استانا قالاسىنىڭ اكىمى ادىلبەك جاقسىبەكوۆ ليتۆا رەسپۋبليكاسىنىڭ پرەمەر-ءمينيسترى الگيرداس بۋتكياۆيچيۋسپەن كەزدەستى. ەكى جاق ساۋدا-ەكونوميكالىق, عىلىمي-تەحنيكالىق جانە مادەني بايلانىستار بويىنشا بىرقاتار ماسەلەلەردى تالقىلادى.
ەلوردا اكىمى ەكى ەلدى بايلانىستىراتىن جانە قارقىندى دامىپ جاتقان ءتۇرلى سالالارداعى ءوزارا ىنتىماقتاستىققا توقتالىپ ءوتتى. ستاتيستيكالىق مالىمەتتەرگە سايكەس, وتكەن جىلدىڭ قورىتىندىسى بويىنشا قازاقستان مەن ليتۆا اراسىنداعى تاۋار اينالىمى 37%-عا ارتىپ, 436,5 ميلليون اقش دوللارىن قۇراعان. – پوستكەڭەستىك كەڭىستىكتەگى اعىمداعى ساياسي جاعدايعا بايلانىستى قازاقستان ليتۆا ءونىمىن ەۋرازيالىق ەكونوميكالىق وداققا وتكىزۋدىڭ ماڭىزدى ارناسى بولا الار ەدى. بۇل تۇرعىدان العاندا, ءبىز ورتاق كاسىپورىندار اشۋعا مۇددەلىمىز, ول ءۇشىن قالادا «استانا – جاڭا قالا» ارنايى ەكونوميكالىق ايماعى سەكىلدى ءتيىمدى الاڭ قۇرىلعان. وعان قاتىسۋشىلار ايتارلىقتاي كەدەندىك جانە سالىقتىق جەڭىلدىكتەرگە يە بولادى, – دەدى قالا باسشىسى. اتاپ ءوتۋ كەرەك, ءبىر اپتا بۇرىن مەملەكەتتەردىڭ كەلىسىمدىك-قۇقىقتىق قارىم-قاتىناسىنا 15 جىل تولدى. وسى ورايدا, ليتۆانىڭ ۇكىمەت باسشىسى استانا مەن ۆيلنيۋس اراسىنداعى قارىم-قاتىناستىڭ قارقىندى دامىپ كەلە جاتقانىن اتاپ ءوتىپ, ءوزارا ىنتىماقتاستىقتىڭ ودان ءارى دامۋىنا ءۇمىت ءبىلدىردى. – ۆيلنيۋسپەن ىنتىماقتاستىق جانە جالپى ليتۆالىق كاسىپكەرلەرمەن بايلانىس ورناتۋ ءبىزدىڭ تاراپتان ۇلكەن قىزىعۋشىلىق تۋدىرادى. اسىرەسە, قالا شارۋاشىلىعى, دەنساۋلىق ساقتاۋ, ءبىلىم بەرۋ سالالارىنداعى «اقىلدى» تەحنولوگيالار سىندى باعىتتار بويىنشا قىزىعۋشىلىق بار. بۇل ساپارىڭىز قازاقستان-ليتۆا قارىم-قاتىناسىنا, سونىڭ ىشىندە وڭىرارالىق دەڭگەيدە قوسىمشا سەرپىن بەرەتىنىنە سەنىمدىمىن, – دەپ قورىتتى ءسوزىن قالا باسشىسى.
«ەگەمەن-اقپارات».