ايەل وتباسىنىڭ عانا ەمەس, وتاننىڭ دا ۇيىتقىسى

مەرەكەلەرىڭىزبەن, اسىل انالار, اياۋلى ارۋلار!

 8 ناۋرىز – حالىقارالىق ايەلدەر كۇنى

كەشە مەملەكەت باسشىسى نۇرسۇلتان نازارباەۆ 8 ناۋرىز – حالىقارالىق ايەلدەر كۇنى مەرەكەسىنە وراي قازاقستان ايەلدەرى قوعامداستىعىنىڭ ءبىر توپ وكىلدەرىمەن كەزدەستى. كوكتەم جانە ايەل-انا! ءبىرىن ءبىرى تولىقتىرعان قانداي ۇيلەسىم دەسەڭىزشى! ءيا, ايەلدەر مەرەكەسىندە ادام جانىن عاجايىپ سەزىمگە بولەيتىن ەرەكشە كۇي دە وسىنداي كەرەمەت ەكى ۇعىمنىڭ ۇشتاسقاندىعىنان تۋىنداسا كەرەك. ەندەشە, قار استىنان قىلتيىپ بايشەشەك بوي كوتەرگەندە جەر-دۇنيەنى بۋساندىرعان كوكتەمنىڭ العاشقى حابارشىسىنداي بولىپ انالار مەرەكەسى باستالاتىنى دا بەكەر بولماس. كۇننىڭ كوزى نۇرىن توگىپ, اق قار-كوك مۇز ەرىپ, تال-شىبىقتار بۇرلەنىپ, دالا بىتكەن تۇرلەنىپ جاتقان شاقتىڭ قۇدىرەتى دە سول كوكتەمنىڭ شۋاقتى نۇرىنان ءنار الادى ەمەس پە؟ كەشە وسىناۋ كەرەمەت مەرەكە قار­ساڭىندا استانا تورىندە وتكەن ەلبا­سىنىڭ ايەلدەر قاۋىمىمەن كەزدەسۋى دە «كوكتەم شۋاعى» دەپ اتالدى. مۇنداي كەزدەسۋ انالار مەرەكەسى قارساڭىندا اقوردادا وتەتىن جىل سايىنعى داستۇرگە اينالىپ كەلەدى. وعان ادەتتەگىدەي ەلىمىزدىڭ بارلىق وڭىرلەرىنەن كەلگەن, ەكونوميكانىڭ ءتۇرلى سەكتورلارىندا, مادەني-الەۋمەتتىك سالالاردا جانە مەملەكەتتىك قىزمەتتە ىستەيتىن ايەل جۇرتىنىڭ وكىلدەرى قاتىستى. مەملەكەت باسشىسى ولاردى كەلە جاتقان حالىقارالىق ايەلدەر كۇنىمەن قۇتتىقتاپ, قازاقستاننىڭ بارشا ايەلدەر قاۋىمىنا باقىت, دەنساۋلىق جانە باق-بەرەكە تىلەدى. نۇرسۇلتان نازارباەۆ مەملەكەتتىك ساياساتتىڭ باسىم باعىتىنىڭ ءبىرى ايەلدەردىڭ ءال-اۋقاتىن جاقسارتۋ ەكەنىن اتاپ ءوتتى. تاۋەلسىزدىك جىلدارىن­دا ءبىز كوپ نارسەنى ەڭسەردىك. قازىر ەلىمىزدە بەرەكە مەن تىنىشتىق ورنادى. «قازاقستان-2050» ستراتەگياسى, «نۇرلى جول» جانە باسقا باعدارلامالار وسىنى كوزدەيدى. ايەلدەر وتباسىن ساقتاۋشى رەتىندە باق-بەرەكەنى ەڭ الدىمەن بالالارىنان, داستارقانىنان سەزىنەدى, سول ارقىلى مەملەكەتتىڭ قام­قورلىعىن سەزىنەدى, دەدى قازاقستان پرەزيدەنتى. مەملەكەت باسشىسى, سونداي-اق, ەلدەگى ايەلدەر