ەلىمىزدىڭ ساياسي ومىرىندەگى سوڭعى ءبىر-ەكى جىلداعى وڭدى وزگەرىستەرگە الەم جۇرتشىلىعى كوز تىگىپ وتىر. مىنە, جىل باسىنان ەۋروپا تورىندەگى بەدەلدى ۇيىمعا تورەلىك ەتىپ كەلەمىز. ال قارۋسىزدانۋ ءجونىندەگى يگى باستامالارىمىز بىرىككەن ۇلتتار ۇيىمى مەن الەمنىڭ الپاۋىت مەملەكەتتەرى تاراپىنان قىزۋ قولداۋ تابۋدا. سونىڭ ءبىر ايعاعىنداي, بيىلعى كوكتەمدە اقش-تا وتكەن القالى جيىندا ءبىزدىڭ ەلگە, ەلباسىمىزعا ايرىقشا قۇرمەت كورسەتىلگەنى ەسىمىزدە.
ەندى, مىنە الداعى جەلتوقسان ايىنىڭ العاشقى كۇندەرى استانادا ەقىۇ-نىڭ ءسامميتى وتكىزىلمەك. سوعان وراي ەلباسى مالىمدەمەسىندە ايتىلعانداي, ازيا جانە تمد مەملەكەتتەرى اراسىندا تۇڭعىش رەت بەدەلدى ۇيىمنىڭ ءسامميتىن وتكىزۋ قازاق ەلىنىڭ تورتكۇل دۇنيەگە تورەلىك ەتە باستاعانىن ايعاقتاسا كەرەك. ونىڭ ۇستىنە ۇيىمنىڭ سوڭعى ونشاقتى جىلدان بەرى مۇنداي القالى جيىنى وتپەگەن ەكەن. ال مۇنى قالايشا ەلباسىمىزدىڭ دۇنيەجۇزىلىك قوعامداستىق الدىنداعى بەدەلىنىڭ ارقاسى دەمەسسىڭ.
“كورمەس – تۇيەنى دە كورمەس” دەيدى حالقىمىز. قايسىبىرەۋلەردىڭ سونى دا كوزگە ىلمەي, وسىنداي جيىنداردىڭ قاجەتى قانشا دەيتىنى وكىنىشتى-اق. وسىندايدا وندايلاردىڭ جادىنىڭ ناشارلىعىنا ەرىكسىز كۇلەسىڭ. بولماسا كەشەگى كەڭەس زامانىندا بۇۇ-نىڭ مۇشەلىگىنە ىلىگە الماي, ۋكراينا, بەلورۋسسيا سەكىلدى وداقتاس رەسپۋبليكالارعا قىزىعا دا, قىزعانا دا قاراعانىمىزدى نەگە ۇمىتامىز؟ ونى ايتاسىز, ءوز الدىنا تاۋەلسىز مەملەكەت بولعانعا دەيىن سەمەي اتوم پوليگونىنىڭ استاناسى اتانىپ كەلگەن كۋرچاتوۆ قالاسىنىڭ بوساعاسىنان اتتاۋعا دارمەنىمىز جەتپەگەنى وتىرىك پە ەدى؟
سوندىقتان ەندى كەلىپ باسقا قونا باستاعان باقتى كەيىن تەپپەيىك, اعايىن. ءبىر ءسات ويلانىپ كورەلىكشى. بۇكىل ازيادا, تمد ەلدەرى بويىنشا سوڭعى 20 جىلعا جۋىق ۋاقىت ىشىندە وسىنداي بەدەلگە يە بولىپ وتىرعان ەل بار ما؟ ەگەمەن ەلىمىزدىڭ تۇڭعىش پرەزيدەنتى ەڭ الدىمەن ەكونوميكامىزدى ءبىر جايلى ەتەيىك دەدى. ال ول شەشىمنىڭ دۇرىستىعىن ۋاقىت كورسەتتى. مۇنان كەيىنگى جەردە الەمدىك ساياسي ارەنادا دا بەدەلىمىز كۇرت جوعارىلاي باستادى ەمەس پە!
ەل ومىرىندەگى وسىنداي سونى جاڭالىقتارعا بۇكىل ەل بولىپ قۋانىپ جاتقانىن كوزىمىز كورىپ وتىر. توراعاسى نۇرسۇلتان نازارباەۆ بولىپ تابىلاتىن “نۇر وتان” حالىقتىق-دەموكراتيالىق پارتياسى مۇشەلەرىنىڭ قۋانىشى تىپتەن دە ەرەكشە. الگىندەي ءاربىر جاڭالىقتان سوڭ, پارتيامىزدىڭ بەدەلى ودان سايىن ارتا ءتۇسىپ كەلەدى. سوعان وراي, پارتيامىزدىڭ قاتارىنا وتۋگە تىلەك بىلدىرۋشىلەر دە كوپ.
قالالىق فيليالدىڭ بۇگىنگى تاڭداعى باستى مىندەتتەرىنىڭ ءبىرى – سونداي يگى شارالاردى حالىق اراسىندا كەڭىنەن ناسيحاتتاۋ بولىپ تابىلادى. وسى ماقساتپەن جۇمىسىمىزدى باستاپ تا كەتتىك. قازىرگى جۇمىس ءتۇسىندىرۋ, ناسيحاتتاۋ تۇرعىسىندا ءجۇرىپ جاتسا, ال ودان كەيىنگى جەردە جوسپارلى تۇردە جۇمىس ءىستەيتىن بولامىز. ءبىر سوزبەن ايتقاندا, پارتيا ومىرىندەگى قىزۋ شارالاردان تىس قالۋعا قاقىمىز جوق.
زۋلفيا جامالەتدينوۆا, “نۇر وتان” حالىقتىق-دەموكراتيالىق پارتياسى سەمەي قالالىق بولىمشەسى توراعاسىنىڭ ورىنباسارى.
سەمەي.