كەشە سەنات توراعاسى قاسىم-جومارت توقاەۆ ساۋد ارابياسى كورولدىگىنىڭ قازاقستانداعى توتەنشە جانە وكىلەتتى ەلشىسى حيشام ابدەل ۋاححاب زاراانى ونىڭ ءبىزدىڭ ەلىمىزدەگى قىزمەتىنىڭ اياقتالۋىنا بايلانىستى قابىلدادى, دەپ حابارلادى سەناتتىڭ ءباسپاسوز قىزمەتى.
قاسيەتتى ورازا ايىنىڭ باستالۋىمەن قۇتتىقتاي وتىرىپ, ءجۇزدەسۋشىلەر ەكى ەل اراسىنداعى ەكونوميكالىق جانە مادەني سالالارداعى, سونداي-اق كوپ سالالى ىنتىماقتاستىقتىڭ جوعارى دەڭگەيىن جانە ونىڭ تابىستى دامىپ كەلە جاتقانىن قاناعاتتانعاندىقپەن اتاپ ءوتتى.
– قازاقستان ساۋد ارابياسى كورولدىگىمەن دوستىق قاتىناستى جانە كوپ سالالى بايلانىستاردى تەرەڭدەتۋگە ەرەكشە نازار اۋدارىپ كەلەدى. بۇگىن ەر-رياد استانانىڭ حالىقارالىق ارەنا مەن تاياۋ شىعىستاعى ماڭىزدى ارىپتەسى بولىپ تابىلادى, – دەدى ق.توقاەۆ.
حيشام ابدەل ۋاححاب زاراا قازاقستاننىڭ ەكونوميكالىق جانە سىرتقى ساياسي جەتىستىكتەرى مەن حالىقارالىق ارەناداعى ارتىپ كەلە جاتقان ءرولىن جوعارى باعالادى جانە ءبىزدىڭ ەلىمىزدىڭ 2011 جىلى يسلام كونفەرەنتسياسى ۇيىمىنا توراعالىق ەتۋى تابىستى وتەتىنىنە سەنىم ءبىلدىردى. ەلشى ساۋد ارابياسى اش-شۋرا ءماجىلىسى (كونسۋلتاتيۆتىك كەڭەس) توراعاسىنىڭ ەر-ريادقا رەسمي ساپارمەن كەلۋگە شاقىرۋىن ق.توقاەۆقا تابىس ەتتى.
كەزدەسۋ سوڭىندا ق.توقاەۆ قازاقستان مەن ساۋد ارابياسى اراسىنداعى ەكىجاقتى قارىم-قاتىناستاردى دامىتۋعا قوسقان جەكە ۇلەسى ءۇشىن ديپلوماتيالىق ميسسيا باسشىسىنا العىس ايتتى جانە كاسىبي قىزمەتىندە تابىستى بولا بەرۋگە تىلەكتەستىگىن ءبىلدىردى.