كەشە “نۇر وتان” حدپ ورتالىق اپپاراتىندا “ەقىۇ-نىڭ داعدارىستان كەيىنگى جۇمىسىن جەتىلدىرۋ باسىمدىقتارى” تاقىرىبىندا سەمينار ءوتتى. سەمينارعا قازاقستانداعى ەقىۇ ورتالىعىنىڭ باسشىلارى, پرەزيدەنت اكىمشىلىگى مەن قازاقستان ءسىم-ءنىڭ ەقىۇ ماسەلەلەرىمەن اينالىساتىن وكىلدەرى, ۇلتتىق جانە حالىقارالىق ساراپشىلار مەن ساياساتكەرلەر قاتىستى.
باسقوسۋ كەزىندە “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين “ەلىمىزدى وسىنداي جوعارى دەڭگەيگە كوتەرگەن پرەزيدەنتىمىزدىڭ باستامالارىن قولداۋ ماقساتىندا “نۇر وتان” پارتياسى دا اۋقىمدى جۇمىستار اتقارىپ كەلەدى. ءبىز الداعى ۋاقىتتا ەلباسىمىزدىڭ تاپسىرماسىنا, ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋىنە, استانادا وتەتىن سامميتكە بايلانىستى دايىندىق جۇمىستارىن ابىرويمەن جالعاستىرامىز دەگەن ويدامىن”, دەدى ءوز سوزىندە. بۇل رەتتە ول توراعالىق كەزىندە ساياسي سالادا تۋىندايتىن ءارتۇرلى كەلەڭسىزدىكتەردى بەيبىت جولمەن شەشۋ, ەكونوميكا مەن عىلىم سالالارىنداعى ارىپتەستىكتىڭ باسىم باعىتتارىن ايقىنداۋ, قورشاعان ورتانى قورعاۋ سالاسىنداعى وزەكتى تۇيتكىلدەردى ءبىر جۇيەگە كەلتىرۋ سەكىلدى ماسەلەلەردىڭ ماڭىزدى بولاتىنىن اتاپ ءوتتى.
ن.نىعماتۋلين سونداي-اق, بيىلعى جىلدىڭ 1-2 جەلتوقسانى كۇندەرى استانادا ەقىۇ ءسامميتىنىڭ ءوتۋى – الەمدىك قاۋىمداستىق الدىنداعى ەلباسىنىڭ حالىقارالىق بەدەلى مەن باستامالارىنىڭ مويىندالۋى ەكەنىن اتاپ ءوتتى. “ەقىۇ-نىڭ ءسامميتى سوڭعى 10 جىل ىشىندە وتپەگەنىن بىلەسىزدەر. ال قازاقستان سوڭعى 10 جىل ىشىندە تمد جانە ازيا ەلدەرىنىڭ ىشىندە, سونداي-اق, وسى ۇيىمنىڭ تاريحىندا ەڭ العاشقى بولىپ وسىنداي اۋقىمدى سامميتتىڭ باستاماشىسى بولىپ وتىر. بۇل ءسوزسىز, بىزگە ۇلكەن جاۋاپكەرشىلىك جۇكتەيدى. سونىمەن قاتار, سامميتتىڭ وتۋىنە تىكەلەي مۇددەلىلىك تانىتاتىن مەملەكەتتىك ورگاندار مەن ۇكىمەتتىك ەمەس ۇيىمدارعا دا اۋقىمدى مىندەتتەر جۇكتەيتىنى انىق. قازاقستان وسى ۇيىمعا ءتوراعالىق ەتۋ كەزىندە ەۋروپالىق قاۋىپسىزدىك كەڭىستىگىندەگى تۇيتكىلدى ماسەلەلەردىڭ ءتۇيىنىن شەشۋگە كۇش سالاتىن بولادى. سول ارقىلى ەقىۇ-نىڭ ەۋروپا مەن ازيا ارالىعىن قامتيتىن ماسەلەلەردى تارقاتۋدا ءوزىنىڭ جاۋاپكەرشىلىك اياسىنان كەڭەيتپەك”, – دەدى پارتيا توراعاسىنىڭ ءبىرىنشى ورىنباسارى.
وتىرىس بارىسىندا ەقىۇ-نىڭ استاناداعى ورتالىعى باسشىسىنىڭ ورىنباسارى جاننەت كلەتتسەر دۇنيە ءجۇزىنىڭ بەدەلدى ۇيىمىنىڭ نەگىزگى باعىتتارى مەن بولاشاق جۇمىستارى, سونداي-اق, تاريحى جونىندە جان-جاقتى توقتالىپ, قازاقستاننىڭ ەقىۇ-عا ءتوراعالىعى الەمدەگى قاۋىپسىزدىك سالاسىنداعى ءتۇرلى ماسەلەلەرىن وڭتايلاندىرۋعا سەپ بولاتىندىعىنا سەنىم ءبىلدىردى.
باسقوسۋ كەزىندە پارتيا وكىلى ەقىۇ-نىڭ قىزمەتى نەگىزىنەن 3 ولشەمگە نەگىزدەلگەنىمەن, كوپ جىلدار بويى ۇيىم قىزمەتى تەك ءبىر ءولشەمگە سۇيەنىپ كەلگەنىنە توقتالدى. “وكىنىشكە وراي, كەيبىر جىلدارى بەدەلدى ۇيىم ءبىر باعىت بويىنشا, ياعني, ساياسي تۇيىندەردى شەشۋ باعىتىندا عانا جۇمىس اتقارىپ كەلگەن ەدى. بىراق تا ءبىز بۇعان ءتۇسىنىستىكپەن قارايمىز. سەبەبى, ۇيىمنىڭ, ونداعى جۇمىس اتقاراتىن ساراپشى مامانداردىڭ تاجىريبەسى مول. بۇل تاجىريبە كوپ جاعدايدا كوپتەگەن ەلدەردەگى دەموكراتيالىق رەفورمالاردى رەتتەۋگە سەپ بولعانى انىق. بۇل رەتتە قازاقستاننىڭ توراعالىعى كەزىندە ەلىمىزدىڭ كوتەرگەن كوپتەگەن باستامالارى, وڭىرلىك, قاۋىپسىزدىك ماسەلەلەردى شەشۋدەگى قادامدارى قولداۋ تاۋىپ كەلەدى. ماسەلەن, قازىرگى جاھاندانۋ زامانىنا ءتان قيىندىقتاردى شەشۋ ءۇشىن قازاقستان ۇيىمدى جاڭارتۋ, جاڭالاۋ باستاماسىن ۇسىندى”, – دەدى نۇرلان نىعماتۋلين بۇل تۋراسىندا.
سەمينارعا قاتىسۋشىلار قازاقستاننىڭ ەقىۇ-عا توراعالىعى اتالعان ۇيىمنىڭ نازارىن ەۋرازيا قاۋىپسىزدىگىندەگى وزەكتى ماسەلەلەرگە اۋدارۋعا, سول ارقىلى ەقىۇ-نىڭ جاۋاپكەرشىلىك اياسىن ەۋروپادان ەۋرازياعا دەيىن كەڭەيتۋگە ءمۇمكىندىك بەرەدى دەگەن ويلارىن جەتكىزدى.
ءلايلا ەدىلقىزى.