قاۋىمى وكىلدەرىنىڭ بەلسەندىلىگى ارتىپ كەلە جاتقانىنا توقتالدى. بۇگىندە مەملەكەتتىك قىزمەتتەگى قىزمەتكەرلەردىڭ باسىم بولىگىن ايەلدەر قۇرايدى. دەن­ساۋلىق ساقتاۋ سالاسىندا ولاردىڭ ۇلەسى 75 پايىزعا, ءبىلىم بەرۋ سالاسىندا 65 پايىزعا دەيىن جەتەدى. بيزنەستەگى باسشى­لاردىڭ دا  40 پايىزى – نازىك جاندى ارۋلار, دەدى نۇرسۇلتان نازارباەۆ. سونىمەن قاتار, ەلباسى تاۋەل­سىزدىك جىل­دارىندا تىنىشتىق پەن تۇراق­تى­لىقتى ساقتاۋدا ايەلدەر قاۋىمىنىڭ ۇلەسى زور بولعانىنا نازار اۋداردى. ايەل – وتبا­سىنىڭ ۇيىتقىسى, التىن بەسىكتىڭ يەسى. ەل بولاشاعىنىڭ بارلىعى ايەل ازامات­تارىنىڭ قولىنان وتەدى. سوندىقتان, سىزدەر ارقىلى بارشا قازاقستاننىڭ ايەل­دەرىن شىن جۇرەگىممەن قۇتتىقتاعىم كەلەدى. ەش ۋاقىتتا جۇزدەرىڭىزدەن كۇلكى كەتپەسىن دەدى مەملەكەت باسشىسى. ەلباسى ءسوز اراسىندا ەلىمىزدە دەمو­گرا­فيالىق ءوسۋ جالعاسىپ كەلە جاتقانىنا, تەك بىلتىردىڭ وزىندە دۇنيەگە 400 مىڭ ءسابي كەلگەنىنە نازار اۋداردى. نۇرسۇلتان نازارباەۆ, سونداي-اق, بيىل ەل تاۋەلسىزدىگىنە 24 جىل تولاتىنىن ەسكە سالدى. بۇل ۋاقىت قاس-قاعىمدا وتە شىقتى, سەبەبى, ءبارىمىزدىڭ نازارىمىز جۇمىستا بولدى. بۇگىن سونىڭ ناتيجەسىن كورىپ وتىرمىز – ءبىز قۇرعان مەملەكەتتى بۇكىل الەم تانيدى, قۇرمەتتەيدى, دەدى قازاقستان پرەزيدەنتى. وسى رەتتە مەملەكەت باسشىسى ەلدەگى تۇراقتىلىقتىڭ ارقاسىندا ەكونوميكامىز قارقىندى دامىپ كەلە جاتقانىن باسا ايتتى. بۇگىندە جەر بەتىندە, بۇۇ مالىمەتى بويىنشا, 800 ميلليون ادام اشتىقتان جاپا شەگۋدە. جىل سايىن ازىق تاپشىلىعىنىڭ كەسىرىنەن 6 ميلليون بالا, 30 ميلليون ەرەسەك ادام ولەدى. 400 ميلليون ادام اۋىزسۋعا زارۋلىك زاردابىن تارتادى. جىل سايىن پلانەتامىزدا 30 اسكەري قاقتىعىس بولىپ, سونىڭ سالدارىنان ساعات سايىن 40 ادام قازا تابادى. سوندىقتان, ەلدىڭ ىشكى تۇراقتىلىعىن كوزدىڭ قاراشىعىنداي قورعاۋعا ءتيىسپىز, دەدى نۇرسۇلتان نازارباەۆ. سونداي-اق, ەلباسى بۇگىنگى جاس­تار اراسىنداعى كەيبىر احۋال دا ءوزىن الاڭ­داتاتىنىن جەتكىزدى. اجىراسۋلار سەكىلدى باسقا دا نازار اۋداراتىن ماسەلەلەر بار­شىلىق, ولار بۇرىن دا بولاتىن. قازىر ءبارى ەركىندەۋ بولىپ كەتتى. دەگەنمەن, قوعامداعى مورالدىق احۋال دا, قۇرىلىم دا قاشاندا ايەلدەرگە تاۋەلدى, دەگەن پرەزيدەنت ۇرپاق تاربيەسىندەگى ايەل­دەردىڭ ايرىقشا ءرولىن اتادى. ءسوز اراسىندا مەملەكەت باسشىسى قازىرگى جاستار اراسىندا ماڭىزدى ماسەلەنىڭ ءبىرى باسپانالى بولۋ ءوز شەشىمىن تاۋىپ كەلە جاتقانىنا توقتالدى. ياعني, تۇرعىن ءۇي قۇرىلىسىنىڭ جاڭا باعدارلاماسى بويىنشا جالعا بەرىلەتىن باسپانانىڭ جارتىسى جاستارعا تيەسىلى بولادى. ارينە, باعدارلاما بويىنشا باسپاناعا يە بولاتىن جاستار جۇمىس ىستەۋلەرى كەرەك. وندا العاشقى باستاپقى جارنا دەگەن جوق. كەزەكپەن جالعا باس­پانا الادى, سوسىن جالعا الىنعان قاراجاتىن تولەيدى. ال بۇل تولەم پاتەر قۇنىنا دا كەتە بەرەدى. ونسىز دا پاتەر جالداپ تۇرىپ جاتىر ەمەس پە جاستار؟ سول سە­كىلدى بۇعان دا تولەيدى, ال ونىڭ تولەمى پاتەر قۇنىنا تۇسەدى. بىرتىندەپ, وسىلايشا پاتەر جاستاردىڭ مەنشىگىنە وتەتىن بولادى, دەدى نۇرسۇلتان نازارباەۆ. پرە­زيدەنت مۇنداي باعدارلامانىڭ ەشبىر ەلدە جوق ەكەنىن, قازاقستان عانا وسىنداي قادامعا بارىپ وتىرعانىن جەتكىزدى. باسقا ماسەلەلەر دە وسىلاي شەشىمىن تاۋىپ جاتىر, بىرتىندەپ تابا بەرەدى دە, – دەدى نۇرسۇلتان نازارباەۆ. ەلباسى ايەلدەر قاۋىمىمەن اڭگىمەدە قازىر قىزۋ تالقىعا تۇسكەن ەلىمىزدەگى سايلاۋ ناۋقانى تۋرالى دا ءسوز قوزعادى. قازىر سايلاۋ ناۋقانى باستالىپ تا كەتتى. كەزەكتەن تىس پرەزيدەنتتىك سايلاۋ تۋرالى باستامانى دا نەگىزىنەن ايەلدەر قاۋىمى قولدادى. مەن كۇن سايىن مىڭداعان حاتتار الىپ جاتىرمىن. بۇگىن ەرتەڭگىسىن دە ءبىر قۇشاق حات كەلدى. ولاردىڭ بارلىعى سايلاۋدى قولداپ, مەنەن ءوز كانديداتۋرامدى ۇسىنۋدى سۇراپ جاتىر, دەدى نۇرسۇلتان نازارباەۆ. مەنىڭ جەكە جوسپارىم مۇلدەم باسقا بولاتىن, شىنىمدى ايتايىن. قازاقستاندى جىلدار بويى باسقارىپ كەلەمىن, تاۋەلسىزدىكتىڭ العاشقى جىلىنان مەملەكەتتى قالىپتاستىرىپ, قۇردىق. الايدا, بۇكىلحالىقتىق تىلەكتەر, ەلدىڭ نيەتى, جۇرتتىڭ قالاۋى بار, ونى دا ەسكەرۋ قاجەت. سوندىقتان دا, سىزدەرمەن الداعى جوسپارىمدى, قادامىمدى اقىلداسۋعا دا بولادى عوي دەپ ويلايمىن, دەدى ەلباسى. كەزدەسۋگە مەملەكەتتىك حاتشى, پرە­زي­دەنت جانىنداعى ايەلدەرى