استانا. 21 مامىر. كەشە فۋتبولدان قازاقستان كۋبوگىنىڭ شيرەك فينالدىق باسەكەلەرى ءوتتى. بۇل تۋرالى egemen.kz حابارلادى.
ءتورت كەزدەسۋ دە تارتىسقا تولى بولدى. اسىرەسە, كوكشەتاۋدا وتكەن جەرگىلىكتى «وقجەتپەس» پەن «اقتوبە» اراسىنداعى ماتچ ەرەكشە ەستە قالدى. الاڭ يەلەرى سوڭعى مينۋتقا دەيىن بەلسەندىلىك تانىتقانىمەن, ساتتىلىك جولداس بولمادى.
سونىمەن قاتار, الماتىداعى «قايرات» پەن «تاراز» اراسىنداعى ويىن دا جانكۇيەرلەردىڭ كوڭىلىنەن شىقتى. پرەمەر-ليگادا ءوز الاڭىندا وتكىزگەن سوڭعى 2 ويىندا جەڭىلگەن «قايرات» بۇل ماتچقا ەرەكشە جاۋاپكەرشىلىكپەن قارادى. ناتيجەسىندە قارسىلاسىن ءىرى ەسەپپەن جەڭىپ, جارىستىڭ جارتىلاي فينالىنا شىقتى.
نەگىزگى ۋاقىتتا «قايسارمەن» تەڭ ويناعان (1:1) «استانا» قوسىمشا ەكى تايمدا جەڭىس گولىن سوعىپ, كەلەسى كەزەڭنىڭ جولداماسىن يەمدەندى. سونداي-اق, ءوز الاڭىندا «جەتىسۋدىڭ» قاقپاسىنا جاۋاپسىز 2 گول سوققان «توبىل» دا كۋبوكتان ءۇمىتىن ۇزگەن جوق.
شيرەك فينالدىق ويىنداردىڭ ناتيجەلەرى.
«توبىل» (قوستاناي) – «جەتىسۋ» (تالدىقورعان) – 2:0 (1:0)
گولدار: شيمكوۆيچ 6, دەلي 83.
«وقجەتپەس» (كوكشەتاۋ) – «اقتوبە» (اقتوبە) 2:3 (1:3)
گولدار: روتكوۆيچ (پەنالتي) 25, ازوۆسكي 90 – پيززەلي 20, جۋلپا 41, دانيلو 45+1.
«قايسار» (قىزىلوردا) – «استانا» (استانا) – 1:2 (1:0)
گولدار: يۋنۋزوۆيچ 45 – تۆۋماسي 69, 110.
«قايرات» (الماتى) – «تاراز» (تاراز) 4:1
گولدار: گوۋ 6, 58, يسلامحان 13, كوكەەۆ 87 – مۋحۋتدينوۆ (پەنالتي) 62.
جارتىلاي فينالداعى قارسىلاستار جەرەبە ارقىلى انىقتالادى. بۇل ساتى ەكى ويىننان تۇرادى. العاشقى كەزدەسۋ 2 ماۋسىمدا وتسە, قارىمتا ويىندار 23 قىركۇيەككە جوسپارلانعان.
ەلامان قوڭىر.
دەرەك: egemen.kz.
سۋرەت: kpfl.kz.