ەرتەڭ — سپورت كۇنى

قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ سپورت كۇنىنە ارنالعان قۇتتىقتاۋى

قادىرلى وتانداستار!

بارشاڭىزدى قازاقستان رەسپۋبليكاسىنىڭ سپورت كۇنى مەرەكەسىمەن قۇتتىقتايمىن! حالقىمىز ەجەلدەن دەنساۋلىقتىڭ قادىرىن جەتە ءتۇسىنىپ, ونى باستى بايلىققا بالاعان. وسى قاعيدانى بەرىك ۇستانعان مەملەكەتىمىز ەل حالقىنىڭ ويى سەرگەك, دەنى ساۋ بولۋى ءۇشىن قولدا بار مۇمكىندىكتىڭ ءبارىن جاساۋدا. دەنى ساۋ ۇلت باسەكەگە قابىلەتتى بولادى. سوندىقتان سپورتتىڭ بۇقارالىق سيپاتىن دامىتۋ – مەملەكەتىمىزدىڭ ستراتەگيالىق باسىم باعىتتارىنىڭ ءبىرى. بيىلعى جولداۋدا 2020 جىلعا دەيىن قازاقستان حالقىنىڭ وتىز پايىزىن بۇقارالىق سپورتقا تارتۋ تۋرالى ايتىلدى. سپورت – ەلدىڭ مەرەيىن اسىرىپ, ابىرويىن تاسىتاتىن سالا. تاۋەلسىزدىك جىلدارى ەل سپورتشىلارى حالىقارالىق ءىرى جارىستاردا توپ جارىپ, كوك بايراعىمىز اسقاقتاي تۇسۋدە. كەلەسى جىلى ەلىمىزدە قىسقى ازيا ويىندارى وتەدى. بۇل قازاقستان سپورتىنىڭ الەمدىك دەڭگەيدە دامىعانىن كورسەتەدى. مەرەكەلەرىڭىز قۇتتى بولسىن! دەندەرىڭىزگە ساۋلىق تىلەيمىن! قازاق ەلىنىڭ سپورت سالاسىنداعى جەتىستىكتەرى مەن تابىستارى ارتا بەرسىن! نۇرسۇلتان نازارباەۆ. __________

بۇقارالىق سپورتتىڭ بەرەرى مول

ومىردە ادامنىڭ دەنساۋلىعىن جاقسارتىپ, ونىڭ جاسىن ۇزارتاتىن, كوڭىلىن ءوسىرىپ, اينالاسىنا سۇيكىمدى دە سىمباتتى, شىدامدى دا جىگەرلى, جيناقى جۇرۋىنە سەپتەسەتىن قۇدىرەتتى كۇش بولاتىن بولسا, ول – دەنە تاربيەسى مەن سپورت. بۇگىندە ەلىمىزدە ادام ءۇشىن وسىن­شاما ماڭىزعا يە سپورتتى دامىتۋعا بارلىق جاعدايدىڭ جاسالىپ جاتقانى بەلگىلى. اسىرەسە, سوڭعى 10 جىلدىڭ بەدەرىندە مەملەكەت تاراپىنان قولداۋعا يە بولىپ وتىرعان دەنە تاربيەسى مەن سپورت سياقتى سالالاردى دامىتۋعا قولدا بار جاعدايدىڭ ءبارى جاسالىپ جاتقانىن اتاپ وتپەسە بولمايدى. بۇعان دالەل رەتىندە ەلىمىزدىڭ ءار تۇكپىرىندە كوپتەپ سا­لىنىپ جاتقان سپورت نىساندارىن, كۇندەلىكتى ومىردە حالىقتىڭ سالاماتتى ءومىر سال­تى­نا دەن قويىپ وتىرعانىن ايتۋعا بولادى. بىراق كەي كەزدە ىستەلىنىپ جاتقان جۇ­مىس­تاردىڭ كوزگە كورىنبەيتىنى دە جاسىرىن ەمەس. سوندىقتان ءبىز تۋريزم جانە سپورت ۆيتسە-ءمينيسترى تالعات ەرمەگياەۆپەن كەزدەسىپ, ەلىمىزدە بۇقارالىق سپورت پەن دەنە تاربيەسىن ناسيحاتتاۋدا, وسى سالادا مەملەكەت پەن جەكە بيزنەستىڭ ارىپتەستىگىن دامىتۋدا ىستەلىنىپ جاتقان جۇمىستاردى ءبىلۋ ءۇشىن اڭگىمەگە تارتقان ەدىك. – سىزدەن ەڭ الدىمەن مىنا نارسەنى سۇرايىن دەپ ەدىم. سپورت پەن دەنە تاربيەسىنىڭ ادامنىڭ دەنساۋ­­لىعىن ساقتاۋدا, قوعامدا سالاماتتى ءومىر سالتىن قالىپتاستىرۋدا قانشا­لىقتى ماڭىزدى ءرول اتقاراتىنىن بىلەمىز. دەگەنمەن ءوزىڭىز سپورتتىڭ قوعامعا دەگەن پايداسى قانداي ەكەنىن ايتىپ بەرسەڭىز. – ءبىزدىڭ اتا-بابالارىمىز “دەنساۋلىق – ەڭ باستى بايلىق” دەپ ايتقان ەدى عوي. بۇل قازىرگى تەحنولوگيالىق دامۋ كەزەڭىندە دە ءوزىنىڭ ماڭىزدىلىعىن جويعان ەمەس. ءبىز, قازاقتار ەجەلدەن بەرى باسقا حالىقتارعا قاراعاندا جەرگە, دالاعا, تازا اۋاعا جاقىن بولىپ وسكەن حالىقپىز. عالىمدار وسىلاردىڭ ادامنىڭ دەنساۋلىعىنا قانشالىق­تى كۇش-قۋات بەرەتىنىن بۇرىننان دالەلدەپ كەلەدى. ءبىز وسىنداي جەردى قادىر تۇتاتىن, سالاماتتى ءومىر سال­تىن ۇستانعان حالىقتىڭ ۇرپاعىمىز. قازىر وكىنىشكە وراي, كوپشىلىك تەح­نولوگيالىق دامۋدان قالىسپاۋ ءۇشىن دەنە تاربيەسىمەن اينالىسۋدىڭ ورنىنا ينتەللەكتۋالدى جاعىنان جەتىلۋدى كوبىرەك ويلايتىن قالالىق جەرلەردە ءومىر سۇرۋدە. ارينە, ادام­نىڭ ينتەللەكتۋالدى بولۋى دا كە­رەك, بىراق دەنە تاربيەسىن دە ەش­قا­شان ۇمىتپاعان ءجون.  سوندىقتان ەلباسى نۇرسۇلتان نازارباەۆ ءار جىل سايىنعى قازاقستان حالقىنا جولداۋىندا بۇقارالىق سپورتتى دامىتۋعا باسا نازار اۋدارىپ كەلەدى. پرەزيدەنت جولداۋلارىندا دەنى ساۋ ۇلتتى قالىپتاسىرۋ ءۇشىن تۋريزم جانە سپورت مينيسترلىگىنە بىرقاتار مىندەتتەر قويعان بولاتىن. سونىڭ ىشىندە نۇرسۇلتان ءابىش ۇلى ادامدى بالا كەزىنەن باستاپ دەنە تاربيەسىنە باۋلۋ ءۇشىن ونىڭ سپورتپەن اينالىسۋىنا قولدا بار جاعدايدىڭ ءبارىن جاساۋ كەرەكتىگىن ايتتى. – بيىلعى جولداۋدا پرەزيدەنت مينيسترلىككە قانداي ناقتى مىندەتتەر جۇكتەدى؟ – وسى جىلعى جولداۋىندا ەلباسى مينيسترلىك پەن ءتۇرلى دەڭگەيدەگى اكىمدەردىڭ الدىنا بىرىگىپ دەنە تاربيەسى مەن بۇقارالىق سپورتتى دامىتۋ ماقساتىندا سپورت نىساندارىن كوپتەپ سالۋدى, حالىق اراسىندا سالاماتتى ءومىر سالتىن بارىنشا ناسيحاتتاۋدى تاپسىردى. قازىر وسى باعىتتا ايتارلىقتاي جۇ­مىستار ىستەلۋدە. ماسەلەن, ەلىمىزدە بالالار جانە جاسوسپىرىمدەرگە ارنالعان