ىستەرى جانە وتباسىلىق-دەموگرافيالىق ساياسات ءجو­نىن­دەگى ۇلتتىق كوميسسيانىڭ ءتورايىمى گۇلشارا ابدىقالىقوۆا, پارلامەنت ءماجىلىسىنىڭ دەپۋتاتى گۇلجان قاراقۇسوۆا, دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا, پارلامەنت ءماجىلىسىنىڭ دەپۋتاتى يرينا ارونوۆا, سەمەي قالاسىنىڭ يننوۆاتسيالىق گۋما­نيتارلىق-زاڭ ۋنيۆەرسيتەتىنىڭ رەكتورى شىرىن قۇرمانباەۆا, «قازاق ارۋى-2014» رەسپۋبليكالىق ارۋلار بايقاۋىنىڭ جەڭىمپازى گۇلناز جولانوۆا, ءارتىس بيبىگۇل ءسۇيىنشالينا, «استانا وپەرا» موبت ءارتىسى سەرينا سۋناگاۆا, تەننيسشى زارينا دياس, «پلانەتا پاتشايىمى-2014» اتاعىنىڭ يەگەرى اقنۇر جۇماباەۆا, بوكس­تان الەم چەمپيونى نازىم قىزايباي, «قازاقستان» رترك بالالارعا ارنالعان «بالاپان» تەلەارناسىنىڭ ديرەكتورى ءلايلا سۇلتانقىزى, ۆولەيبولشى ءسابينا التىنبەكوۆا, تانىمال «تاتيانالار تريوسىنىڭ» قاتىسۋشىلارى تاتيانا بۋرميستروۆا, تاتيانا پولتاۆسكايا جانە تاتيانا مارتىنەنكو, «Turkvizion-2014» ءىى حالىقارالىق ءان كونكۋرسىنىڭ جەڭىمپازى جانار دۇعالوۆا, كوپبالالى انا مەرەكە اقسيەۆا, قازاقستان جاستارىنىڭ اراسىندا «جاسىل باستامالاردى» ىلگەرىلەتۋ باستاماشىسى تاتيانا نەمتسان, اسكەري قىزمەتشى دينارا رىسبەكوۆا, پروفەسسور, قازاقستان ينجەنەرلىك اكادەمياسىنىڭ كوررەسپوندەنت-مۇشەسى قۇرالاي اققوشقاروۆا, «Astana Solar» فوتوەلەكترلىك مودۋلدەر قۇراستىرۋ زاۋىتىنىڭ تەحنيگى اينۇر تاششانوۆا, جەكە كاسىپكەر اقتولقىن قۇرماشوۆا, قوستاناي وبلىسىنان اۋداندىق اۋرۋحانانىڭ باس دارىگەرى لاريسا فينك, ق.ساتباەۆ اتىنداعى ەكىباستۇز ينجەنەرلىك-تەحنيكالىق ينستيتۋتىنىڭ دوتسەنتى داليدا سيۆاراكشا, «استانا وپەرا» موبت جەتەكشى ءسوليسى سالتانات احمەتوۆا قاتىستى. كەزدەسۋگە قاتىسۋشىلار جەكە-جەكە ءسوز سويلەپ, مەملەكەت باسشىسىنا انا مەن بالاعا قامقورلىق جاساۋعا, وتباسىلىق قۇندىلىقتاردى نىعايتۋعا باعىتتالعان ساياسات جۇرگىزىپ وتىرعانى ءۇشىن العىستارىن ايتتى. سونىمەن قاتار, حالىقتىڭ جانە ءاربىر قازاقستاندىق وتباسىنىڭ ءال-اۋقاتىن قامتاماسىز ەتۋگە باعىتتالعان باعدارلامالاردى جۇزەگە اسىرۋدى ءارى قاراي جالعاستىرۋدىڭ ماڭىزدىلىعىن اتاپ ءوتتى. «اسا