قوعامنىڭ قاي سالاسىن الىپ قاراساق تا جىگەرلى, ىنتالى, ومىرگە دەگەن كوزقاراستارىن سان ءتۇرلى جولدارمەن جەتكىزە بىلەتىن جاس تولقىننىڭ ءوسىپ كەلە جاتقانىنا كۋا بولاسىز. ولاي بولۋى زاڭدى دا. ءومىر بولعان سوڭ, تولقىندى تولقىن باسۋى ءتيىس ەمەس پە!
سۋرەت ونەرى – ادامنىڭ ىشكى جان دۇنيەسىن سۇيسىندىرەتىن, ءومىردىڭ قىزىعى مەن قيىندىعىن, قۋانىشى مەن قايعىسىن ءتۇرلى بوياۋلارمەن بەينەلەگەندە ەرەكشە ءبىر شاتتىق سىيلايتىن ونەردىڭ ءبىر ءتۇرى. بۇل سالادا دا بولاشاقتا اتاقتى قىلقالام شەبەرلەرى بولۋعا لايىق تالانتتى جاس ورەندەر ءوسىپ كەلە جاتقانىن سەنبى كۇنى ەلورداداعى “سارىارقا” ساۋدا ورتالىعىندا اشىلعان “جاس ونەر” اتتى كورمەدەن كۋا بولىپ قايتتىق.
جاس سۋرەتشىلەر مەن مۇسىنشىلەردىڭ بۇل العاشقى كورمەسىن ۇيىمداستىرۋعا مادەنيەت مينيسترلىگى مەن “التىن كۇن” قوعامدىق قورى مۇرىندىق بولعان. كورمەگە ەلىمىزدىڭ ءار وڭىرىنەن كەلگەن بەينەلەۋ ونەرىنە ىنتاسى جوعارى قىلقالام شەبەرلەرەنىڭ 100-گە جۋىق تۋىندىلارى قويىلعان. كەنەپ, مايلى بوياۋ, تەرىلەردى پايدالانعان جاس سۋرەتشىلەردىڭ قىلقالامدارىمەن سومداعان تاقىرىپتارى سان-الۋان. حالقىمىزدىڭ سالت-ءداستۇرى مەن ەلوردانىڭ جاڭارعان ءومىر تىنىسى, تابيعات كورىنىستەرى, ابستراكتىلى قيال-عاجايىپ وي جەتىستىكتەرىنەن بەينەلەنگەن كورىنىستەر كورمەگە كەلۋشىلەردىڭ جانىن ءبىر جادىراتقانداي بولدى.
“بۇگىنگى جاس سۋرەتشىلەردىڭ جەتىستىكتەرى ەرەكشە. مىنەكەي, ءار ستيلدە بىرنەشە جۇمىس قويىلىپ وتىر. استانادا تۇڭعىش رەت ۇيىمداستىرىلعان مۇنداي كورمە بولاشاقتا دا ءوز جالعاسىن تاباتىنىنا سەنىمدىمىن” – دەگەن استانا قالالىق سۋرەتشىلەر وداعىنىڭ باسقارما توراعاسى قوڭىر مۇحامەديەۆ كورمەنىڭ اشىلۋ سالتاناتىندا جاس سۋرەتشىلەردىڭ ەڭبەكتەرىن جوعارى باعالاپ, سونداي-اق ءوزىنىڭ اعالىق اقىل-كەڭەستەرىن دە جاس سۋرەتشىلەرگە ارنادى.
كورمەگە ءار سۋرەتشىدەن كەم دەگەندە 3 تۋىندى قويىلعان. بۇل سۋرەتتەردىڭ ساتىلۋ باعاسى دا ءارتۇرلى. 18 مىڭ تەڭگەدەن باستاپ 2 مىڭ اقش دوللارىنا دەيىنگى كوركەم تۋىندىنى وسى كورمەدەن كەزدەستىرە الاسىز.
شارا سوڭىندا جاس ونەرپازدارعا استانا قالاسى جاس سۋرەتشىلەر وداعىنىڭ بيلەتتەرى ۇلەستىرىلدى.
اراي ۇيرەنىشبەكقىزى.