كەشە استانادا «بiرلiك» ساياسي پارتياسىنىڭ اتقارۋشى كوميتەتىنىڭ كەڭەيتىلگەن وتىرىسى ءوتىپ, وندا بىرلىكتىكتەر پرەزيدەنت نۇرسۇلتان نازارباەۆتىڭ 26 ساۋىردە وتەتىن كەزەكتەن تىس سايلاۋعا قاتىسۋعا كەلىسىمىن بەرگەنىن قولدايتىنىن جەتكىزدى.
پارتيا توراعاسى سەرىك سۇلتانعالي: «كەشە «نۇر وتان» پارتياسىنىڭ سەزىندە مەملەكەتتىك ەڭ جوعارى لاۋازىمعا نۇرسۇلتان ءابىش ۇلى نازارباەۆتىڭ كانديداتۋراسى ۇسىنىلدى. ءبىزدىڭ قوعامىمىزدىڭ ەڭ باسىم بولىگى سايلاۋعا نۇرسۇلتان نازارباەۆتىڭ قاتىسۋىن قالايدى. ءبىزدىڭ «بىرلىك» پارتياسى دا وسى ۇستانىمدا. ويتكەنى, ءبىز ودان ءارى دە وسى تانىمال تۇلعانىڭ ەل تىزگىنىن ءوز قولىندا ۇستاۋىن قالايمىز», دەدى. سونداي-اق, ول نازارباەۆتىڭ زاماناۋي قازاقستاندى قالىپتاستىرعان ادام ەكەنىنە توقتالىپ, مەملەكەت باسشىسىنىڭ باستاماسىمەن ىسكە اسىرىلىپ جاتقان «قازاقستان-2050», «نۇرلى جول» جانە باسقا دا باعدارلامالاردىڭ ەل بولاشاعى ءۇشىن قانشالىقتى ماڭىزدى ەكەنىنە ەكپىن ءتۇسىردى.
سونداي-اق, ول سوزىندە پرەزيدەنتىمىزدىڭ باسشىلىعىمەن ءىرى رەفورمالار جۇزەگە اسقانىن, قانداي اۋىر كەزەڭدەردە ەلباسىنىڭ مەملەكەتتى الىپ تولقىنداردان اۋدارماي الىپ شىققانىن, سونىڭ ناتيجەسىندە ءتيىمدى نارىقتىق ەكونوميكا قالىپتاسىپ, حالىقتىڭ ءال-اۋقاتى ارتقانىن اتاپ كورسەتتى. «مەملەكەتىمىزدە ءتيىمدى ساياسي جۇيە قالىپتاسىپ, قوعامدىق كەلىسىم سالتانات قۇردى. قازاقستاننىڭ الەم الدىنداعى بەدەلى ارتىپ, مەملەكەتىمىز الدىنا الەمنىڭ باسەكەگە قابىلەتتى 30 ەلىنىڭ قاتارىنا كىرۋ جونىندە بيىك ماقساتتار قويىپ وتىر. الىستى بولجايتىن پرەزيدەنت ۇلتتىق قور قۇرىپ, ەندى الەمدى داعدارىس شارپۋى ەسەڭگىرەتكەن تۇستا, سول قاراجاتتى ەل يگىلىگىنە باعىتتاپ وتىر», دەگەن س.سۇلتانعالي ناقتى قادامداردىڭ پارتياسى رەتىندە, وسىنداي ەل ءۇشىن ماڭىزدى كەزەڭدە ءبىز ەلباسىنا ۇلكەن سەنىم ارتىپ, ونى تولىق قولدايمىز دەپ وي قورىتتى.
