ورمان – ەل داۋلەتى عانا ەمەس, ساۋلەتى دە. تابيعات سىيلاعان وسىناۋ بايلىقتى كوزدىڭ قاراشىعىنداي ساقتاۋ, وعان ايالى كوزقاراس تانىتۋ بارشامىزدىڭ مىندەتىمىز. بۇل باعىتتا اتقارىلىپ جاتقان جۇمىستار دا از ەمەس. ماسەلەن, اۋىل شارۋاشىلىعى مينيسترلىگىنىڭ بۇيرىعىنا سايكەس, ءبىزدىڭ ينسپەكتسيا تاراپىنان بيىلعى جىلدىڭ وزىندە وبلىس اۋماعىنداعى 14 ورمان شارۋاشىلىعىنىڭ, “كوكشەتاۋ جانە “بۋراباي” مەملەكەتتىك ۇلتتىق تابيعي باقتارىنىڭ, “ساندىقتاۋ” ارنايى كاسىپورنىنىڭ, “جاسىل ايماق” رەسپۋبليكالىق مەملەكەتتىك كاسىپورنىنىڭ ءتىلسىز جاۋدى اۋىزدىقتاۋعا جانە الدىن الۋعا قاتىستى قارىم-قاۋقارى جان-جاقتى تەكسەرىستەن وتكىزىلدى.
اقمولا وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسى توتەنشە جاعدايلار دەپارتامەنتىمەن بىرلەسىپ, “وبلىس ورماندارىن ءورت قاۋىپسىزدىگىنەن قامتاماسىز ەتۋ” تاقىرىبىندا ەكى رەت تاجىريبەلىك سەمينار ۇيىمداستىردى. اۋماقتىق ينسپەكتسيا ماماندارى ورمان قورعاۋ زاڭنامالارىنا قاتىستى لەكتسيالار وقىپ, ارنايى سەكتسيالاردا شەبەرلىك سىنىپتارىن وتكىزدى. سونداي-اق, اعىمداعى جىلدىڭ ءساۋىر ايىندا وترادنەنسكوە ورمان شارۋاشىلىعى مەملەكەتتىك مەكەمەسىنىڭ اۋماعىندا ء“ىرى كولەمدەگى تابيعي ءورت باستالعان جاعدايدا, ونىمەن كۇرەستى باسقارۋ ورگاندارىنىڭ, ءورت جانە اپاتتىق قۇتقارۋ قىزمەتتەرىنىڭ جانە جەرگىلىكتى ورمان شارۋاشىلىعى مەكەمەلەرىنىڭ ءىس-قيمىلى” تاقىرىبىندا اۋماقتىق ءورت-تەحنيكالىق وقۋ-جاتتىعۋلارىنىڭ وتكىزىلۋىنىڭ ەسەلى قايتارىمى بولادى دەپ ويلايمىز. الداعى كەزدە مۇنداي شارانى ەرەيمەنتاۋ اۋدانىنداعى ورمان شارۋاشىلىقتارىندا وتكىزۋ كوزدەلۋدە.
وسى شارالار ناتيجەسىندە جۇمىسىمىزدىڭ جازعى ماۋسىمعا, ياعني ءورت قاۋىپسىزدىگى نەعۇرلىم كۇردەلى سيپات الاتىن كەزگە ارنالعان ءىس-شارالار جوسپارى ءتۇزىلدى. ورماندى القاپتاردا 27 شولۋ مۇناراسى ورناتىلىپ, بارلىق 57 ءورت ءسوندىرۋشى جاۋىنگەر مەن ماماندار ءتيىستى وقۋعا تارتىلىپ, ولاردان ەمتيحان الىندى. بۇل مەملەكەتتىك تابيعات باقتارىنان جانە قورىقتاردان, رەسپۋبليكالىق باعىنىستاعى مەكەمەلەردەن باسقاسى.
