قازىرگى تاڭدا ەلىمىزدە كەيبىر ادامدار ءۇشىن وزەكتى پروبلەماعا اينالعان ماسەلەلەردىڭ قاتارىندا تۇرعىن ءۇي سالاسىنداعى ۇلەسكەرلەر جايى تۇر. بۇل پروبلەما, اسىرەسە, استانا مەن الماتى قالالارىندا كوپتەپ كورىنىس بەرىپ وتىر. ۇكىمەتتىڭ قولداۋى ارقاسىندا ۇلەسكەرلەر ماسەلەسىنىڭ تۇيىندەرى ايتارلىقتاي شەشىم تابۋدا. دەگەنمەن, وسى ىسكە ۇكىمەتتىك ەمەس ۇيىمدار دا ءوز ۇلەستەرىن قوسپاق. سولاردىڭ ءبىرى كەشە ەلوردادا تۇساۋى كەسىلگەن ۇلەسكەرلەرگە زاڭدىق تۇرعىدان كومەك قولىن سوزاتىن “تۇرعىن ءۇي قۇقىعى” قوعامدىق بىرلەستىگى بولىپ وتىر.
– “تۇرعىن ءۇي قۇقىعى” قوعامدىق بىرلەستىگى استانالىق ۇلەسكەرلەردىڭ سالا بويىنشا تۋىنداعان ءتۇرلى سۇراقتارىنا جاۋاپ بەرۋگە ءازىر. ءبىزدىڭ نەگىزگى ماقساتىمىز ءبىر نەمەسە ودان دا كوپ پاتەرگە ۇلەسكەر بولعان بارلىق ازاماتتارعا زاڭدىق تۇرعىدان قولداۋ كورسەتۋ. بۇگىن العاشقى ءوتىنىش بەرۋشىلەردى قابىلداپ تا ۇلگەردىك. تۇرعىنداردىڭ پروبلەمالارىنىڭ ىشىندەگى ەڭ نازىگى بولىپ سانالاتىن تۇرعىن ۇيگە بايلانىستى زاڭدىق كومەگىمىزدى ءبىز قاشاندا ايامايمىز. قوعامدىق بىرلەستىكتەگى بىلىكتى زاڭگەرلەر ءاماندا حالىق ءۇشىن كەڭەس بەرۋگە ءازىر, – دەيدى اتالعان بىرلەستىكتىڭ جەتەكشىسى عاليا بولەگەنوۆا.
استاناداعى جاستار شاعىن اۋدانى ماڭايىندا ش.ءۋاليحانوۆ كوشەسى بويىندا ورنالاسقان “تۇرعىن ءۇي قۇقىعى” قوعامدىق بىرلەستىگىنىڭ ەلوردا جۇرتشىلىعىنا بەرەر زاڭدىق كەڭەسى تەگىن. ولار تۇرعىن ءۇي ماسەلەسىندەگى پروبلەمالاردى بىلۋگە قۇمارتقان كەز كەلگەن جانعا جول كورسەتپەك.
ءابدىراحمان قىدىربەك. استانا.