پرەمەر-مينيستر كارىم ءماسىموۆتىڭ توراعالىعىمەن وتكەن كەشەگى ۇكىمەت وتىرىسىندا ەلىمىزدەگى دەنساۋلىق ساقتاۋ ءىسىن دامىتۋدىڭ 2011-2015 جىلدارعا ارنالعان “سالاماتتى قازاقستان” مەملەكەتتىك باعدارلاماسىنىڭ جوباسى قارالدى.
وسى ماسەلە جونىندە بايانداما جاساعان دەنساۋلىق ساقتاۋ ءمينيسترى جاقسىلىق دوسقاليەۆتىڭ ايتۋىنشا سالا بويىنشا وسى ۋاقىتقا دەيىن جۇمىس ىستەپ كەلگەن 2005-2010 جىلدارعا ارنالعان مەملەكەتتىك باعدارلاما ءوزىنىڭ اياقتالۋ ساتىسىندا تۇر. ول بويىنشا ەلىمىزدە ءبىرقاتار جۇمىستار جۇزەگە استى. ءدارى-دارمەكتەردى جەتكىزۋدىڭ بىرىڭعاي ديستريبيۋتەرلىك جۇيەسى قۇرىلدى. مەديتسينالىق-سانيتارلىق العاشقى كومەكتى بەرۋ ءىسى باسىمدىقپەن دامىتىلدى. ەلىمىزدە 59 مەديتسينالىق ءبىلىم نىسانى سالىندى.
ەندى قابىلدانىپ وتىرعان جاڭا باعدارلامادا دەنساۋلىق ساقتاۋ ءىسىن ءتيىمدى ۇيىمداستىرۋ ماسەلەلەرىنە, سونىڭ ىشىندە اۋرۋلاردىڭ الدىن الۋ مەن سالاماتتى ءومىر سالتىن قالىپتاستىرۋ جونىندەگى ءىس-شارالارعا ايرىقشا نازار اۋدارىلعان. باعدارلاما التى باعىتتى قامتىپ وتىر.
ءبىرىنشى باعىت بويىنشا سەكتورارالىق جانە ۆەدومستۆوارالىق ءىس-قيمىلدىڭ تيىمدىلىگىن ارتتىرۋ كوزدەلەدى. ياعني دەنساۋلىق ساقتاۋ ىسىنە قاتىسى بار سالالاردىڭ بارلىعى ءوز جۇمىستارىن بىرلەسىپ جۇرگىزۋگە ءمان بەرەتىن بولادى.
ەكىنشى باعىت بويىنشا نەگىزگى الەۋمەتتىك اۋرۋلار (ينفاركت, ينسۋلت, قانت ديابەتى, تۋبەركۋلەز جانە باسقالار) بويىنشا الدىن الۋ شارالارى بارىنشا كۇشەيتىلەدى.
ءۇشىنشى باعىت سانيتارلىق-ەپيدەميولوگيالىق قىزمەتتى جەتىلدىرۋگە, اتاپ ايتقاندا سۋىق تيۋ اۋرۋلارى مەن وكپە قابىنۋىن تۋىنداتاتىن ينفەكتسيالاردان بالالاردى ساقتاۋ ءۇشىن الدىن الا ەگۋ جۇمىستارىن جۇرگىزۋ, وتاندىق مەديتسينالىق يممۋندىق-بيولوگيالىق ءدارى-ءدارمەكتەردى ءوندىرۋ ماقساتىن كوزدەيدى.
ءتورتىنشى باعىت بويىنشا ءبىرىڭعاي ۇلتتىق دەنساۋلىق ساقتاۋ جۇيەسىندەگى مەديتسينالىق كومەكتى ۇيىمداستىرۋدى باسقارۋدى جانە قارجىلاندىرۋدى ودان ءارى جەتىلدىرۋ ماسەلەلەرى قامتىلىپ وتىر. وسى ءۇشىن مەديتسينالىق قىزمەتكەرلەردىڭ الەۋمەتتىك جاعدايلارىن جاقسارتۋعا, جاس ماماندارعا ءتۇرلى جەڭىلدىكتەر بەرۋگە, كولىك مەديتسيناسىن, سونىڭ ىشىندە اۆياتسيالىق مەديتسينانى دامىتۋ ىسىنە ءمان بەرىلمەك.
