شەرۋگە دايىندىق جوعارى
30 تامىز – قازاقستان رەسپۋبليكاسىنىڭ كونستيتۋتسياسى كۇنى “قازاق ەلى” مونۋمەنتىنىڭ جانىنداعى ەلىمىزدىڭ باس الاڭىندا اسكەري شەرۋ وتەدى.
شەرۋگە قارۋلى كۇشتەردەن قۇرلىق اسكەرلەرىنىڭ, اۋە قورعانىسى كۇشتەرىنىڭ جانە اسكەري-تەڭىز كۇشتەرىنىڭ, سونداي-اق ىشكى ىستەر مينيسترلىگىنىڭ, ۇلتتىق قاۋىپسىزدىك كوميتەتىنىڭ, توتەنشە جاعدايلار مينيسترلىگىنىڭ جانە رەسپۋبليكالىق ۇلاننىڭ بولىمشەلەرى قاتىسادى. اسكەري شەرۋگە قاتىسۋشىلاردىڭ جالپى سانى 2400 ادامدى قۇرايدى. ولاردىڭ قاتارىندا وفيتسەرلەر, كەلىسىم-شارت بويىنشا اسكەري قىزمەتشىلەر, اسكەري وقۋ ورىندارىنىڭ كۋرسانتتارى مەن مەرزىمدى اسكەري قىزمەت ساربازدارى بار.
شەرۋگە قاتىسۋشىلاردى ورنالاستىرۋ ءۇشىن استانا ماڭىنداعى قىرقىنشى ستانساداعى 68665 اسكەري ءبولىم اۋماعىندا ارنايى دالالىق لاگەر جاساقتالعان. مۇندا 40 شاتىردان تۇراتىن قالاشىقتا قاجەتتى ينفراقۇرىلىمنىڭ ءبارى جاسالعان. اسكەريلەر ءۇشىن دالالىق اسحانا, مەديتسينالىق بەكەتتەر, ءبىر سوزبەن ايتقاندا, بارلىق جاعدايلار بار.
قۇرلىق اسكەرلەرىنىڭ باس قولباسشىسى, شەرۋگە جەتەكشىلىك جاسايتىن گەنەرال-مايور مۇرات مايكەەۆتىڭ ايتۋىنشا, اسكەري شەرۋگە قاتىسۋشىلاردىڭ دايىندىعى جوعارى. اسكەريلەر ەلىمىزدىڭ باس الاڭىنداعى پارادقا قاتىسۋعا ساقاداي ساي تۇر. بيىلعى پارادقا 2400 ادام قاتىساتىن بولسا, سوعان قاجەتتى توپتاردى جاساقتاۋ ءۇشىن قارۋلى كۇشتەردەگى لايىقتى دەگەن اسكەري قىزمەتشىلەر ىرىكتەلىنىپ الىندى. قازىر ولار لاگەر جاساقتالعان 5 شىلدەدەن باستاپ كۇن سايىن دايىندالۋدا. 30 تامىز كۇنى رەسپۋبليكا جۇرتشىلىعى ولاردىڭ ناتيجەسىنە كۋا بولادى.
ال استانانىڭ ماڭىندا جاساقتالعان دالالىق لاگەردە 3200 ادام ورنالاسىپ وتىر. سونىڭ ىشىندە پارادقا 2400-ءى عانا قاتىساتىن بولادى. قازىر لاگەردە 285 اسكەري تەحنيكا ورنالاسقان. اسكەري پارادقا وسىلاردىڭ ءبارى قاتىسادى. قۇرلىق اسكەرلەرى شتاب باستىعىنىڭ ورىنباسارى, لاگەر باستىعى ەركەبولات وسپانوۆتىڭ ايتۋىنشا, بيىلعى پارادقا قاتىسۋ ءۇشىن ءاربىر گارنيزوندا اسكەري بورىشىن وتەۋشىلەر مەن ءبىرىنشى كۋرس كۋرسانتتارى ىرىكتەلىنىپ الىنعان. سولاردىڭ ءبارى ەرتەدەن كەشكە دەيىن ءۇش مەزگىل تاماقتانىپ, قاجەتتى جاتتىعۋلار جاساپ شەرۋگە جان-جاقتى دايىندالۋدا. پارادقا قاتىسۋشىلاردى اۋىز سۋمەن قامتاماسىز ەتۋدە بارلىق قولايلى جاعداي جاسالعان, ال ولاردى تاماقتاندىرۋ ماسەلەسىمەن “نۇر يسلام” فيرماسى اينالىسۋدا. بيىلعى پارادتىڭ تاعى ءبىر ەرەكشەلىگى, وعان وتان قورعاۋ جولىنداعى جاۋىنگەرلىك تاپسىرمالاردى ەرلەرمەن بىرگە ورىنداپ جۇرگەن اسكەري ايەلدەردەن قۇرالعان توپتار تۇڭعىش رەت قاتىسقالى وتىر.
شەرۋگە 150-دەن استام قارۋ-جاراق پەن اسكەري تەحنيكا جانە 66 اۆياتسيالىق تەحنيكا قاتىسادى دەپ جوسپارلانۋدا. سونىڭ ىشىندە مەحانيكالاندىرىلعان لەكتە “لاند روۆەر”, قارۋلى كۇشتەردەگى ت-72 ب تانكىلەرى, بمپ-2 جاياۋ اسكەرلەر جاۋىنگەرلىك ماشينەسى, زەنيتتى-زىمىراندى كەشەندەر, “حاممەر” اۆتوكولىكتەرى, جەتىلدىرىلگەن برونەترانسپورتەرلەر, د-30 120 ميلليمەترلىك گاۋبيتسالار, “مستا-ب” 152 مم. گاۋبيتساسى بار ارتيللەريالىق باتارەيا, “گراد”, “ۋراگان” سىندى دۇركىندەتە وق اتاتىن رەاكتيۆتى جۇيەلەر, ارتيللەريالىق جانە زىمىراندىق قارۋلار ساپىنداعى “سمەرچ”, “توچكا-ۋ” سياقتى قۋاتتى قارۋلار بار.
داستان كەنجالين.