“نۇر وتان” حالىقتىق-دەموكراتيالىق پارتياسىنىڭ ورتالىق اپپاراتىندا “قالامگەر-ازامات” ءىىى رەسپۋبليكالىق جاس جۋرناليستەر فورۋمىنا قاتىسۋشىلارمەن كەزدەسۋ ءوتتى. كەزدەسۋگە بايلانىس جانە اقپارات ۆيتسە-ءمينيسترى نۇراي ورازوۆ قاتىستى.
“زاڭعار” شىعارماشىلىق ءبىرلەستىگىنىڭ تىكەلەي ۇيىتقى بولۋىمەن, بايلانىس جانە اقپارات مينيسترلىگىنىڭ قولداۋىمەن ۇيىمداستىرىلعان بۇل شارانىڭ ماقساتى – ەلىمىزدىڭ تۇكپىر-تۇكپىرىندەگى جاس جۋرناليستەردىڭ باسىن قوسىپ, سەمينار-ترەنينگتەر وتكىزۋ, سول ارقىلى ەلىمىزدىڭ الەۋمەتتىك, ەكونوميكالىق سالالارىن دامىتۋ باعىتىنداعى اۋقىمدى جوبالاردى قولداۋ. بۇل رەتتە بايلانىس جانە اقپارات ۆيتسە-ءمينيسترى نۇراي ورازوۆ مۇنداي فورۋمداردىڭ ماڭىزى ايرىقشا ەكەنىنە توقتالىپ, ەلباسىنىڭ جاستار دامۋىنا ايرىقشا كوڭىل ءبولىپ وتىرعانىن اتاپ ءوتتى. سونداي-اق, اتالعان فورۋمنىڭ ەلىمىزدەگى جاس جۋرناليستەردىڭ كاسىبي ءوسۋى مەن شىعارماشىلىق تۇرعىدا تاجىريبە الماسۋىنا ۇلكەن مۇمكىندىك تۋعىزاتىنىن دا تىلگە تيەك ەتتى.
باسقوسۋ بارىسىندا ول بايلانىس جانە اقپارات ءمينيسترى اسقار جۇماعاليەۆتىڭ فورۋم قاتىسۋشىلارىنا ارناعان قۇتتىقتاۋىن وقىپ بەردى. وندا “قازىرگى ەگەمەن قازاقستاندا سىزدەردى, جاس قالامگەرلەر, بيىك ماقساتتار مەن بەلەستەر كۇتىپ تۇر. قازاقستان ەلىنىڭ, قازاق جۋرناليستيكاسىنىڭ قارىشتاپ دامۋى سىزدەرگە, ياعني جاستارعا تىكەلەي بايلانىستى ەكەندىگىنە سەنىمدىمىن. سانالى دا ساپالى, ءبىلىمدى دە بەلسەندى جاستارى بار ەلدىڭ بولاشاعى قاشاندا زور, ەڭسەسى قاشاندا بيىك بولماق. مەن سىزدەرگە جاس مەملەكەتىمىزدىڭ دامۋىنا ۇلەس قوسىپ جۇرگەندەرىڭىز ءۇشىن العىسىمدى ءبىلدىرىپ, بولاشاقتا ءوز سالاسىنىڭ ناعىز مايتالماندارى بولۋلارىڭىزعا تىلەكتەسپىن”, دەلىنگەن.
سونىمەن قاتار قۇتتىقتاۋ حاتتا مۇنداي فورۋمدار ناتيجەسىندە جاس جۋرناليستەر كاسىبي تۇرعىدان جاڭا دەڭگەيگە وسەتىندىگى, بۇل ورايدا مەملەكەت باسشىسى تاراپىنان جاس تولقىنعا جاسالىپ وتىرعان قامقورلىقتىڭ وراسان ەكەندىگى, بۇگىنگى جاڭالىقتاردىڭ جارشىسى بولا بىلگەن جاس تىلشىلەر قاۋىمى قوعام مەن بيلىك اراسىنداعى بەرىك كوپىرگە اينالعاندىعى, سەبەبى, قازىرگى جاھاندانۋ زامانىندا جۋرناليست ماماندىعى جوعارى كاسىبي بىلىكتىلىك پەن ساياسي ساۋاتتىلىقتى تالاپ ەتەتىن اسا جاۋاپتى ماماندىق ەكەندىگى دە اتاپ كورسەتىلگەن.
ءبىر اتاپ وتەرلىگى, ءۇش كۇنگە سوزىلعان فورۋم اياسىندا “قازاق باسپاسوزىنىڭ دامۋى”, “تەلەباعدارلامالار مەن جاڭالىقتار سيۋجەتتەرىنىڭ بۇگىنگى ساپاسى قاي دەڭگەيدە؟”, “قازاق تىلىندەگى ينتەرنەت رەسۋرستارىنىڭ دامۋى” اتتى تاقىرىپتار بويىنشا سەمينارلار ۇيىمداستىرىلىپ, فورۋمعا قاتىسۋشىلار اتالعان ماسەلەلەر جونىندە ءوز وي-پايىمدارىن تالقى تارازىسىنا سالدى.
ءلايلا ەدىلقىزى.