قۇرمەتتى نۇرسۇلتان ءابىش ۇلى! مەن كوپبالالى انامىن. جۇبايىمىز ەكەۋمىز اللا بەرگەن 7 بالامىزدى تاربيەلەپ وتىرمىز. ءسىزدىڭ تاپسىرماڭىز بويىنشا قولعا الىنعان «بالاپان» باعدارلاماسى ءۇشىن انالار اتىنان زور العىسىمدى ايتامىن. بۇگىنگى تاڭدا تەك وسى باعدارلامانىڭ اياسىندا 4000 بالاباقشا اشىلدى. باعدارلاما «نۇرلى جول» ارقىلى جالعاسىپ, وعان 20 ميلليارد تەڭگە قاراجات بولىنەتىنىن قۋانا قارسى الدىق. ءاربىر انا مەن بالانىڭ قامىن ويلايتىن سىزدەي پرەزيدەنتى بار ەل باقىتتى. ءبىزدىڭ انالار ۇرپاعىنىڭ بولاشاعىنا ەش الاڭدامايدى.سول ءۇشىن سىزگە راحمەت!» – دەپ كوپبالالى انا مەرەكە اقسيەۆا پرەزيدەنتكە انالار اتىنان العىسىن ايتسا, باسقالار ونەر, سپورت سالالارىنداعى ەلباسىنىڭ ەرەن ەڭبەگىن باعالاپ, ايرىقشا قامقورلىعىنا راحمەتىن جەتكىزدى. اسىرەسە, جاستار جاعى ەلباسىن ۇلگى تۇتاتىندارىن ايتىپ, ونىمەن بۇل جۇزدەسۋلەرىن ەرەكشە ەستە ساقتايتىندىقتارىن جەتكىزدى. «سىزبەن كەزدەسۋ كوپشىلىك ءۇشىن ارمان. مەنىڭ ارمانىم بۇگىن ەكىنشى رەت ورىندالىپ وتىر. مەن جاقىندا «Turkvision-2014» حالىقارالىق ءان كونكۋرسىندا جەڭىمپاز اتاندىم. «مەن بۇل جەڭىسىمدى ەلباسىما ارنايمىن» دەپ ماقتانىشپەن جار سالدىم. وسىلاي مادەنيەتىمىزدى قولداۋداعى ءسىزدىڭ ولشەۋسىز ەڭبەگىڭىزگە پەرزەنتتىك العىسىمدى بىلدىرگىم كەلدى. ءبىز, قازاقستان ونەرىنىڭ جاس دارىندارى, ءسىزدىڭ قامقورلىعىڭىزبەن ءالى تالاي اسقار اسۋلاردى الىپ, ەلىمىزدى الەمگە تانىتا بەرەمىز. راحمەت سىزگە!» – دەدى ءانشى جانار دۇعالوۆا. سونداي-اق, «قازاق ارۋى-2014» رەسپۋبليكالىق كونكۋرسىنىڭ جەڭىمپازى گۇلناز جولانوۆا دا جاستار اتىنان سويلەدى. «مەن ستۋدەنتپىن. وتكەن جىلى رەسپۋبليكالىق «قازاق ارۋى-2014» بايقاۋىنىڭ جەڭىمپازى اتاندىم. بۇل جەتىستىكتەرىم اتا-انامنىڭ تاربيەسىمەن بىرگە ءسىزدىڭ جاس ۇرپاقتىڭ جاڭا كەلبەتىنە ايرىقشا نازار اۋدارۋىڭىزدىڭ جەمىسى دەپ ويلايمىن. ءسىز «قازاقستان-2050» ستراتەگياسىندا «قىزدارىمىزدىڭ تاربيەسىنە كوپ كوڭىل ءبولۋىمىز كەرەك. ولار – بولاشاق جار, بولاشاق انا, شاڭىراقتىڭ شىراعى» دەگەن ەدىڭىز. ءسىزدىڭ سوزدەرىڭىز جاستاردىڭ ازاماتتىق تۇلعاسىن قالىپتاستىراتىن