قوستاناي وبلىسىنىڭ وڭتۇستىگىندەگى امانگەلدى اۋدانىندا كيىكتىڭ قىرىلۋى توقتاماي تۇر, قايتا ۇدەپ بارا جاتقان سىڭايى بار. مامانداردىڭ مالىمەتىنشە, ولگەن كيىكتىڭ سانى ءبىر كۇننىڭ ىشىندە ەكى ەسە كوبەيىپ, 20 مىڭعا تايادى. كومىلىپ, جويىلعان ولەكسەنىڭ سانى 19 231 دەپ حابارلاندى.
الدىن الا بەلگىلى بولعان مالىمەتتەرگە سۇيەنسەك, ولاردىڭ جاپپاي قىرىلۋىنا پاستەرەللەز اۋرۋى سەبەپ بولۋى مۇمكىن. بىراق بۇل ناقتى دالەل ەمەس. كيىك ولە باستاعان مامىر ايىنىڭ 11-13 كۇندەرى كيىك جايىلعان جەردىڭ توپىراعىنان, سۋىنان, ولەكسەلەردىڭ بيولوگيالىق ماتەريالىنان سىنامالار الىنىپ, رەسپۋبليكالىق لابوراتورياعا جىبەرىلگەن بولاتىن. ونىڭ ساراپتاۋ, زەرتتەۋ قورىتىندىسىنا ءبىرشاما ۋاقىت كەرەك بولعاندىقتان, دالا سۇلۋىنىڭ ناقتى نەدەن قىرىلۋ سەبەبى ازىرشە انىقتالماي وتىر. وبلىستىق ورمان شارۋاشىلىعى جانە جانۋارلار دۇنيەسى ينسپەكتسياسى ماماندارىنىڭ مالىمەتىنشە, «التىن دالا» مەملەكەتتىك تابيعي رەزەرۆاتىنىڭ امانگەلدى اۋدانىنداعى بولىگىندە 80 مىڭداي كيىك جايىلاتىن.
قازىرگى تاڭدا توتەنشە جاعدايدىڭ سالدارىن جويۋ جۇمىستارى جۇرگىزىلۋدە. وعان 515 ادام جانە 76 تەحنيكا جۇمىلدىرىلعان. ءوڭىردىڭ وڭتۇستىگىندەگى امانگەلدى اۋدانىنىڭ اۋماعىندا ارنايى لاگەرلەر قۇرىلىپ, 100 ادام ورنالاستىرىلدى. تۇندە تۇنەۋ ءۇشىن اۋدان اكىمدىگى 3 كيىز ءۇي, اقمولا وبلىسى توتەنشە جاعدايلار دەپارتامەنتى – 3, قوستاناي وبلىسى توتەنشە جاعدايلار دەپارتامەنتى اسحاناعا ارنالعان – 1, №6697 اسكەري ءبولىمى 6 شاتىر تىكتى. ولاردىڭ ۇشەۋى قوسالقى ماقساتتا. جەكە قۇرام اۋىز سۋ, تەحنيكا جانە جانارمايمەن قامتاماسىز ەتىلگەن. سونداي-اق, اۋدان اكىمدىگى, اتالعان اسكەري ءبولىم جانە «التىن دالا» مەملەكەتتىك تابيعي رەزەرۆاتىنىڭ كومەگىمەن 3 تاماقتاندىرۋ پۋنكتى جۇمىس ىستەۋدە.
وبلىس اكىمى نۇرالى سادۋاقاسوۆ اپپارات ماجىلىسىندە ەگەر كيىكتىڭ قىرىلىپ جاتقانى جۇقپالى اۋرۋدان بولا قالعان جاعدايدا, ونىڭ ادامدارعا جۇقپاۋى ءۇشىن بارلىق الدىن الۋ جۇمىستارى جۇرگىزىلىپ جاتقانىن ايتتى. قازىر رەزەرۆاتتاعى وقيعا بولعان جەردە وبلىس اكىمىنىڭ ورىنباسارى بازىل جاقىپوۆ جەتەكشىلىك ەتەتىن, قۇرامىندا ءتۇرلى ۆەدومستۆولاردىڭ ماماندارى بار ارنايى كوميسسيا دا جۇمىس ىستەپ جاتىر. سونىمەن قاتار, رەزەرۆات ورنالاسقان امانگەلدى, جانگەلدين اۋداندارى باسشىلارى دا وقيعا بولعان جەردە ءجۇر, مۇمكىندىگىنشە بارلىق كومەكتەرىن كورسەتۋدە.
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
امانگەلدى اۋدانى.