...“مەكتەپكە جول” اكتسياسى ءوتتى
بالانىڭ باقىتتى كۇلكىسى كوبىنە اكە مەن انا مەيىرىمى مەن ولارعا جاسالعان قامقورلىقپەن ولشەنەدى. دەمەك, وسى باعىتتا قولعا الىنعان “مەكتەپكە جول” اكتسياسى اۋقىمىندا تالدىقورعان قالالىق ءبىلىم ءبولىمى ماڭىزدى شارالاردى قولعا الىپ, جوسپارعا ساي وقۋشىلارعا قايىرىمدىلىق كومەك كورسەتۋ, ولاردى جاپپاي وقۋعا قامتۋ باعىتىندا رەيدتەر ۇيىمداستىرىپ, سەمينارلار وتكىزىپ كەلەدى.
كۇنى كەشە وسى باعىتتا باس قوسقان ارنايى كوميسسيا جەتىم, جارتىلاي جەتىم, الەۋمەتتىك جاعىنان از قامتىلعان وتباسى بالالارىنىڭ قاجەتتىلىگىن شەشۋ ماقساتىنداعى جۇمىستاردى ورتاعا سالىپ, ۇجىمدار مەن جەكە دەمەۋشىلەردەن جينالعان زاتتاردى ءبولدى. وقۋ قۇرالدارى, مەكتەپ فورماسىنا يە بولعاندار شىن قۋاندى.
بيىل شاھارداعى 375 بالانىڭ كومەككە ءزارۋ ەكەندىگى انىقتالسا, ولاردى قالتالى ازاماتتار مەن كاسىپكەرلەر ءوز قامقورلىقتارىنا العان. وسىلايشا, ۇرپاق بولاشاعىنا جول اشقان اكتسيا ودان ءارى جالعاسىپ, بالالاردىڭ مەرەيىن ءوسىرىپ, ەرتەڭگى كۇنگە دەگەن بەرىك سەنىمىن قالىپتاستىرۋدا.
كۇمىسجان بايجان. الماتى وبلىسى.
...ءۇشىنشى اۋىسىم باستالدى
بۋرابايداعى “پريوزەرنىي” دەمالىس جانە ساۋىقتىرۋ ورتالىعىندا جاستاردىڭ يننوۆاتسيالىق-تانىمدىق لاگەرىنىڭ ءۇشىنشى اۋىسىمى جۇمىسىن باستادى. “نۇر وتان” حدپ “جاس وتان” جاستار قاناتى مەن ءبىلىم جانە عىلىم مينيسترلىگى ۇيىمداستىرعان شارانىڭ اشىلۋ سالتاناتىندا پرەزيدەنت اكىمشىلىگىنىڭ جانە اقمولا وبلىسى اكىمدىگىنىڭ وكىلدەرى, “نۇر وتان” حدپ حاتشىسى ق.ساتىبالدى, “جاس وتاننىڭ” اتقارۋشى حاتشىسى ن.وتەشەۆ قۇتتىقتاۋ ءسوز سويلەدى.
لاگەر بيىلعى جاز ايلارىندا 400-گە جۋىق جاستى قابىلداپ, كوپتەگەن تانىمدىق شارالار ءوتكىزدى. ال, “وتانشىل” دەپ اتالاتىن ءۇشىنشى اۋىسىمنىڭ قاتىسۋشىلارى اراسىندا “جاس وتان” جاستار قاناتىنىڭ بارلىق دەڭگەيدەگى اتقارۋشى حاتشىلارىنىڭ بولۋى, ەل جاستارىنىڭ الدىندا تۇرعان مىندەتتەردى تەرەڭ سارالاۋعا مۇمكىندىك بەرەدى. مۇندا بايلانىس جانە اقپارات, اۋىل شارۋاشىلىعى مينيسترلىكتەرىنىڭ, مەملەكەتتىك باسقارۋ اكادەمياسىنىڭ, ەلباسىنىڭ حالىقارالىق “بولاشاق” ستيپەندياتتارىنىڭ, بيزنەس وكىلدەرىنىڭ پىكىر الماسۋ الاڭدارى, سەمينار-ترەنينگتەر وتكىزىلەدى.
باقبەرگەن امالبەك. اقمولا وبلىسى.
...قامقورلىقسىز قالعاندارعا قايىرىمدىلىق جاسالدى
تۇرمىسى تومەن وتباسىنداعى جانە اتا-اناسىنىڭ قامقورلىعىنسىز قالعان بالالارعا وقۋ قۇرالدارى مەن قاجەتتى كيىم-كەشەكتەر ۇلەستىرۋدىڭ رەسپۋبليكالىق اكتسياسىنا قارماقشىلىقتار دا كەڭىنەن قاتىسۋدا.
جوسالى كەنتىنىڭ ورتالىق الاڭىندا ۇيىمداستىرىلعان قايىرىمدىلىق اكتسياسىندا 100-گە جۋىق بالاعا قوماقتى تارتۋ-تارالعىلار جاسالدى. سونداي-اق, وسى شارادا “قىزىل اي” قوعامىنىڭ وبلىستىق ءبولىمشەسى تاراپىنان 13 وقۋشىعا 550 مىڭ تەڭگە كولەمىندە قارجىلىق كومەك كورسەتىلدى.
اتا-اناسىنان ايىرىلعان قوس ءبۇلدىرشىندى باۋىرىنا باسقان اق جاۋلىقتى اجە س.جۇنىسباەۆا اۋدان اكىمدىگى مەن سالا باسشىلارىنا, جەكەلەگەن كاسىپكەرلەرگە ريزاشىلىعىن ءبىلدىرىپ, انالىق اق باتاسىن بەردى.
ەركىن ءابىل.
قىزىلوردا وبلىسى, قارماقشى اۋدانى.