سپورت مەكتەپتەرىنىڭ سانى 425-كە ارتتى. مۇندا قازىر 234 مىڭ ادام سپورتپەن اينالىسۋدا. سونى­مەن بىرگە قازىر رەسپۋبليكادا 4 مىڭنان استام جاستار تاربيەلەيتىن 15 مەكتەپ-ينتەرنات جۇمىس ىستەۋدە. ال سپورت نىساندارىنا كەلسەك, بۇ­گىندە ەلىمىزدە 30 330 سپورت عيما­رات­تارى بار. ول جەرلەردە جىل سايىن 18 مىڭنان استام جارىستار ءوتىپ تۇرادى. دەگەنمەن سپورتتى دامىتۋدا ءالى دە بولسا كوپ جۇمىستار ىستەلىنۋ كەرەك دەپ ويلايمىن. ماسەلەن, اۋ­ىل­­­دىق جەرلەردە, كىشىگىرىم قا­لا­لاردا, كاسىپورىندار مەن ۇيىمداردا جارىستار ءبىر رەتتىك ەمەس, تۇراقتى تۇردە ءوتۋى كەرەك دەپ سانايمىن. – بۇقارالىق سپورتتى دامىتۋ كۇن تارتىبىندە تۇرعان ماسەلە عوي. پرەزيدەنت جولداۋىندا ونى دامىتۋ ءۇشىن حالىقتىڭ 30 پايىزىن سپورتقا تارتۋ ماسەلەسى ايتىلعان ەدى. وسى باعىتتا قانداي جۇمىستار ىستەلىنۋدە؟ – قازىر ەلىمىزدە 16 ميلليونعا جۋىق حالىقتىڭ 2,5 ملن.-ى تۇراقتى تۇردە سپورتپەن اينالىسۋدا. بۇل حا­لىقتىڭ 16 پايىزى. ال دۇنيە ءجۇزىنىڭ ەكونوميكاسى دامىعان ەلدەرىندە بۇل كورسەتكىشتى 30 جانە ودان دا جوعارى پايىزعا ارتتىرۋ ماقسات ەتىلۋدە. ءبىز بولاشاقتا وسى جولعا ءتۇسۋىمىز كەرەك. ياعني, بۇقا­رالىق سپورتتى دامىتۋ دەگەنىمىز الدىمەن ەكونوميكانىڭ دامۋىنا بايلانىستى. ەگەر كويلەگىڭ كوك, ۋايىمىڭ جوق بولسا, ءاربىر ازامات كۇندەلىكتى كۇيبەڭ تىرشىلىكتەن گورى دەنە تاربيەسى مەن سپورتتى ويلاي­تىن بولادى. – بىزدە قاي وبلىستاردا بۇقارا­لىق سپورت جاقسى دامىعان؟ – قاراعاندى, پاۆلودار, ال­ماتى وبلىسى مەن الماتى قا­لا­لارىندا. ەندى كەلەسى جىلى ەلىمىزدە تۇڭعىش رەت قىسقى ازيا ويىندارى وتەدى عوي. وسى ءدۇبىرلى دودادان كەيىن حالىق اراسىندا سالاماتتى ءومىر سالتىنا دەگەن كوزقاراس وزگەرەتىنىنە سەنىمدىمىن. بۇقارالىق سپورتتى دا­مىتۋدىڭ تاعى ءبىر جولى – ەلىمىزدەگى بەلگىلى ازاماتتارعا بايلا­نىستى. ەگەر كوپشىلىكتىڭ كوز الدىندا جۇر­گەن مادەنيەت جانە ونەر قايراتكەرى, ساياساتكەرلەر مەن تابىسقا جەتىپ جاتقان ءىرى بيزنەسمەندەر حالىققا سالاماتتى ءومىر سالتىن ۇستاناتى­نىن كورسەتسە, جۇرتشىلىق ارا­سىن­دا سپورتقا دەگەن قىزىعۋشىلىقتىڭ ارتاتىنى ءسوزسىز. سونىمەن بىرگە باق-تىڭ سپورتتى دامىتۋعا كوپ سەپتىگىن تيگىزەتىنى بەلگىلى. – وكىنىشكە وراي, قازىر بىزدە جاستار اراسىندا ناشاقورلاردىڭ كوبەيىپ, شىلىم تارتۋ مەن ىشىمدىككە سالىنۋشىلاردىڭ ارتىپ بارا جاتقانى جاسىرىن ەمەس. وسى جونىندە نە ايتار ەدىڭىز؟ – ستاتيستيكالىق دەرەكتەرگە قاراعاندا, 18-19 جاستاعى اسكەر قا­تا­رىندا جۇرەتىن كەشەگى مەكتەپ بى­تىرۋشىلەردىڭ كوبى اسكەري قىزمەتكە داي­ىن بولماي شىعادى ەكەن. دەگەنمەن مەدالدىڭ دا ەكى جاعى بار دەگەندەي, قازىر ەلىمىزدە فۋتبول, ۆا­لەيبول, باسكەتبول, سۋعا ءجۇزۋ, تەن­نيس سياقتى سپورت تۇرلەرىمەن اي­نالىسۋشىلار كوبەيۋدە. ال ءوزىمىزدىڭ ءتول سپورتىمىز – قازاق كۇرەسى مەن سامبودان وتەتىن ەل بىرىنشىلىگىنە جاس­تار عانا ەمەس, ارداگەرلەر دە قاتىسۋدا. ال زياتكەرلىك ويىندار ساناتىنا جاتاتىن توعىزقۇمالاقتان بيىلعى جىلدىڭ قاراشا ايىندا استانادا العاش رەت الەم چەمپيو­ناتى وتەدى. بۇل دا ءبىزدىڭ سپورتتاعى جەتىستىگىمىز. – سوڭعى كەزدەرى ۆەدومستۆو­ارالىق سپارتاكيادالار مەن جاستار اراسىندا اۋىل ويىندارى, حالىق ويىندارىن وتكىزۋ داستۇرگە اينالىپ كەلەدى. سونىڭ قازىر قانداي ناتيجە بەرىپ جاتقانىن ايتىپ كەتسەڭىز. – حالىق ويىندارى ۇلتتىق سپورت تۇرلەرىن دامىتىپ, سالاماتتى ءومىر سالتىن ناسيحاتتاۋ ماقساتىندا وتكىزىلىپ كەلەدى. بيىلعى شىلدە ايىندا باتىس قازاقستان وبلىسىندا كەزەكتى مارتە وتكەن حالىق ويىن­دارى الدىمەن ۇجىمارالىق, ودان كەيىن اۋداندىق جانە قالالىق, وب­لىستىڭ دەڭگەيدە لايىقتى ءوتتى. ال جاستار ويىندارىنا كەلسەك, وعان 1300 اۋىل جاستارى قاتىستى. پرەزيدەنتتىك تەست دەگەن دە جاقسى جارىس ءتۇرى. وعان جىل سايىن 2,5 ملن. استام ادام قاتىسىپ وتىرادى. بيىل ەلىمىزدە العاش رەت وليمپيا­لىق جۇگىرۋ كۇنى لايىقتى اتالىپ ءوتتى. وعان 459 مىڭ ادام قاتىستى. ال ۆەدومستۆوارالىق سپارتاكيادا باق, كەدەن, سوت, دەنساۋلىق ساقتاۋ ۇيىمدارى اراسىندا سپورتتىڭ بىرنەشە تۇرىنەن ءوتىپ تۇرادى. ال وسى جەكسەنبى كۇنى سپورت كۇنىنە بايلانىستى استانادا ەكى شاقى­رىم­عا ارنالعان پرەزيدەنتتىك شاقىرىم مەن باق وكىلدەرى اراسىندا سپورتتىڭ بىرنەشە تۇرىنەن جارىستار وتەدى. جۇگىرۋ جارىسىنا 5 مىڭنان استام ادام قاتىسادى دەپ كۇتىلۋدە. ەندى ءسوز سوڭىندا بارشا وتانداستا­رى­مىزدى جەكسەنبى كۇنى بولاتىن سپورت كۇنىمەن قۇتتىقتاي وتىرىپ, دەن­ساۋلىق, وتباسىنا باقىت, جۇمىس­تارىنا تابىس تىلەگىم كەلەدى. – اڭگىمەڭىزگە راحمەت. اڭگىمەلەسكەن داستان كەنجالين.

