كەشە استانا قالاسىنداعى ۇلتتىق اكادەميالىق كىتاپحانادا قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ماۋلەن اشىمباەۆ پرەزيدەنت جولداۋىنداعى قازاقستاننىڭ 2020 جىلعا دەيىنگى دامۋ ستراتەگياسىن ءتۇسىندىرۋ بويىنشا مەملەكەتتىك الەۋمەتتىك تاپسىرىستى جۇزەگە اسىراتىن جەتەكشى ۇكىمەتتىك ەمەس ۇيىمداردىڭ باسشىلارىمەن كەزدەستى. وندا ەلباسىنىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” جولداۋىن جۇزەگە اسىرۋدا مەملەكەتتىك ورگاندار مەن ۇكىمەتتىك ەمەس ۇيىمداردىڭ (ۇەۇ) بىرلەسە جۇمىس ىستەۋى بارىسى تالقىلاندى. ءىس-شارانىڭ وتۋىنە مادەنيەت مينيسترلىگى مۇرىندىق بولدى.
كەزدەسۋگە پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى دارحان مىڭباي, ەكونوميكالىق دامۋ جانە ساۋدا مينيسترلىگىنىڭ جاۋاپتى حاتشىسى دينا شاجەنوۆا قاتىستى. كەزدەسۋگە مادەنيەت مينيسترلىگىنىڭ جاۋاپتى حاتشىسى جاننا قۇرمانعاليەۆا مودەراتورلىق ەتتى. پرەزيدەنت ءوز جولداۋىندا ۇەۇ-نىڭ الەۋەتىن ارتتىرۋ قاجەتتىگىن تاپسىرعان بولاتىن. وسىعان بايلانىستى مادەنيەت مينيسترلىگى الەۋمەتتىك ماڭىزدى جوبالاردى جۇزەگە اسىرۋ ءۇشىن 500 ميلليون تەڭگە قاراستىرعان. كونكۋرس قورىتىندىسى بويىنشا جوبالاردى ءجۇزەگە اسىرۋعا 50 رەسپۋبليكالىق ۇكىمەتتىك ەمەس ۇيىم تارتىلعان. ولاردىڭ اراسىندا قازاقستاننىڭ ازاماتتىق اليانسى, “اتامەكەن” وداعى” ۇلتتىق ەكونوميكالىق پالاتاسى, قازاقستان جازۋشىلار وداعى, قازاقستان جاستارىنىڭ كونگرەسى, رەسپۋبليكالىق ايەلدەر كەڭەسى, باس رەداكتورلار كلۋبى جانە الەۋمەتتىك-ساياسي زەرتتەۋ ينستيتۋتى دا بار.
كەزدەسۋدە پرەزيدەنت اكىمشىلىگى باسشىسىنىڭ ورىنباسارى م.ءاشىمباەۆ ءسوز الىپ, الداعى ءمىندەتتەرگە جان-جاقتى توقتالدى. ءماۋلەن ساعاتحان ۇلىنىڭ اتاپ وتۋىنشە, جىلدىڭ سوڭىنا دەيىن 2 مىڭعا جۋىق ءىس-شارالار وتكىزىلەدى. بۇل ءىس-شارالار 500 مىڭ ادامدى قامتيدى دەپ كۇتىلۋدە. ءارتۇرلى تاقىرىپتا كونفەرەنتسيالار, دوڭگەلەك ۇستەلدەر مەن سەمينارلار وتكىزىلىپ, ولار بويىنشا ماقالالار جازىلادى. سونىڭ نەگىزىندە جولداۋعا قاتىستى ناقتى ۇسىنىستار, ادىستەمەلىك ۇسىنىمدار ازىرلەنىپ, مەملەكەتتىك ورگاندار قانداي پروبلەمالارعا نازار اۋدارۋى تيىستىگى ايقىندالادى.
وسى رەتتە ماۋلەن اشىمباەۆ بەس اسپەكتىنى اتاپ بەردى. ءبىرىنشى كەزەكتە ۇكىمەتتىك ەمەس ۇيىمداردان شىعارماشىلىقتى ادىستەر, قازىرگى زامانعى قىزعىلىقتى تاسىلدەر كۇتىلەدى. الايدا, ءىس-شارالاردى وتكىزۋ بارىسىندا ساپا باستى نازاردا بولۋى ءتيىس. ەكىنشىدەن, وسىنشالىقتى قوماقتى قارجى ءبولىنىپ جاتقانىنا وراي “نە ءۇشىن؟” دەگەن سۇراق تۋىنداۋى مۇمكىن.