شامشىراق ىسپەتتى. مەن ەلىمىزدىڭ ءاربىر بويجەتكەنىنە اكەلىك قامقورلىق جاسايتىن سىزدەي ەلباسىسى بار حالىقتىڭ قىزى ەكەنىمدى ماقتان تۇتامىن, دەدى قازاق ارۋى. بۇل تىلەكتى نازىكتىگىنە قاراماستان, اسكەر قاتارىندا قايسارلىق تانىتىپ جۇرگەن مەرگەن قىز دينارا رىس­بەكوۆا جالعاستىردى. «مەن قارۋلى كۇش­تەر قاتارىندا مەرگەن قىزمەتىن اتقا­رامىن. قازاقتىڭ باتىر قىزى ءاليا مولداعۇلوۆانىڭ ءىزىن جالعاستىرۋ – مەن ءۇشىن ماقتانىش. ءسىز –جاڭا جىلدا ءاربىر ارداگەردى الداعى ۇلى جەڭىستىڭ 70 جىلدىعىمەن قۇتتىقتاعان بىردەن-ءبىر پرەزيدەنتسىز. وتان قاۋىپسىزدىگىنىڭ ەڭ باستى كۇزەتشىسى – ءسىزسىز! ءسىز الەمنىڭ بارلىق ەلدەرىمەن دوستىق قاتىناس جاسادىڭىز. سىزدەي باسشىسى بار قازاقستانعا ەشبىر قاۋىپ جوق. ەلىمىزدە وق اتىلماي, ساربازداردىڭ شەبەرلىگى تەك جاتتىعۋدا شىڭدالۋى – ءسىزدىڭ ساياساتىڭىزدىڭ ارقاسى», – دەدى د.رىسبەكوۆا. ايەلدەر قاۋىمى قازىرگى قوعامدا قاي سالادا بولماسىن جەمىستى ەڭبەك ەتىپ, ءتۇرلى ناتيجەلەرگە قول جەتكىزۋدە. سوڭعى كەزدەرى ەلباسى ەرەكشە نازار اۋدارىپ, مەملەكەت تاراپىنان قامقورلىقتى كۇشەيتكەن كاسىپكەرلىك سالاسىندا دا ايەل-انالار از ەمەس. سونىڭ ءبىرى كاسىپكەر-انا ا.قۇرماشەۆا كەزدەسۋدە ءوزىنىڭ كاسىبى جايىندا بايانداي وتىرىپ, پرەزيدەنتتىڭ جاستىق شاعىن ويعا ورالتتى. «مەن جەكە كاسىپكەرمىن. شارۋاشىلىعىمىزدا 29 گەكتار جەرگە اپورت, سەمەريانكا, ورىك, شيە سياقتى جەمىس اعاشتارىن وتىرعىزىپ, باپتاۋدامىز. ماعان «بالالىق شاعىمنىڭ اسپانى» اتتى فيلم ەرەكشە اسەر قالدىردى. اسىرەسە, ءسابي سۇلتان الما جەگىسى كەلگەندە ءابىش اتا ءتۇننىڭ جارىمىنا, قىستىڭ ايازىنا قاراماي, سىزگە نارتتاي جانعان اپورت تاۋىپ اكەلىپ بەرەتىن تۇسى ايرىقشا اسەرلى. حالقىڭىز قالاسا, اسپانداعى ايدى دا اپەرۋگە دايىن اكەلىك ماحاببات سىزگە قانمەن دارىعان دەپ وي ءتۇيدىم. ءبىز ءابىش اتانىڭ الماسىنداي اپورتتار ءوسىرىپ, ءبىر كەزدە اتاعى جەر جارعان الماتىنىڭ اپورتىن حالقىمىزعا قايتارۋ ءۇشىن ەڭبەك ەتۋدەمىز. ءسىزدىڭ ارقاڭىزدا بۇگىندە اۋىل قايتا تۇلەدى. ءسىز دە باعبانسىز. ءسىزدىڭ ارقاڭىزدا قازاقستان اتتى الىپ بايتەرەك ۇرپاقتارىنا ماڭگى جەمىس