* * *

ۆەلوسپورت

“استانا” جانكۇيەرلەرىن قۋانتا بەرمەك

جاقىندا قازاق­ستان ۆەلوسپورت فەدە­را­تسياسىنىڭ پرەزي­دەنتى, “سامۇرىق-قا­زىنا” ۇاق باسقار­ما­سىنىڭ توراعاسى قاي­رات كەلىمبەتوۆ ەلى­مىزدە سپورتتى دا­مى­تۋ جانە “استانا” ۆە­لو­كلۋ­بىنا ءارى قاراي قول­­داۋ كورسەتۋدە ىستە­لىنىپ جاتقان جۇمىس­تار جونىندەگى ويلارى­مەن ءبولىستى. قور توراعاسى الدىمەن “استانا” ۆەلوكلۋبىنا قاتىستى مالىمەتتەر كەلتىرىپ, ونىڭ برەندىن قۇرۋ يدەيا­سىنىڭ اۆتورى ەلباسى ن.نازارباەۆ ەكەنىن, پرەزيدەنت وسىدان بىرنەشە جىل بۇرىن جارىستار مەن تۋرلارعا قاتىسۋ ءۇشىن حالىقارالىق كوماندا قۇرۋ جونىندە تاپسىرما بەرگەنىن اتاپ ايتتى. “قازىرگى كەزدە, – دەدى ول – الەمدە تۋر دە فرانس, دجيرو دي يتاليا, ۆۋەلتا سياقتى بايگەلەردىڭ باسىن قوساتىن ۆەلوسپورت جارىس­تارى بار. وسى سىندارعا قاتىسۋ ءۇشىن وسىدان بىرنەشە جىل بۇرىن سول كەزدەگى ۆەلوسپورت فەدەراتسياسىنىڭ پرەزيدەنتى دانيال احمەتوۆ “استانا” كومانداسىن قۇرعان بولاتىن. ول كەزەڭ ءساتتى بولىپ, كوماندا 3 تۋردىڭ جەڭىمپازى اتاندى. “استانا” كومان­داسىنىڭ ساپىندا تۋر دە فرانستىڭ بيىلعى جەڭىمپازى البەرتو كون­­تادور سول كەزدە وسى بايگەلەردىڭ ءبارىن جەڭىپ, كوماندانىڭ مەرەيىن ءوسىردى. بىراق 2008 جىل كوماندا ءۇشىن وڭاي بولعان جوق. قارجىلىق قيىن­دىق, دەمەۋشىلەردىڭ بولماۋى سياقتى ماسەلەلەر شىققان سوڭ ەلباسى “استانا” كومانداسىنا كومەكتەسۋ ءۇشىن “سامۇرىق-قازىنا” قورىنا تاپ­­سىرما بەردى. ءسويتىپ قور ۆەلوكو­ماندانىڭ نەگىزگى دەمەۋشىسىنە اي­نالدى”. وسىدان كەيىن ق.كەلىمبە­توۆ “استانا” جوباسى تەك اسا ءىرى سپورت­تى عانا ەمەس, سونداي-اق ول ەلىمىزدىڭ ءيميدجىن كوتەرەتىن, قا­زاقستاندا سپورتتىڭ وسى ءتۇرىن ناسيحاتتايتىن جوبا ەكەنىن اتاپ ءوتتى. وسى رەتتە ول كونتادوردىڭ بيىلعى تۋر دە فرانس­تەگى جەڭىسى تەك ونىڭ ءوزىنىڭ عانا ەمەس, بۇكىل كوماندانىڭ باعىن­دىرعان بيىك بەلەسى ەكەنىن ەسكەرتتى. ونىڭ ايتۋىنشا, الەكساندر ۆي­نو­كۋروۆتان باستاپ بۇكىل كوماندا استانا دەگەن اتتىڭ ەليسەي الا­ڭىندا قۇرمەت تۇعىرىنىڭ ەڭ بيىك ساتىسىنا كوتەرىلۋىنە كوپ ەڭبەك ءسىڭىردى. وسىعان بايلانىستى ق.