ىقپالداستىقتى نىعايتۋ جايى قاراستىرىلدى

7 تامىزدا تاشكەنتتىڭ تورىندە قازاقستان, قىرعىزستان, وزبەكستان, تاجىكستان جانە جاپونيا مەملەكەتتەرىنىڭ سىرتقى ىستەر مينيسترلەرى باس قوسىپ, “ورتالىق ازيا – جاپونيا” ۇنقاتىسۋى اياسىندا كەلەلى ماسەلەلەردى تالقىلادى. وسىمەن ءۇشىنشى رەت وتكىزىلىپ وتىرعان كەڭەسكە وزبەكستان سىرت­­قى ىستەر ءمينيسترى ۆ.نوروۆ, جاپو­نيا سىرتقى ىستەر ءمينيسترى ك.وكا­دا, قر مەملەكەتتىك حاتشىسى – سىرت­­قى ىستەر ءمينيسترى ق.ساۋدا­باەۆ, قىر­عىزستان سىرتقى ىستەر ءمينيسترى ر.قازاقباەۆ, تاجىكستان سىرتقى ءىس­تەر ءمينيسترى ح.زافاري جانە تۇركى­مەنستان رەسپۋبليكا­سى­نىڭ وزبەك­ستان­داعى توتەنشە جانە وكىلەتتى ەلشىسى س.پىرمۇحامەدوۆ قاتىسىپ, “ورتالىق ازياداعى بەي­بىتشىلىكتى نىعايتۋ جانە تۇراق­تاندىرۋ مەن ءارى قارايعى ارىپتەس­تىكتىڭ پەرسپەك­تيۆالارى” تاقىرى­بىن­دا قازىرگى كەزدە تۋىنداپ وتىر­عان ماسەلەلەر جونىندە پىكىرلەستى, قوردالانعان پروبلەمالاردىڭ شەشىلۋ تەتىگىن قاراستىردى. جيىندا ءار مەملەكەتتىڭ وكىل­دەرى ەكىنشى باسقوسۋدا قابىلدانعان ماقسات-مىندەتتەردىڭ ورىندالۋ بارىسىنا تالداۋ جاساپ, جۇزەگە اسى­رىلعان جۇمىستاردى ماقۇل­دادى. سونىمەن قاتار, ورتالىق ازيا + جاپونيا” ۇنقاتىسۋ جوس­پارىنىڭ ءوز ەلدەرىندە قالاي ور­ىندالىپ جاتقاندىعىن ناقتىلادى. جاپونيا ءمينيسترى كاتسۋيا وكا­دا ورتالىق ازيا مەملەكەتتەرىنىڭ جالپىعا ورتاق ايماقتىق تۇراقتى­لى­عىن ساقتاۋ مەن دامۋىنا باي­لا­نىستى قابىلدانعان شەشىمدەردىڭ, سونداي-اق ارىپتەستىكتىڭ ءتۇسىنىس­تىك­پەن شەشىلىپ كەلە جاتقانىنا ريزاشىلىعىن ءبىلدىردى. ۇنقاتىسۋعا قاتىسۋشىلار قىر­عىز رەسپۋبليكاسىنداعى قالىپتاس­قان ءتۇيىندى ماسەلەلەرگە, ونىڭ شە­شىلۋ تەتىكتەرىنە دە توقتالىپ, مەم­لەكەت باسشىلارىنىڭ ونداعى ساياسي جاعدايدى تۇراقتاندىرۋ, الەۋمەت­تىك-ەكونوميكالىق سەكتور مەن ين­فرا­قۇرىلىمداردى رەتتەۋ جانە ەلدىڭ ءارى قاراي دامۋىنداعى ۇستا­نىپ وتىرعان ۇستانىمىنا جىلى لەبىزدەرىن ءبىلدىردى. قىرعىز رەس­پۋبليكاسىنداعى جاعدايعا كوز جۇمىپ قاراۋعا بولمايتىندىعىن, تۇ­راقتىلىقتى ساقتاۋعا قاي-قايسى­نىڭ دا كومەك قولىن سوزۋعا دايىن ەكەندىگىن اتاپ ءوتتى. جيىندا ەقىۇ-نىڭ ءىس باسىن­داعى توراعاسى, قر مەملەكەتتىك حات­شىسى – سىرتقى ىستەر مينيس­ترى ق.ساۋداباەۆ ءسوز الىپ, ۇنقا­تىسۋعا بايلانىستى قازاقستاننىڭ ءوز ءمىن­دەتتەمەلەرىن تولىق ورىنداپ كەلە جاتقاندىعىن ورتاعا سالدى. قانات ساۋداباەۆتىڭ اتاپ وتكە­نىن­دەي, قازاقستان ەقىۇ-نىڭ ءتو­راعاسى رەتىندە باسىم باعىتتار – بەيبىت­شى­لىكتى ساقتاپ, تۇراقتىلىق­تى قالىپ­تاستىرۋعا زور ۇلەس قوسىپ كە­لەدى. وسى جيىنعا جاپون جاعى­نىڭ قا­تىسۋى كورشى ەلدەردەگى سۋ-ەنەر­گەتيكالىق رەسۋرستار, ينفرا­قۇرى­لىم, كوممۋنيكاتسيا جانە ونداعى حالىقتاردىڭ جاعدايىن جاقسارتۋ باعدارلاماسىنا قاتىستى قابىلدان­عان باستى جوبالاردىڭ جۇزەگە اسۋىنا كومەكتەسەتىندىگىنە سەنىمدى ەكەندىگىن اتاپ ءوتتى. باقتيار تايجان.