كەشە پرەمەر-مينيستر, ديرەكتورلار كەڭەسىنىڭ توراعاسى كارىم ءماسىموۆتىڭ قاتىسۋىمەن “سامۇرىق-قازىنا” قورى باسقارماسىنىڭ كەڭەيتىلگەن وتىرىسى بولىپ ءوتتى.
وتىرىستا ءسوز العان قور باسقارماسىنىڭ توراعاسى قايرات كەلىمبەتوۆ ۇكىمەتتىڭ داعدارىسقا قارسى باعدارلاماسىن جۇزەگە اسىرۋداعى ەڭ بەلسەندى كەزەڭنىڭ 2009 جىلعا سايكەس كەلگەننىن اتاپ ءوتتى. بيىلعى جىلى قور جۇمىسىندا ەكونوميكانى مودەرنيزاتسيالاۋعا ىقپال جاساۋعا جانە قور كومپانيالارىنداعى كورپوراتيۆتىك باسقارۋدى جەتىلدىرۋگە باسىمدىقتار بەرىلىپ وتىر.
ءبىرىنشى باعىت بويىنشا ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسىنداعى جوبالاردى جۇزەگە اسىرۋعا ماڭىزدى ءرول بولىنەدى. وسىلايشا ەلدى يندۋستريالاندىرۋ كارتاسى شەڭبەرىندە 43 ميلليارد اقش دوللارى تۇراتىن جوبالاردى جۇزەگە اسىرۋ جوسپارلانىپ وتىر. وسى قارجىنىڭ 22 ميلليارد دوللارى نەمەسە 50 پايىزدان استامى قوردىڭ ۇلەسىنە تيەسىلى. يندۋستريالاندىرۋ كارتاسىنا قوردىڭ 53 جوباسى ەنىپ وتىر. ولاردىڭ 35-ءى رەسپۋبليكالىق ماڭىزداعى, 18-ءى وڭىرلىك جوبالار بولىپ تابىلادى. جوعارىدا اتالعان 53 جوبانىڭ 32-ءسىن قازاقستاننىڭ دامۋ بانكى ارقىلى جۇزەگە اسىرۋ كوزدەلۋدە. ال قالعان 21-ءى “قازمۇنايگاز”, “قازاقستان تەمىر جولى”, كەگوك, “سامۇرىق-ەنەرگو” سياقتى ەنشىلەس كومپانيالار ارقىلى جۇزەگە اسىرىلاتىن بولادى.
جوبالار بەلگىلەنگەن كەستە بويىنشا جۇزەگە اسۋدا. ءبىرىنشى جارتىجىلدىقتا قور سەگىز جوبا بويىنشا قۇرىلىس-مونتاج جۇمىستارىن جۇزەگە اسىردى. جىل سوڭىنا دەيىن تاعى دا جالپى ينۆەستيتسيالىق كولەمى 13 ميلليارد دوللاردان اساتىن قوسىمشا 8 ينۆەستيتسيالىق جوبالار بويىنشا قۇرىلىس-مونتاج جۇمىستارى باستالاتىن بولادى.
قولعا الىنعان جوبالاردىڭ تۇگەلدەي جۇزەگە اسۋى 8 مىڭنان استام تۇراقتى جۇمىس ورىندارىن اشۋعا جاعداي تۋعىزباق. ال قۇرىلىس بارىسىندا 50 مىڭنان استام ادام جۇمىسقا تارتىلماقشى.
يندۋستريالاندىرۋ كارتاسىنا ەنگەن جوبالاردىڭ جۇزەگە اسۋىن ۇيىمداستىرۋ ءۇشىن قور جانىنان باسقارۋ ورتالىعى قۇرىلدى. بەكىتىلىپ بەرىلگەن بارلىق جوبالار بويىنشا جۇمىس توپتارى جۇمىس ىستەيدى.
ق.كەلىمبەتوۆتىڭ اتاپ وتكەنىندەي, ءبىرىنشى جارتىجىلدىقتاعى قارجىلىق ەسەپتىلىكتىڭ الدىن الا مالىمەتتەرىنە قاراعاندا تازا تابىستىڭ جيىنتىق جوسپارى 12 ءىرى كومپانيالار جانە قوردىڭ كورپوراتيۆتىك ورتالىعى بويىنشا ەكى ەسەگە ارتقان. وسىلايشا قوردىڭ ورتاقتاستىرىلعان تازا تابىسى 2010 جىلدىڭ العاشقى جارتىجىلدىعىنىڭ قورىتىندىسى بويىنشا شامامەن 200 ميلليارد تەڭگە بولماق. قور توراعاسىنىڭ ايتۋىنشا, جىل قورىتىندىسىندا نەگىزگى وندىرىستىك جانە قارجىلىق كورسەتكىشتەر بويىنشا ۇستىمىزدەگى جىلدىڭ جوسپارى تولىق ورىندالاتىن بولادى.
وتىرىستا ءسوز سويلەگەن ۇكىمەت باسشىسى قور الدىنا بىرنەشە ناقتىلى مىندەتتەر بەلگىلەدى.
“ەگەمەن-اقپارات”.