كە­لىمبەتوۆ ەندى “استانا” كومانداسى كەلەسى جىلى دا ۆەلوجارىستارعا قا­تىسىپ, تاعى دا جەڭىسكە جەتۋدى ماق­سات ەتىپ وتىرعانىنان حاباردار ەتتى. “قازىر – دەدى ول, – ءبىز الەمدەگى ءىرى ۆەلو­شاباندوزدارمەن كەلىسسوز جۇرگىزىپ جاتىرمىز. كونتادوردان وزگە اعاي­ىندى شلەكتەر, سانچەس پەن مەن­شوۆ سياقتى سپورتشىلار بار ەكەنى بەلگىلى. مەنەدجەرلەر كو­مان­داعا كەلۋى ىقتيمال ۇمىتكەرلەرمەن جۇمىس ىستەۋدە. وسى ماۋسىمنىڭ اياعىنا دەيىن كوماندانىڭ قۇرامى بەلگىلى بولادى”. وسى ورايدا ول كە­لەسى جىلى دا كوماندانىڭ وتانداس­تا­رى­مىزدى قۋانتاتىنىنان ءۇمىتتى ەكەنىن ايتتى. سونىمەن بىرگە قور توراعاسى بۇگىندە “سامۇرىق-قازىنا” قورى ۆەلوسپورتتى عانا ەمەس, فۋت­بول, حوك­كەي, تەننيس, ۆولەيبول سياق­تى سپورت تۇرلەرىن دامىتۋعا نازار اۋدارىپ وتىرعانىن, ال ولاردى دامىتۋعا قور دەمەۋشى رەتىندە 100 ملن. اقش دوللارىن بولگەنىن مالىمدەدى. – جالپى, – دەدى ول, – “اس­تانا” كومانداسىنىڭ بيۋدجەتى 13 ملن. ەۋرو شاماسىندا. ءبىز الەمدە ەلىمىزدىڭ برەن­دىن قالىپتاستىرۋدا ەڭبەك ءسىڭى­رىپ كەلە جاتقان كومان­دا­نىڭ مۇشە­لەرىنە قولدان كەلگەن كو­مەكتى بەرۋ­ى­مىز كەرەك. ال باسقا سپورت تۇرلەرىندە پرەزيدەنت نۇرسۇلتان نازارباەۆ “قازاقستان تەمىر جولى” ۇك” اق-تان جولدى توسەۋگە بايلا­­­نىستى اقشا ءبولىپ وتىر. ماسەلەن, حوككەيدى دامىتۋ ءۇشىن 40 مىڭ اقش دوللارى ءبولىنىپ بەرىلسە, باسقا سپورت تۇرلەرى اسا كوپ قارجىنى تالاپ ەتپەيدى. سونىمەن قاتار ونىڭ ايتۋىنشا, قور “استانا” كومانداسىنىڭ 50 پايى­زى وتاندىق سپورتشىلاردان تۇراتىنىن, 3-5 جىل ىشىندە كوماندا ساپىنا جىگىتتەردى جيناۋ جوسپار­لا­نىپ وتىرعانىنان حاباردار ەتتى. ءبىز تەك سان جاعىنا ەمەس, قا­زاقستان سپورتىنىڭ ساپاسىنىڭ ار­تۋى­نا نازار اۋدارامىز, – دەدى ق.كە­لىمبەتوۆ, – ۆەلوتۋردا سپورت­شى­لارىمىزدىڭ بەلگىلى ءبىر كەزەڭ­دەردى عانا ەمەس, جالپى تۋردىڭ جە­ڭىمپاز اتانۋى ءۇشىن جۇمىس ىستەپ قازاق­ستان ءانۇرانىنىڭ ايتىلۋىن قالاي­مىز. سوندىقتان ءبىز ەلدەگى ۆەلو­سپورت­قا مىقتى كوڭىل بولمەكپىز.

