وسى كۇندەرى اقتاۋ قالاسىندا قازاق بوكسىنىڭ اتاسى, تۇڭعىش قازاقستاندىق سپورت شەبەرى شوقىر بولتەك ۇلىن ەسكە الۋعا ارنالعان V ءداستۇرلى حالىقارالىق تۋرنير وتۋدە.
ءتۋرنيردىڭ باس تورەشىسى قىزمەتىن تۋريزم جانە سپورت مينيسترلىگى سپورت ىستەرى جونىندەگى كوميتەتىنىڭ بۇيرىعىمەن تاعايىندالعان سەرىك ابدىناليەۆ اتقارۋدا.
قازاقستان بوكس فەدەراتسياسىنىڭ شەشىمىمەن بىلتىردان باستاپ شوقىر بولتەك ۇلى اتىنداعى ءداستۇرلى حالىقارالىق ءتۋرنيردىڭ جەڭىمپازدارى قازاقستان رەسپۋبليكاسىنىڭ سپورت شەبەرى اتاعىنا يە بولادى.
شوقىر بولتەك ۇلى 1916 جىلى ماڭعىستاۋ وبلىسى جارمىش اۋىلىنىڭ ماڭىندا سارقاۋاق دەگەن جەردە دۇنيەگە كەلگەن. بوكسپەن ستۋدەنت كەزىندە شۇعىلدانا باستاعان. وتىزىنشى جىلدارداعى اشارشىلىق, الاساپىران تۇستا فورت-شەۆچەنكو قالاسىنداعى جەتىمدەر ۇيىندە وقىپ, ورتا مەكتەپتى ءبىتىرەدى. ول – 1936 جىلى قازاق جەرىندە اۋەسقوي بوكستى ۇيرەتۋدى العاشقى بولىپ قولعا العان ۇستاز. قازاق بوكسىنىڭ اتاسى اتانعان شوقىر اعامىز – قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى, كسرو سپورت شەبەرى اتانعان تۇڭعىش قازاق.
1937 جىلى ش.بولتەك ۇلىنىڭ باسشىلىعىمەن بوكستان الماتى قالاسىنىڭ رەسمي بىرىنشىلىگى ءوتتى. وعان 50 سپورتشى قاتىسقان. شوقىر بولتەك ۇلى ۇلى وتان سوعىسىنا قاتىسىپ, 1944 جىلى جاراقاتىنا بايلانىستى ەلگە ورالادى. 1947 جىلى ءماسكەۋدە وتكەن كەڭەس وداعىنىڭ بىرىنشىلىگىنە قازاق ەلىنىڭ قۇراما كومانداسىن ش.بولتەك ۇلى دايىنداپ, باستاپ الىپ باردى. ونىڭ مەكتەبىنەن ماقسۇت وماروۆ, ءابدىسالان نۇرماحانوۆ, سەرىك ابىناليەۆ, ۆيكتور جانە ۆلاديمير كاريموۆتەر, يوسيف گيلدين, اسقار ق ۇلىباەۆ سەكىلدى تالانتتى شاكىرتتەر تاربيەلەنىپ شىقتى.
بيىل قازاق بوكسىنىڭ اتاسى اتانعان جەرلەسىمىز شوقىر بولتەك ۇلى مەن ونىڭ زايىبى, ەلىمىزگە بەلگىلى ءارتىس, تۇڭعىش بالەرينا ءبيشىسى نۇرسۇلۋ تاپالوۆانىڭ الماتىداعى كەڭساي قاۋىمىنداعى بەيىتىنە ماڭعىستاۋلىق كاسىپكەرلەردىڭ قولداۋىمەن ەسكەرتكىش تاس قويىلدى.
داستان كەنجالين.