سارسەنبى كۇنى جەر ءجۇزىنىڭ ءبىرقاتار ەلدەرىندە فۋتبولدان جولداستىق كەزدەسۋلەر ءوتتى. سولاردىڭ ءبىرى قازاقستان مەن ومان ۇلتتىق قۇرامالارىنىڭ اراسىندا وينالدى. كەزدەسۋدە ەسەپ 3:1 بولىپ الاڭ يەلەرىنىڭ پايداسىنا شەشىلدى.
قازاقستان قۇراماسى ءدال وسىنداي ەسپپەن سوڭعى رەت ىرىكتەۋ تۋرنيرىندە اندوررا كومانداسىن جەڭگەنىن بىلەمىز. ال وسى جولعى ومانمەن وتكەن ماتچ ەلوردانىڭ حالىقارالىق تالاپتارعا ساي كەلەتىن, دۇنيە ءجۇزىندەگى ەڭ ادەمى بەس ستاديونىنىڭ ءبىرى سانالاتىن “استانا-ارەنا” جابىق ستاديونىندا ءوتتى. كەزدەسۋگە بيىلعى الەم چەمپيوناتىندا كوپشىلىكتىڭ كوزايىمىنا اينالعان وزبەكستاندىق راۆشان يرماتوۆ تورەلىك ەتتى. ەندى ماتچتىڭ وزىنە كەلەر بولساق, قازاقستان مەن ومان جولداستىق كەزدەسۋى بۇقارالىق اقپارات قۇرالدارى مەن استانا كوشەلەرىندەگى بيلبوردتاردا ءبىر اپتا بويى جارنامالاعاننىڭ ارقاسىندا بولار, ستاديونعا ءبىراز جانكۇيەرلەر جيىلدى. وسى جولعى ەل قۇراماسىنىڭ ساپىندا ەكى قانداسىمىز بولسا, سونىڭ ءبىرى نۇربول جۇماسقاليەۆ, ەكىنشىسى ازات نۇرعاليەۆ بولدى. بۇل ەكەۋى دە قوستانايدىڭ “توبىل” كومانداسىنىڭ ويىنشىلارى. ال تاڭات نوسەرباەۆ پەن جامبىل كوكەەۆ سياقتى اياقدوپشىلار بىرەۋى جاراقاتىنا, ەكىنشىسى ويىن ءتاجىريبەسىنىڭ ازدىعىنا بايلانىستى ەل قۇراماسى ساپىنان كورىنبەدى.
وسى ماتچتا ءبىرىنشى گولدى كوماندا كاپيتانى اندرەي كارپوۆيچ سوقتى. ول ويىننىڭ 20-شى ءمينوتىندە سەرگەي وستاپەنكونىڭ جاساعان سوققىسىنان ومان قورعاۋشىسىنىڭ اياعىنا ءتيىپ, كەرى قايتقان دوپتى قاقپا تورىندا تۋلاتتى. ال ەكىنشى دوپتى نۇربول جۇماسقاليەۆ جاسىل الاڭدا قوس ەگىزدىڭ سىڭارىنداي بولىپ جۇرگەن ازات نۇرعاليەۆتىڭ سول قاپتالدان شىعارعان پاسىن باسپەن ادەمى سوعىپ, ومان قاقپاشىسىن تاعى ءبىر رەت جەر قاراتتى. ال ويىننىڭ ەكىنشى جارتىسىندا تاعى دا سول نۇربولدىڭ وڭ قاپتالدان قاقپاعا قاراي تەپكەن دوبىن ومان قورعاۋشىسى ءال-الاۆي توقتاتامىن دەپ ءوزىنىڭ قاقپاسىنا گول سوعىپ الدى. بۇل 62 مينوتتە قازاقستان قۇراماسىنىڭ سوققان ءۇشىنشى گولى بولدى. دەگەنمەن, ومان ويىنشىلارى دا قاراپ وتىرماي, 2 ءمينوت وتكەن سوڭ الاڭ يەلەرىنىڭ قاقپاسىنا الىستان گول سالىپ, ەسەپ ايىرماسىن ەكى دوپقا كەمىتتى. جالپى, ماتچتىڭ قازاقستان قۇراماسىنىڭ باسىمدىعىمەن وتكەنىن اتاپ ءوتۋ ءجون. ءاسىرەسە, نۇربولدىڭ ومان قاقپاسىن ءبىرنەشە رەت كوزدەگەن دوپتارى نىساناعا ءدال تيمەي جاتسا دا, قارسىلاستارىن ءبىراز ابىگەرگە ءتۇسىردى. سول سياقتى كوماندا كاپيتانىنىڭ جەيدەسىن كيگەن اندرەي كارپوۆيچتىڭ دە بارىنشا تەر توككەنىن اتاپ وتۋگە بولادى.
كەزدەسۋ اياقتالعان سوڭ ومان قۇراماسىنىڭ باس باپكەرى, فرانتسۋز مامانى كلود ماري فرانتسۋا لە رۋا وتانداستارىمىزدىڭ ويىنىن باس بارماقپەن باعالايتىنىن ايتتى. دەگەنمەن, ءسوز اراسىندا ول قازاقستانمەن بولعان جولداستىق كەزدەسۋگە نەگىزگى قۇرامادا وينايتىن جەتى اياقدوپ شەبەرىنىڭ كەلە الماعانىن, وسى ويىنعا بار بولعانى 1988-1993 جىلدارى تۋعان جاستاردىڭ قاتىسقانىن جاسىرمادى. شىنىمەن دە ومان قۇراماسىندا انگليانىڭ پرەمەر-ليگاسىندا “ۋيگان” كومانداسىندا ونەر كورسەتەتىن نەگىزگى قاقپاشى ءالي ابدۋلاح ءال-حابسي سياقتى ويىنشىلار بولعان جوق. ال قازاقستان قۇراماسىنىڭ باس باپكەرى بەرند شتورك بولسا, ماتچ اياقتالعان سوڭ ويىنشىلارىنىڭ جاقسى ونەر كورسەتكەنىن, ەندى ولار ەۋروپا چەمپيوناتىنىڭ ىرىكتەۋ تۋرنيرىنە قاتىسۋ ءۇشىن جان-جاقتى دايىندالاتىندارىن, سول باسەكەلەرگە “اقتوبە” مەن باسقا دا كوماندالاردا وينايتىن جىگىتتەردىڭ شاقىرىلاتىنىن اتاپ ءوتتى.
جالپى, وماندى ناشار كوماندا دەسەك, ارتىق ايتقان بولار ەدىك. قازاقستان قۇراماسىمەن ەكىنشى قۇراممەن ويناعان كوماندا قازىر پارسى شىعاناعىنىڭ چەمپيونى بولىپ سانالادى. سونىمەن بىرگە ول 2004, 2007 جىلدارى پارسى شىعاناعى چەمپيوناتىنىڭ كۇمىس جۇلدەگەرى, 2009 جىلى اتالمىش ءوڭىردىڭ كۋبوگىنىڭ يەگەرى بولسا, ازيا كۋبوگىنا 2004, 2007 جىلدارى قاتىسقان.
قازاقستان قۇراماسى ومان كومانداسىن جەڭگەننەن كەيىن فيفا رەيتينگىندە 126-ورىننان 125-ءشى ساتىعا كوتەرىلدى.
داستان كەنجالين.
----------------------------------
سۋرەتتەردى تۇسىرگەن ورىنباي بالمۇرات.