* * *

بوكس

شارشى الاڭداعى شايقاستار

جۋىردا وسكەمەندە قازاقستان بوكس فەدەراتسياسىنىڭ كۋبوگى جولىندا ءوتىپ جاتقان ماتچتىق جەكپە-جەكتەردىڭ كەزەكتىسى ءوتتى. بۇل جولى “شىعىس” ديۆيزيونىنا كىرەتىن شىعىس قازاقستان مەن الماتى وبلىستارىنىڭ كوماندالارى كەزدەستى. وسى ايقاستاردى جالپىلاي ايتا­تىن بولساق, ءار سالماقتاردا بوكس­شىلار ءبىر-بىرىنە لايىقتى قارسىلىق تانىتا ءبىلدى. ماردان بەرىكباەۆ, دانابەك سۋجانوۆ, ايدار امىرزاقوۆ, ءمىرجان راقىمجانوۆ سەكىلدى تاج­ى­­ريبەلى بوكسشىلار قار­سىلاستارىن بىردەن سۇلاتا قۇلاتپاسا دا كەزدەسۋ بارىسىندا ايقىن باسىمدىلىق تانىتىپ, ءىرى ەسەپپەن ۇتتى. ەڭ جەڭىل, 49 كيلو سالماقتا ماردان وسكەمەن­دىك ەلدوس امانتاەۆ­تى 10:2 ەسەبىمەن جەڭسە, سوڭعىسىنىڭ جەرلەسى 60 كگ. سال­ماق­تاعى ايدار امىرزاقوۆ رومان شەگ­ري­نوۆتى 7:0, ال شىعىس قازاق­­ستان­نىڭ وكىلى دانابەك سۋجانوۆ 81 كگ. سالماقتاعى كەنجە امانجو­لوۆ­تى 10:0 ەسەبىمەن تىزە بۇكتىردى. وسى ايقاستاردا قىتاي اتىنان بەيجىڭ وليمپياداسىنىڭ قولا جۇلدەگەرى اتانعان, جۋىردا قازاقستاننىڭ ازاماتتىعىن العان قانات ءىسلام ۇلى (75 كگ.) قارسىلاسىن نوكاۋتپەن ۇت­قانىن اتاپ وتكەن ءجون. سول سياقتى ءمىرجان راقىمجانوۆ (56 كگ.) وزىنەن تاجىريبەسى ازداۋ توماز حال­مۇ­را­دوۆتى (الماتى وبلىسى) 10:0 ەسە­بىمەن بەت قاراتپاي ۇتتى. باسقا سالماقتاردا وسكەمەندىك ميراس باي­ىرحانوۆ (69 كگ.), قانا­­عات مارالوۆ (64 كگ.) قارسىلاستا­رىنان باسىم تۇسسە, الماتى وب­لى­سىنىڭ وكىلدەرى اسا اۋىر سالماق­تا­عى داۋلەت مۇ­سا­باەۆ پەن دانيار ۇستەمباەۆ (91 كگ.) ناعىز بابىندا ەكەنىن كورسەتتى. وسى جولعى كەزدەسۋلەردىڭ بىرىندە ەسەپ تەڭ اياقتالدى. 52 كگ. سالماقتا رينات قا­دىروۆ (الماتى وبلىسى) پەن ەلدار نۇرسەيىتوۆ اراسىندا قىزۋ تارتىستى وتكەن ايقاستا ەسەپ 4:4 بولىپ تىركەلدى. ءسويتىپ, قورىتىندى ەسەپ 16:13 بولىپ, كەندى التاي ورەندەرىنىڭ پايداسىنا شەشىلدى. * جاقىندا بوكستان قازاقستان ۇلتتىق قۇراماسى ۇلىبريتانيادا قىتاي, كۋبا جانە الاڭ يەلەرىمەن بىرگە وتكىزگەن وقۋ-جاتتىعۋ جيىنىن اياقتادى. وسى جيىن اياقتالعان سوڭ ۇيىم­داستىرۋشىلار ء“تورت ەلدىڭ ءتۋرني­رى” اتتى شاعىن تۋرنير وتكىزدى. وعان قازاقستان اتىنان 10 بوكسشى قاتىسىپ, سونىڭ تورتەۋى جارتىلاي فينالدا ۇتىلسا, قالعان التاۋى فينالدا قولعاپ ءتۇيىستىردى. مۇندا ميراس جاقىپوۆ (51 كگ.), دانيار تولەگەنوۆ (54 كگ.), ءمادي شولاقوۆ (57 كگ.) جانە نۇرداۋلەت