وبلىستاعى ورمان شارۋاشىلىقتارى مەن ورماندى پايدالانۋشى مەكەمەلەردىڭ ماتەريالدىق-تەحنيكالىق تۇرعىدان جاراقتاندىرىلۋى جاقسارا تۇسكەنىن اتاپ وتۋگە بولادى. توتەنشە جاعدايدىڭ بەتىن قايتارۋدا 37 ارنايى ءورت ءسوندىرۋ ءاۆتوماشينەسى, تىركەمەلى قۇرال-جابدىقتارى بار 66 تراكتور تاۋلىك بويى كەزەكشىلىك اتقارۋدا. ولاردىڭ قوزعالىسىن قامتاماسىز ەتۋ ءۇشىن 58,3 توننا ديزەل وتىنى مەن 65,2 توننا بەنزين قورلاندى. اقمولا, بۋراباي, زەرەندى اۆياتوپتارىنىڭ كۇشىمەن شۇعىل شولۋ جانە بارلاۋ جۇمىستارى كەستە بويىنشا جۇرگىزىلىپ جاتىر. ورمان كۇزەتىندەگى ارىپتەستەرىمىز 409 اسپالى ءورت ءسوندىرگىشتەرمەن, موتوپومپالارمەن, كوبىك شاشقىشتارمەن, باسقا دا قۇرالدارمەن قامتاماسىز ەتىلگەن.
قوعام بايلىعى بىرلەسىپ قورعاعاندا, تيىستى جاناشىرلىق تانىتقاندا عانا يگىلىگىمىزگە اينالىپ, بولاشاعىمىزدى نۇرلاندىرادى. سوندىقتان ورتاق ىستە ەشكىم دە بەيتاراپ قالمايتىندىعى بەلگىلى. بۇل قازاقستان رەسپۋبليكاسىنىڭ ء“ورت قاۋىپسىزدىگى تۋرالى” زاڭىندا, ورمان كودەكسىندە اتاپ كورسەتىلگەن. بۇل ورايدا وبلىستا تىڭعىلىقتى ىستەر جۇرگىزىلۋدە دەي الامىز. مۇددەلەس مەكەمەلەرمەن, شارۋاشىلىق قۇرىلىمدارىمەن ءوزارا ىنتىماق ءمامىلەلەرىنە قول قويىلىپ, ءتيىستى مىندەتتەمەلەر الىندى. ول جۇمىس جوسپارىندا كورسەتىلىپ, جەرگىلىكتى اقپارات قۇرالدارى ارقىلى جۇرتشىلىققا جەتكىزىلگەن. وسىعان بايلانىستى قاجەتتى جاعدايلاردا قوعامدىق ءورت ءسوندىرۋ جاساعىنىڭ 924 جاۋىنگەرى, 158 اۆتوكولىك پەن 196 تراكتور ءورت وشاقتارىنداعى ارپالىسقا قوسىمشا جۇمىلدىرىلاتىن بولادى.
دەگەنمەن, حالقىمىزدىڭ “ساقتانساڭ – ساقتايمىن” دەگەن ناقىلى ءالى كۇنگە وزەكتى كۇيدە ەكەندىگىن ايتقانىمىز ءجون. بۇل جاۋاپكەرشىلىكتىڭ وسالدىعىن ەسكە سالادى. ماسەلەن, بىلتىردان بەرى وبلىستىڭ ورماندى القاپتارىندا 61 رەت ءورت وقيعاسى تىركەلدى. شىعىننىڭ كولەمىن ميلليونداعان تەڭگەمەن ەسەپتەۋگە بولادى. ينسپەكتسيا تاراپىنان ايىپتىلارعا قاتىستى قاتاڭ شارالار قولدانىلىپ, كەلتىرىلگەن زياننىڭ ورنى تولتىرىلۋدا.
ءورت ادامداردىڭ قولىمەن عانا ەمەس, تابيعي اۋىتقۋشىلىقتاردان دا تۇتاناتىنى بار. جاسىل جەلەكتى ايماقتا ورىن العان ءورتتىڭ 15-ءى نايزاعايدان كەلىپ وتىر. دەمەك, توتەنشە جاعدايلارعا دايىندىقتا ءالسىز بۋىندار بارشىلىق. سوندىقتان ءتىلسىز جاۋمەن كۇرەستى كەشەندى تۇردە جۇرگىزۋ قاجەت ەكەندىگىن قايتالاپ ايتۋدىڭ ءوزى ارتىق. وبلىستىق مەكەمە بۇل ورايدا قىراعىلىقتى ارتتىرىپ, ءوز قۇزىرىنداعى مىندەتتەمەلەرىن ابىرويمەن اتقارىپ كەلە جاتىر.
بەكسۇلتان بايمۇتوۆ, اقمولا وبلىستىق ورمان جانە اڭشىلىق شارۋاشىلىعى ينسپەكتسياسىنىڭ باستىعى.
اقمولا وبلىسى.