بەسىنشى باعىت مەديتسينالىق, فارماتسەۆتيكالىق ءبىلىم بەرۋدى جەتىلدىرۋ جونىندەگى شارالاردى, مەديتسيناداعى يننوۆاتسيالىق تەحنولوگيالاردى دامىتۋ مەن ەنگىزۋدى, مەديتسينالىق قىزمەتكەرلەردىڭ بىلىكتىلىگىن ارتتىرۋدى قامتيدى.
ال التىنشى باعىت بويىنشا حالىق ءۇشىن ءدارى-دارمەكتەردىڭ قولجەتىمدى ءارى ساپالى بولۋى كوزدەلەدى.
باعدارلامانىڭ ەلەۋلى جەتىستىگى رەتىندە ۇلتتىق مەديتسينالىق حولدينگتىڭ قۇرىلۋىن ايتۋعا بولادى. سونىمەن قاتار ەندىگى كەزەكتە حالىققا دارىگەردى, ەمحانالاردى ءوز ەركىمەن تاڭداۋ قۇقىعىن بەرە وتىرىپ, مەديتسينالىق مەكەمەلەر اراسىنداعى باسەكەلەستىكتىڭ ارتۋىنا كوپ كوڭىل بولىنۋدە.
باعدارلامانىڭ جالپى قۇنى 445 ميلليارد تەڭگەدەن استام سومانى قۇرايدى. بۇل باعدارلامانى ازىرلەۋ بارىسىندا جەرگىلىكتى جەرلەردە ءبىرقاتار جيىندار ۇيىمداستىرىلىپ, دەنساۋلىق ساقتاۋ قىزمەتكەرلەرىنىڭ, قوعام وكىلدەرىنىڭ پىكىرلەرى, ۇسىنىستارى ەسكەرىلگەن. گازەتتەردە كوپتەگەن ماقالالار جاريالانعان.
سونداي-اق ۇكىمەت وتىرىسىندا شىعىپ سويلەگەن پاۆلودار قالاسىنداعى ەكىنشى قالالىق اۋرۋحانانىڭ باس دارىگەرى وراز مۇقاشەۆ, الماتى وبلىسى, پانفيلوۆ اۋداندىق اۋرۋحاناسىنىڭ باس دارىگەرى تولەۋ سارپەكوۆ, دەنساۋلىق ساقتاۋ قىزمەتكەرلەرى اسسوتسياتسياسىنىڭ باسشىسى ايجان سىدىقوۆا جانە باسقالار جاڭا باعدارلامانىڭ ءتيىمدى جاقتارى كوپ ەكەندىگىن ايتىپ, وعان مىسالدار كەلتىرە وتىرىپ, قولداپ سويلەدى.
مادەنيەت ءمينيسترى مۇحتار قۇل-مۇحاممەد جاقسىلىق دوسقاليەۆتىڭ ءوز بايانداماسىن مەملەكەتتىك تىلدە جانە جۇيەلى جاساعاندىعىنا ريزاشىلىعىن بىلدىرە كەلە, وڭىرلەردەن كەلگەن مەديتسينا مەكەمەلەرىنىڭ باسشىلارىنىڭ كوپشىلىگى وسى تىلدە ءبىر اۋىز ءسوز ايتا الماعاندىعىن سىنعا الدى. باعدارلاماعا قولداۋ ءبىلدىردى.
تالقىلاۋدى قورىتىندىلاعان ۇكىمەت باسشىسى كارىم ءماسىموۆ بۇل باعدارلاما ۇكىمەت مۇشەلەرىنىڭ داۋىس بەرۋ جاعدايىندا قولداۋعا يە بولعاندىعىن ايتا كەلە, ەندى ونىڭ مەملەكەت باسشىسىنىڭ قاراۋىنا ۇسىنىلاتىندىعىن جەتكىزدى.
سۇڭعات ءالىپباي.