مەملەكەت باسشىسى نۇرسۇلتان نازارباەۆ اقوردادا ەلىمىزدىڭ قۇقىق قورعاۋ جۇيەسىن رەفورمالاۋ ماسەلەلەرى بويىنشا كەڭەس وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كەڭەسكە پرەمەر-مينيستر كارىم ءماسىموۆ, پرەزيدەنت اكىمشىلىگىنىڭ باسشىسى اسلان مۋسين, قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى مارات ءتاجين, كونستيتۋتسيالىق كەڭەستىڭ توراعاسى يگور روگوۆ, باس پروكۋرور قايرات ءمامي, ادىلەت ءمينيسترى راشيد تۇسىپبەكوۆ, پرەزيدەنت اكىمشىلىگى باسشىسىنىڭ ورىنباسارى تالعات دوناقوۆ قاتىستى.
كەڭەستى اشقان ەلباسى قۇقىق قورعاۋ جۇيەسىن رەفورمالاۋ ءمىندەتى ءوزىنىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى قازاقستان حالقىنا بيىلعى جولداۋىندا باياندالعانىن اتاپ ءوتتى.
جولداۋدا قازاقستان قۇقىق قورعاۋ جۇيەسىن رەفورمالاۋدىڭ بىرقاتار باعىتتارى – قۇقىق قورعاۋ جۇيەسىن وڭتايلاندىرۋ, ءاربىر مەملەكەتتىك ورگاننىڭ ايقىن قۇزىرەتتەرىن ءتۇزىپ شىعۋ, زاڭداردى ىزگىلەندىرۋ مەن ساپاسىن ارتتىرۋ قاجەتتىگى دارالاپ كورسەتىلگەن بولاتىن. وسىعان بايلانىستى مەملەكەت باسشىسى ۇكىمەتكە قۇقىق قورعاۋ جۇيەسىن رەفورمالاۋ تۋرالى زاڭ جوباسىن جوعارى حالىقارالىق قالىپتارعا ساي بولاتىنداي ەتىپ ازىرلەپ, بيىلعى جىلى پارلامەنتكە ەنگىزۋدى تاپسىردى.
مەملەكەت باسشىسى قىلمىسسىزداندىرۋعا باسا نازار اۋدارۋ قاجەت ەكەنىن اتاپ ءوتتى. زاڭدار الدەقايدا ىزگىلەنگەن بولۋى ءتيىس, ال باس بوستاندىعىنان ايىرۋ ءتۇرىندەگى جازانى كەي جاعدايلاردا ءىرى كولەمدە ايىپ سالۋ نەمەسە قوعامدىق جۇمىستارعا تارتۋ سەكىلدى بالاما شارالارمەن اۋىستىرۋعا بولار ەدى. سونداي-اق, جازاسىن وتەۋ ورىندارىنان بوساتىلعانداردىڭ قايتادان قىلمىسكەرلەر قاتارىن تولىقتىرماۋى ءۇشىن ولاردى بەيىمدەۋمەن اينالىسۋ دا ماڭىزدى بولماق.
– قۇقىق قورعاۋ ۆەدومستۆولارىنىڭ ءبىرىن-ءبىرى قايتالاۋىن بولدىرماي, ولاردىڭ جۇمىسىن ءتيىمدى ەتۋ, الەمدىك تاجىريبەنى پايدالانا وتىرىپ, بۇرىنعى كەڭەستىك جۇيەنىڭ كەلەڭسىز مۇرالارىنان ارىلۋ قاجەت. ءبىز وتكەن جىلداردا كوپ ءىس اتقاردىق. مۇنى بارلىق الەمدىك ساراپشىلار ايتىپ وتىر. ەندى وسى رەفورمانى اتقارۋ قالدى. ءبىز ءوز ازاماتتارىمىزدىڭ قۇقىقتارى جاقسى قورعالعانىن, كاسىپكەرلەردىڭ قورعالعانىن, قۇقىق قورعاۋ جۇيەسىنىڭ وزىندەگى سىبايلاس جەمقورلىققا توسقاۋىل قويىلعانىن قالايمىز. جاۋاپكەرشىلىكتى كۇشەيتۋ ماڭىزدى جانە بۇل ورگانداردىڭ ءارقايسىسى ءوز ىسىمەن اينالىساتىنداي ەتۋ كەرەك, – دەپ اتاپ كورسەتتى پرەزيدەنت.
كەڭەستە پرەمەر-مينيستر ك.ءماسىموۆ ءسوز سويلەدى. ۇكىمەت باسشىسى پرەزيدەنت جولداۋىندا ايتىلعان ءاربىر باعىت بويىنشا قۇرىلعان كوميسسيالاردىڭ جۇمىسى تۋرالى, ەلدىڭ قۇقىق قورعاۋ جۇيەسىن رەفورمالاۋدىڭ قۇقىقتىق بازاسىن جاساۋدى كوزدەيتىن زاڭ شىعارۋ جۇمىسىنان حاباردار ەتتى.
كەڭەس قورىتىندىسىندا پرەزيدەنت بىرقاتار ناقتى تاپسىرمالار بەردى.
----------------------------------
سۋرەتتى تۇسىرگەندەر س.بوندارەنكو, ب.وتارباەۆ.