قىزىلوردا قالاسىندا مادەنيەت مينيسترلىگىنىڭ ءتىل كوميتەتى مەن وبلىس اكىمدىگىنىڭ ۇيىمداستىرۋىمەن “تىلدەردى قولدانۋ مەن دامىتۋدىڭ 2011-2020 جىلدارعا ارنالعان باعدارلاماسىنىڭ” جوباسىن تالقىلاۋعا ارنالعان دوڭگەلەك ۇستەل وتكىزىلىپ, وعان سان الۋان سالاداعى ءتىل جاناشىرلارى قاتىستى.
ءتىل جاناشىرلارىنىڭ باسقوسۋىن قالا اكىمى م.جايىمبەتوۆ كىرىسپە سوزبەن اشىپ, سىر ايماعىنداعى مەملەكەتتىك ءتىلدىڭ احۋالى ەلىمىزدىڭ وزگە ايماقتارىنا قاراعاندا الدەقايدا ءتاۋىر ەكەندىگىن باسا ايتتى. مۇنان سوڭ مادەنيەت مينيسترلىگى ءتىل كوميتەتىنىڭ توراعاسى باۋىرجان وماروۆ پەن استانا قالاسىنداعى تىلدەردى دامىتۋ باسقارماسى “رۋحانيات” ورتالىعىنىڭ ديرەكتورى ەربول تىلەشوۆ جاڭا باعدارلاماعا ەگجەي-تەگجەيلى توقتالىپ, بۇگىنگى تاڭدا وسى باعدارلامانى جۇزەگە اسىرۋدا جۇرگىزىپ جاتىرعان جۇمىستارعا توقتالدى. ءتىل جاناشىرلارىن وسى باعدارلاماعا بايلانىستى ۇسىنىس-پىكىرلەرىن بوياماسىز بايان ەتۋگە شاقىرىپ, ولاردىڭ ۇسىنىستارى باعدارلاماعا وزگەرتۋلەر مەن تولىقتىرۋلار ەنگىزىلەتىن كەزىندە ەسكەرىلەتىندىگىن ەسكەرتتى.
باعدارلامانى تالقىلاۋدا العاشقى بولىپ ءسوز العان قورقىت اتا اتىنداعى مەملەكەتتىك ۋنيۆەرسيتەتىنىڭ ۇستاز-عالىمى, فيليولوگيا عىلىمدارىنىڭ دوكتورى جەڭىس سادۋاقاس ۇلى جوباداعى “ورىس ءتىلىنىڭ بۇرىنعى فۋنكتسياسىن (قىزمەتىن) ساقتاي تۇرۋعا” دەگەن بايلامعا تۇسىنبەگەنىن, مۇنىڭ ءوزى قازاق ءتىلىمەن جاعالاسۋعا اپارىپ سوقتىرماي ما دەگەن ويىن ايتىپ, مەملەكەتتىك ءتىل جونىندە ۇبت قابىلداۋ عانا ەمەس, قايتا تالاپكەرلەردى اۋىزشا سويلەتۋ, شىعارما جازدىرۋدى قولعا الۋ جايلى ۇسىنىسىن ءبىلدىردى. ال, وسى ۋنيۆەرسيتەتتىڭ جانىنداعى قورقىتتانۋ عىلىمي-زەرتتەۋ ينستيتۋتىنىڭ ديرەكتورى باعدات كارىبوز ۇلى قازاق ءتىلى ءپانىنىڭ پراكتيكالىق وقۋىن بارلىق وقۋ ورىندارىنا ەنگىزۋ, مەملەكەتتىك ءتىل تۋرالى زاڭ قابىلداۋ قاجەتتىگىن باسا ايتتى.
ال وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى اسىلبەك جۇماباەۆ, “وزبەك” ەتنومادەني بىرلەستىنىگىڭ توراعاسى اشۋر حاميدوۆ, “قوعام تد” تەلەارناسىنىڭ ءتىلشىسى ەلەنا رىبينالار سىر ايماعىندا وزگە ۇلت وكىلدەرىنىڭ باسىم بولىگى مەملەكەتتىك ءتىلدى مەڭگەرگەندىكتەرىن ماقتانىشپەن ايتىپ, ء“وز وتانىڭنىڭ تىلىندە سويلەۋ – ازاماتتىق پارىزىمىز. قازاقستان رەسپۋبليكاسىنىڭ ازاماتى بولىپ تىركەلدى ەكەنسىڭ – مەملەكەتتىك ءتىلدى مەڭگەرۋ مىندەت” دەپ ويلارىن تۇيىندەدى.
دوڭگەلەك ۇستەلدە “مەملەكەتتىك ءتىل قوزعالىسى” وبلىستىق فيليالىنىڭ توراعاسى ش.ابدىكارىموۆ, جۋرناليست ا.ساقىپ ۇلى, ءتىل جاناشىرى ر.ابدىرەلەر دە ءوز ويلارىن ورتاعا سالىپ, ۇتىمدى ۇسىنىستارىن ۇكىمەت نازارىنا ۇسىندى.
ەركىن ءابىل. قىزىلوردا.