وسىعان بايلانىستى پرەزيدەنت اكىمشىلىگى باسشىسىنىڭ ورىنباسارى مۇنىڭ بارلىعى ەكونوميكاداعى امبيتسيالى ماقساتتارعا جانە ەل تۇرعىندارىنىڭ تۇرمىس دەڭگەيىن كوتەرۋ جونىندەگى جالپىمەملەكەتتىك مىندەتتەرگە ازاماتتاردى تارتىپ, قوعامدى جۇمىلدىرۋ قاجەتتىگىمەن ءتۇسىندىردى. ەلىمىزدە 18 مىڭعا تارتا ۇكىمەتتىك ەمەس ۇيىمدار بولسا, ولاردا 200 مىڭعا تاياۋ ادام جۇمىس ىستەيدى ەكەن. سوندىقتان وسى باعىتتاعى مەملەكەتتىك ساياساتتى ناسيحاتتاۋدا وزگە دە ۇەۇ-دى تارتۋ قاجەتتىگى ايتىلدى. تۇرعىندارمەن كەرى بايلانىس ارناسىن ورناتۋ ءۇشىنشى اسپەكت رەتىندە كولدەنەڭ تارتىلدى. مۇندا ءارتۇرلى پىكىرسايىس الاڭدارىندا مەملەكەتتىك ساياساتتىڭ ءالسىز تۇستارى انىقتالۋى ءتيىس. ازاماتتىق كەلىسىم مەن تۇراقتىلىقتى نىعايتۋ ماسەلەسى ءتورتىنشى اسپەكتى رەتىندە قاراستىرىلدى. ماۋلەن اشىمباەۆ قىرعىزستان مىسالىنداعى ۇلتارالىق قاقتىعىس, ايماقتىق جانە ساياسي قايشىلىقتاردىڭ نەگە ۇرىندىرارىن كەلتىرە وتىرىپ, ۇكىمەتتىك ەمەس ۇيىمداردى تولەرانتتىلىق, كەلىسىم, بەيبىتشىلىك پەن ءوزارا ءتۇسىنىستىكتى قالىپتاستىرا الاتىنىنا ەرەكشە توقتالىپ ءوتتى. مەملەكەت باسشىسى ناق وسى ماسەلەگە ۇنەمى كوڭىل اۋدارتىپ كەلەدى. “تۇراقتىلىق – بۇل ەل ازاماتتارىنىڭ تۇرمىس جاعدايىن قامتاماسىز ەتۋدەگى باستى فاكتور, ءبىزدىڭ دامۋىمىزدىڭ باستى شارتى”, دەدى سوزىندە ماۋلەن ساعاتحان ۇلى. سوڭعى اسپەكتى رەتىندە ءماۋلەن اشىمباەۆ مەملەكەتتىك ورگاندار مەن ءۇشىنشى سەكتور اراسىنداعى ءوزارا قارىم-قاتىناس ورناتۋدىڭ جاڭا ۇلگىسىن جاساۋعا توقتالدى. تارقاتىپ ايتقاندا, جولداۋ شەڭبەرىندە وسىنداي قارىم-قاتىناستىڭ كىشىگىرىم ۇلگىسىن قۇرۋعا دا بولادى.
كەزدەسۋ بارىسىندا بىرقاتار ۇەۇ باسشىلارى دا ءسوز الىپ, ءوز ويلارىن ورتاعا سالدى. ج.قۇرمانعاليەۆا مادەنيەت مينيسترلىگىنىڭ ۇەۇ-مەن ءوزارا ءىس-ارەكەت جاساۋداعى تاجىريبەسى تۋرالى ايتىپ بەردى. سونىمەن قاتار, كەزدەسۋدە جوبالارعا مونيتورينگ جۇرگىزۋ مەن ەسەپتىلىك ماسەلەسى, اشىقتىق پەن قولجەتىمدىلىكتى قامتاماسىز ەتۋ جايى ءسوز بولدى. سونداي-اق بيلىك پەن ۇەۇ بىرىككەن ءىس-قيمىلىنىڭ ناقتى تەتىكتەرى دە جان-جاقتى تۇجىرىمدالدى.
اسقار تۇراپباي ۇلى.