ قالىپتى كورسەتىلمەيتىنى ءىشىنارا راستالعانىن جەتكىزدى. 660 ورىندى تۇرمەدە 725 سوتتالۋشى ورنالاسقان. مەديتسينالىق بولىمدەردە دارىگەرلەر جەتىسپەيدى. فتيزياتر-دارىگەر, فەلدشەر, رەنتگەنولوگ, تەراپەۆت ماماندارى تاپشى. اۋىز سۋمەن قامتۋ جايى ءماز ەمەس. كيىم-كەشەكپەن, ازىق-ت ۇلىكپەن جابدىقتاۋ ماسەلەسىندە دە ولقىلىقتارعا جول بەرىلگەن. ا.دوسەكەنوۆ مۇندا نەگىزىنەن گورنىي سەلوسىنىڭ تۇرعىندارى جۇمىس ىستەيتىنىن, ولاردىڭ اراسىن سىبايلاس جەمقورلىق جايلاعان دەگەن فاكتىلەردىڭ نەگىزسىز ەكەنىن نازارعا سالدى.
ول ءسوز سوڭىندا جاعدايدىڭ باقىلاۋدا تۇرعانىن, تەكسەرۋ امالدارىنىڭ جالعاسىپ جاتقانىن, سوتتالۋشىلار تالاپتارىنىڭ بىردە-ءبىرى نازاردان تىس قالمايتىنىن, ءتيىستى شارالار الىناتىنىن اتاپ كورسەتتى.
ادىلەت مينيسترلىگى باسشىلىقتى تۇگەل جاڭارتتى. قىلمىستىق اتقارۋ جۇيەسى سولتۇستىك قازاقستان وبلىستىق باسقارماسىنىڭ باستىعى بولىپ ادىلەت پولكوۆنيگى قابدىراحمان شوتاەۆ, ەس-164/4 قاتاڭ تارتىپتەگى كولونيا جەتەكشىلىگىنە ادىلەت پولكوۆنيگى قايرات نۇرىموۆ تاعايىندالدى.
ءومىر ەسقالي. سولتۇستىك قازاقستان وبلىسى.