بەرىپ تۇراتىن ماۋەلى ماڭگىلىك ەلگە اينالدى», – دەدى ول. قىزدار اراسىندا بوكستان الەم چەمپيونى نازىم قىزايباي دا پرەزيدەنتكە ءوزىنىڭ اقجارما اق تىلەگىن جەتكىزدى. «قازاقستاننىڭ ءانۇرانى ويناپ, كوك بايراعىمىز كوككە كوتەرىلگەندە مەن «ەلىم ءۇشىن, ەلباسىم ءۇشىن» دەپ تۇردىم. ءاربىر وتاندىق سپورتشىنىڭ جەڭىسى – ەل سپورتىنىڭ دامۋىنا بارلىق جاعدايدى جاساپ وتىرعان ءسىزدىڭ جەڭىسىڭىز! سىزگە شەكسىز العىسىمدى ايتامىن جانە شارشى الاڭداعى ءاربىر جەڭىسىمدى سىزگە ارنايمىن! ءسىزدىڭ «قازاقستان ايەلدەرى ەلدىكتىڭ جۇگىن ەرلەرمەن بىردەي ارقالاپ كەلەدى» دەگەن ءسوزىڭىز ماعان ۇلكەن وي سالدى. بوكس – قىزدارعا ءتان ەمەس سپورت دەپ جاتادى. ەل شەتىنە جاۋ تيگەندە قولدارىنا نايزا الىپ, ەرلەرمەن بىرگە جاۋعا شاپقان قازاقتىڭ قىزدارى تاريحتان بەلگىلى. ءبىز – سول باتىر انالارىمىزدىڭ ءىزباسارلارىمىز. الداعى بارلىق جارىستاردا تۋعان ەلىمنىڭ تۋىن كوككە كوتەرۋگە بار كۇش-جىگەرىمدى سالىپ, ەڭبەك ەتۋگە ۋادە بەرەمىن», – دەگەن جىگەرلى قىزدىڭ جالىندى سوزدەرى ەلباسىن ەرەكشە ءسۇيسىندىردى. ارينە, نازىكجاندى, سىمباتتى قىزدىڭ وسىنداي سپورت تۇرىنەن چەمپيون اتانۋى, ارينە, ايەلدىڭ قۇدىرەتتىلىگىنە تاعى ءبىر باس يدىرگەندەي. «بالاپان» تەلەارناسىنىڭ ديرەكتورى ءلايلا سۇلتانقىزى دا ەلباسىنا انالار اتىنان العىس ايتتى. «اسا مارتەبەلى ەلباسى! مەن – ءسىزدىڭ تىكەلەي تاپسىرماڭىزبەن اشىلعان «بالاپان» تەلەارناسىنىڭ ديرەكتورىمىن. بۇگىنگى زامان – بالانىڭ ءتىلى ۇيىندەگى تەلەديدار قاي تىلدە سويلەسە سول تىلدە شىعاتىن زامان. بۇل رەتتە «بالاپان» ءاربىر ءۇيدىڭ تورىنەن ورىن الدى. الەمدەگى ەڭ ءىرى انيماتسيالىق كومپانيا – «MAJOR-Disneyمەن» تمد اۋماعىندا العاشقى بولىپ ۇزاق مەرزىمدى كەلىسىمشارت جاسادىق. ۇرپاققا ۇلتتىق تاربيە بەرەتىن وتاندىق ونىمدەرىمىز دە ەفيردىڭ اۋقىمدى بولىگىن الادى. ءسىزدىڭ ۇرپاقتىڭ تاربيەسىنە, ۇلتتىڭ بولاشاعىنا تىم تەرەڭنەن قاراپ, ارىدەن ساياسات جۇرگىزىپ وتىرعانىڭىزدى تۇسىنەمىز, قولدايمىز, سول ءۇشىن زور العىس بىلدىرەمىز», – دەدى ول. كەشەگى كەزدەسۋدە ەرەكشە اتاپ وتەرلىگى – ءتورت بىردەي تاتيانانىڭ قاتىسۋى. ونىڭ ۇشەۋى كەزىندە