وسى اپتادا استانادا حوككەيدەن قازاقستان پرەزيدەنتى كۋبوگى جولىنداعى حالىقارالىق تۋرنير باستاۋ الدى. ەرتەڭ اياقتالاتىن تۋرنيرگە قازاقستان, لاتۆيا, رەسەي جانە بەلارۋس ەلدەرىنەن “بارىس” (استانا), “دينامو” (ريگا), “اتلانت” ء(ماسكەۋ وبلىسى) مەن “دينامو” (مينسك) كوماندالارى قاتىسۋدا.
كەشەگى ءتۋرنيردىڭ دەمالىس كۇنىن ەسەپتەمەگەندە, كوماندالار العاشقى ەكى كۇندە ەكى كەزدەسۋدەن وتكىزىپ ۇلگەردى. سونىڭ ىشىندە استانانىڭ “بارىس” كلۋبى العاشقى ويىنىن رەسەيلىك “اتلانت” كومانداسىمەن وتكىزىپ, 4:2 ەسەبىمەن جەڭسە, ەكىنشى ويىنىندا ريگانىڭ “دينامو” كومانداسىنان ءدال وسىنداي ەسەپپەن باسىم ءتۇستى. باسقا ويىندارعا كەلسەك, مينسكىنىڭ “ديناموسى” ماسكەۋ وبلىسىنىڭ “اتلانت” كلۋبىن 6:2, لاتۆيانىڭ “دينامو” كومانداسىن 3:2 ەسەبىمەن ۇتتى.
بۇگىن “بارىس” پەن “دينامو” (مينسك) كەزدەسسە, “اتلانت” ريگانىڭ “دينامو” كومانداسىمەن مۇز ايدىنىنا شىعادى. ال ەرتەڭ كورسەتكەن ناتيجەلەرىنە قاراي كوماندالار ءبىرىنشى جانە ءۇشىنشى ورىندار ءۇشىن تالاساتىن بولادى. قازىر وسىلاردىڭ ىشىندە “بارىستىڭ” باسقالارعا قاراعاندا تۋرنيردى جەڭىپ الۋ مۇمكىندىگى كوپ. ەكى ويىندا قاجەتتى ۇپايدى جيناعان استانالىق كوماندانىڭ ەندىگى ناعىز قارسىلاسى مينسكىنىڭ “دينامو” كومانداسى بولاتىنى ءسوزسىز. بۇل كوماندا دا ەكى ويىنىن جەڭىپ, الاڭ يەلەرىمەن يىق تەڭەستىرىپ كەلەدى.
قازاقستان حوككەي فەدەراتسياسىمەن “نۇر وتان” حدپ-نىڭ ۇيىمداستىرۋىمەن ءوتىپ جاتقان ءتۋرنيردىڭ جۇلدە قورى – 3 ملن. تەڭگە نەمەسە 20 مىڭ اقش دوللارى. وسى سوماداعى قارجى ەلىمىزدە العاش رەت حوككەيدەن وتكىزىلىپ جاتقان پرەزيدەنت ن.نازارباەۆتىڭ كۋبوگى جولىنداعى تۋرنيردە باس جۇلدەنى العان كوماندانىڭ قورجىنىنا تۇسەدى.