استانا قالاسىنىڭ سالاماتتى ءومىر سالتىن قالىپتاستىرۋ ورتالىعىنىڭ ۇيىمداستىرۋىمەن ا ۆيرۋستىق گەپاتيتىنە شالدىعۋدىڭ الدىن الۋ جونىندە كونفەرەنتسيا ءوتتى. وعان قالانىڭ ەمدەۋ مەكەمەلەرىندە سالاماتتى ءومىر سالتىن قالىپتاستىرۋدى ناسيحاتتاۋشى ماماندار, ەپيدەميولوگتار, جۇقپالى اۋرۋدى ەمدەۋشى دارىگەرلەر, سونداي-اق, باق وكىلدەرى قاتىستى.
سالاماتتى ءومىر سالتىن قالىپتاستىرۋ پروبلەمالارىنىڭ ۇلتتىق ورتالىعىنىڭ مالىمەتى بويىنشا, ەلىمىزدىڭ ءاربىر وڭىرىندە ءار جىلدىڭ تامىز ايىندا ا ۆيرۋستى گەپاتيتىنە قارسى ون كۇندىك شارالار وتكىزىلىپ تۇرادى. سەبەبى, جىل سايىنعى كورسەتكىش بويىنشا قازاقستاندا 14 جاسقا دەيىنگى بالالار اراسىندا ا ۆيرۋستى گەپاتيتىنە شالدىعۋشىلىقتىڭ جوعارعى دەڭگەيى تىركەلگەن. ستاتيستيكالىق مالىمەتتەرگە ءسۇيەنسەك, ەلىمىزدە وسى اۋرۋعا شالدىعۋشىلار 75-80 پايىزدى قۇراسا, ونىڭ كوپشىلىك بولىگىن ەكى جاستان توعىز جاسقا دەيىنگى بالالار قۇرايدى ەكەن. گەپاتيتكە شالدىققانداردىڭ جوعارى دەڭگەيى قازاقستاننىڭ وڭتۇستىك, وڭتۇستىك-شىعىس وڭىرلەرىندە كەزدەسۋدە.
اۋرۋ ءوزارا قارىم-قاتىناس ارقىلى تارايتىندىقتان, قىركۇيەك-قازان ايلارىندا كۇشەيىپ, قىس ايلارىنا دەيىن جالعاساتىنى جايلى, سونداي-اق, ونىڭ الدىن الۋ شارالارى كونفەرەنتسيادا كەڭىنەن ءسوز بولدى. “ۆيرۋستىڭ الدىن الۋ شارالارىنا جاڭا تۋعان بالالارعا ۆاكتسيناتسيا, مەكتەپ جاسىنداعى بالالارعا رەۆاكتسيناتسيالىق ەكپە جاساۋ, بالالاردى ارنايى بولىنگەن جەرلەردە شومىلدىرۋ, ەلدى-مەكەندەردىڭ سانيتارلىق جاي-كۇيىن جاقسارتۋ, تۇرعىنداردى ساپالى اۋىز سۋمەن قامتاماسىز ەتۋ جاتادى”, – دەيدى استانا قالاسىنىڭ سالاماتتى ءومىر سالتىن قالىپتاستىرۋ ورتالىعىنىڭ ءبولىم باستىعى ج. سارسەنبەكوۆ.
ەستەرىڭىزگە سالا كەتەيىك, قازاقستاندا 1999-2000 جىلداردان باستاپ ۇكىمەتتىڭ قارجىلاي كومەگىمەن ماڭعىستاۋ وبلىسىندا ۆيرۋستىڭ جوعارعى كورسەتكىشىن قۇراعان بالالارعا ەكپە جاساۋ باستالعان. ال كەيىنگى جىلدارى ۆيرۋسقا شالدىققانداردى ەمدەۋ ءىسىن جەرگىلىكتى بيۋدجەت قارجىلاندىراتىن بولدى. بۇل ءۇردىس 2001-2003 جىلداردان باستاپ ەلىمىزدىڭ باسقا دا وڭىرلەرىندە جۇزەگە اسىرىلىپ كەلەدى. سالاماتتى ءومىر سالتىن قالىپتاستىرۋ پروبلەمالارىنىڭ ۇلتتىق ورتالىعىنىڭ ءمالىمەتتەرىنە سايكەس, اتالمىش شارا ناتيجەسىندە 2000 جىلى ەلىمىزدە اۋرۋدى جۇقتىرعاندار سانى 23475 بولسا, بۇل كورسەتكىش 2009 جىلى 5018-گە قىسقارعان. اتاپ ايتقاندا, اۋرۋعا شالدىعۋشىلار سانى 4,7 ەسەگە تومەندەگەن.
ا ۆيرۋستى گەپاتيتىنىڭ الدىن الۋ ستراتەگياسى ىشەك ينفەكتسياسىنىڭ الدىن العانداي, مۇندا اۋرۋدى سۋ ارقىلى جۇقتىرۋعا قارسى ءىس-شارالار كوبىنەسە بالالارعا, اسىرەسە قاۋىپ-قاتەر توبىنداعى, ياعني ەكى مەن توعىز جاس ارالىعىنداعى بالالارعا ەكپە جاساۋ شارالارى باسىمىراق بولاتىنى كونفەرەنتسيادا كەڭىنەن ءسوز بولدى.
جۇلدىز ءبايدىلدا, ەۇۋ ستۋدەنتى.