جارمانوۆ (75 كگ.) جارتىلاي فينالدا سۇرىنسە, اقتىق ايقاستا ەڭ جەڭىل, 48 كگ. سالماقتا كۇش سىناسقان ءبىرجان جاقىپ ەكى دۇركىن وليمپيادا چەمپيونى تسزوۋ شيميننەن 9:13 ەسەبىمەن جەڭىلىپ قالدى. سول سەكىلدى 60 كگ. سالماقتاعى سامات باشەنوۆ اعىلشىن توم ستالكەرە 9:10 ەسە­­بىمەن ەسە جىبەرسە, دانيار ەلەۋ­سىنوۆ (64 كگ.) تاعى ءبىر الاڭ يەسى برەدلي سوندەرستەن 3:6 ەسەبىمەن جەڭىلىپ قالدى. سونىمەن بىرگە سەرىك ساپيەۆ (75 كگ.) بريتاندىق گالۋم سميتتەن جەڭىلۋگە ءماجبۇر بولدى. وسى جەكپە-جەككە كۋا بول­عانداردىڭ ايتۋىنشا, سەرىك قارسى­لاسىنان ايقىن باسىم­دىق تانى­تىپ ايقاستى. دەگەنمەن, تورەشىلەر جەڭىستى الاڭ يەسىنىڭ پايداسىنا بۇرىپ جىبەردى. وسىدان كەيىن شارشى الاڭعا كوتەرىلگەن المات سەرىموۆ ەل نامىسىن قورعاپ قالدى. ول بريتاندىق گالۋم دجون­سوندى ءۇشىنشى راۋندتا نوكاۋدقا جىبەرسە, اسا اۋىر سالماقتاعى يۆان دىچكو تاعى ءبىر الاڭ يەسى امين يسانى 7:2 ەسەبىمەن جەڭدى. ءسويتىپ, ەكى التىن, ءتورت كۇمىس جانە ءتورت قولا العان وتانداس­تارىمىز جالپى كوماندالىق ەسەپتە قىتاي مەن كۋبا بوكسشىلارىنان وزىپ, ەكىنشى ورىندى يەلەنىپ قايتتى. * قازاقستان بوكس فەدەراتسيا­سىنىڭ قولداۋ كورسەتۋىمەن جاڭادان قۇرىلعان “استانا ارلاندارى” كاسىپقوي بوكسشىلار كلۋبىنا ەكى لەگيونەر قوسىلدى. ەندى كاسىپقوي بوكستان WSB تۇجىرىمى بويىنشا قازاقستان ۇلتتىق قۇراما كومانداسى ساپىندا اسا اۋىر سالماقتاعى ۆەنگريالىق يشتۆان بەرنست پەن سەرب ميلۋتين ستانكوۆيچ ونەر كورسەتەتىن بولادى. الداعى ۋاقىتتا ولاردىڭ قاتارىنا تاعى دا بوكسشىلار قوسىلادى. “اس­تانا ارلاندارى” كلۋبىنىڭ باس دي­رەكتورى بولات مانكەنوۆتىڭ ايتۋ­ىنشا, قوس سپورتشىمەن جاسالعان كە­لىسىم-شارتقا سايكەس, ولار قا­زاقستاندى ءوز ۇيىندەي كورىپ, وسىندا حالىقارالىق جارىستاردان تەك جەڭىمپاز اتانىپ كەلۋ ءۇشىن بارلىق جاعدايدى جاسايتىن بولادى. * قازاقستان بوكس فەدەراتسيا­سىنىڭ ەرلەر, جاستار جانە جاسوس­پىرىمدەر ۇلتتىق قۇراماسىنىڭ جۇمىسىن ۇيلەستىرۋشى, مەملەكەتتىك باپكەر بولات ابدراحمانوۆ تاياۋدا ءاىۆا-نىڭ قازاقستان اتىنان سايلانعان تۇڭعىش تەحنيكالىق دەلەگاتى اتاندى. حالىقارالىق اۋەسقوي بوكس فەدە­راتسياسىنىڭ شتاب-پاتەرى ورنالاسقان لوزاننا قالاسىنان جى­بە­رىل­گەن تەلەگراممادا اتالمىش ۇيىمنىڭ اتقارۋشى ديرەكتورى حو كيم بوكس مامانىنا جۋىق ارادا تەحنيكالىق دەلەگات اتاعىن بەرۋ جونىندە سەرتي­فيكاتى تاپسىرىلا­تى­نىن جەتكىزدى. داستان كەنجالين.