پارتيانىڭ وبلىستىق, قالالىق فيليالدارىنىڭ جەتەكشىلەرى مەن وكىلدەرى, 120-دان استام بەلسەندى مۇشەلەرى مەن بۇقارالىق اقپارات قۇرالدارىنىڭ وكىلدەرى قاتىسقان وتىرىستا ءسوز العان پارتيا مۇشەسى پاۆەل كليموۆ: «ءاربىر قاراپايىم قازاقستاندىق ءۇشىن ەلباسىنىڭ مەملەكەت باسشىلىعىن ءارى قاراي جالعاستىرۋى وتە ماڭىزدى, بارلىعىمىزدىڭ ەرتەڭگى كۇنگە دەگەن سەنىمىمىز دە وسى ەسىممەن بايلانىستى. ءبىزدىڭ مەملەكەتىمىزدىڭ جەڭىستەرى مەن جەمىستەرىنىڭ باس ساۋلەتشىسى – نۇرسۇلتان نازارباەۆ», دەسە, تولەگەن قۋانىشباەۆ ەل تاعدىرى شەشىلەتىن جاۋاپتى كەزەڭدە نىق شەشىمدەر قابىلداي الاتىن تۇلعانىڭ مەملەكەتتى باسقارۋىنىڭ ماڭىزىنا توقتالىپ, «سونداي قادامدارعا باراتىن قايراتكەر دەپ نۇرسۇلتان نازارباەۆتى ەسەپتەيمىن. ولاي دەيتىن سەبەبىم, ەلباسى مەملەكەتىمىزدىڭ ورداسىن الماتىدان استاناعا كوشىرۋ تۋرالى قاۋلى قابىلداپ, ەلىمىز ىرگەسىنىڭ بەكۋىنە, ەكونوميكاسىنىڭ قارقىندى دامۋىنا جانە بولاشاعىنىڭ جارقىن بولۋىنا وراسان زور اسەرىن تيگىزگەنىنە بارلىعىمىز كۋامىز. ال سونداي كەزدە باتىل قادامعا بارىپ, بولاشاقتى الدىن الا بولجاپ, ونىڭ وڭ ناتيجە بەرەتىنىنە سەنىمدى بولدى, تاۋەلسىز ەلىمىزدىڭ تاريحىنا ءوز ەسىمىن التىن ارىپپەن جازدى», دەي كەلىپ, حالىقارالىق ارەناداعى ونىڭ بەدەلدى ساياساتكەر ەكەندىگىن, بەيبىت باستامالارى مەن بىتىمگەرلىگىن ايرىقشا اتاپ ءوتتى.
جيىندا ەلباسىنىڭ كانديداتۋراسىن قولداپ باعدات الدابەرگەنوۆ, كريستينا بەكمۇرزاەۆا ءسوز سويلەدى.
وتىرىس سوڭىندا الداعى كەزەكتەن تىس پرەزيدەنتتىك سايلاۋعا قاتىسۋ ءۇشىن قازىرگى مەملەكەت باسشىسىنىڭ كانديداتۋراسىن قولداۋ تۋرالى مالىمدەمە ءبىراۋىزدان قابىلداندى. قازاقستان ءوزىنىڭ الدىنا ەكونوميكانىڭ جاڭا ساپالىق وسۋىنە قول جەتكىزۋ جانە الەمنىڭ ەڭ باسەكەگە قابىلەتتى 30 ەلىنىڭ قاتارىنا كىرۋ جونىندەگى كەۋدەلى ماقساتتار قويىپ وتىر. مەملەكەت باسشىسى باستاما جاساعان ۇزاق مەرزىمدى «قازاقستان-2050» ستراتەگياسى, «نۇرلى جول» باعدارلاماسى, سونداي-اق, باسقا دا ستراتەگيالىق باعدارلامالار وسى ماقساتتى ىسكە اسىرۋعا ارنالعان. «سوندىقتان «بiرلiك» پارتياسى – حالىق بىرلىگى پارتياسى, ءوزىنىڭ ساياسي قاعيداتتارى مەن قۇندىلىقتارىنا سايكەس, 2015 جىلى 26 ساۋىردەگى قازاقستان رەسپۋبليكاسى پرەزيدەنتىنىڭ سايلاۋىنا قاتىسۋ ءۇشىن نۇرسۇلتان نازارباەۆتىڭ كانديداتۋراسىن بەرىك قولدايتىنىن بىلدىرەدى», دەلىنگەن مالىمدەمەدە.
انار تولەۋحانقىزى,
«ەگەمەن قازاقستان».