ەلگە «تاتيانالار تريوسىمەن» ەرەكشە تانىلعان, قازاق اندەرىن جۇرەكتى شىمىرلاتا شىرقاعان ورىس قىزدارى, قازىرگى ارداقتى انا, قادىرلى اجەلەر بولسا, ءتورتىنشىسى – قازاقستان جاستارىنىڭ اراسىندا «جاسىل باستامالاردى» ىلگەرىلەتۋ باستاماشىسى, ۇستاز, مەكتەپ ديرەكتورى تاتيانا نەمتسان. تاتيانالاردىڭ ءبىرى بۋرميستروۆا كەزدەسۋدە قولىنا قازاقتىڭ قارا دومبىراسىن الىپ, «حالقىمىزعا سىزدەي پەرزەنت سىيلاعان ءالجان انامىزعا ارناپ ورىنداپ بەرەيىن», دەپ انا تۋرالى ءان شىرقاۋى دا كوكتەم شۋاعىمەن استاسقان كوڭىلدى كەشتىڭ كوركىن قىزدىرا تۇسكەندەي بولدى. ول ءوزىنىڭ 40 جىل بۇرىن «التىباقان» تەلەۆيزيالىق باعدارلاماسى ارقىلى قازاق حالقىنا تانىمال بولعانىن ايتىپ, قازاقتىڭ تاتياناسىنا اينالعانىن ماقتانىشپەن اتاپ ءوتتى. «قازاقتىڭ ءتىلىن, سالت-ءداستۇرىن ءانىم مەن ونەرىم ارقىلى ەلىمىزدىڭ تۇكپىر-تۇكپىرىنە ناسيحاتتاپ ءجۇرمىن. مەنىڭ جولىمدى سىڭلىلەرىم – وزگە تاتيانالار جالعاستىردى. بۇگىن ۇشەۋمىز دە وسىندا وتىرمىز. سىزگە ەلىمىزدى بىرلىك پەن بەرەكەنىڭ بەسىگىنە اينالدىرعان كەمەڭگەر ساياساتىڭىز ءۇشىن زور ريزاشىلىعىمدى بىلدىرەمىن», – دەدى ول ءسوز كەزەگىندە. تاتيانا مارتىنەنكو دا ءوز لەبىزىن تازا قازاق تىلىندە جەتكىزىپ, ەل بىرلىگىن ۇيىستىرعان ەلباسىنا ەرەكشە ءىلتيپاتىن ءبىلدىردى. «مەن ورىس حالقىنىڭ قاراپايىم قىزى, كەڭ-بايتاق قازاق ەلىندە تۋىپ-ءوستىم. قازاق حالقىنىڭ كەڭ پەيىلى مەن قوناقجايلىعىن جاستايىمنان بويىما ءسىڭىرىپ, قازاقتىڭ بوساعاسىنا كەلىن بولىپ ءتۇستىم. قازىرگى تاڭدا ەكى ۇل, ءبىر قىز, ەكى نەمەرە ءسۇيىپ وتىرعان باقىتتى وتباسىمىز. مەن قۇرامىندا 100-دەن استام ۇلت وكىلدەرى تاتۋ-ءتاتتى تۇراتىن قازاقستانداي ەلدىڭ ازاماتى ەكەنىمدى ماقتان ەتەمىن. مەن قازاقستان حالقى اسسامبلەياسىنىڭ العاشقى سەسسياسىندا ءسوز سويلەگەن ەدىم. ءسىز قۇرعان اسسامبلەيا – بىرلىگىمىزدىڭ باس­تاۋى بولىپ كەلەدى. «بەيبىتشىلىك پەن كەلىسىمنىڭ نازارباەۆ مودەلى» بۇكىل الەمگە ۇلگى. ءبىز ەلباسىمىزدىڭ الەمدىك تۇلعا ەكەنىن ماقتان ەتەمىز», – دەدى ول. ءانشى تاتيانالاردىڭ ءۇشىنشىسى كەزدەسۋگە ارنايى ماسكەۋدەن كەلىپتى. «اسا قۇرمەتتى نۇرسۇلتان ءابىش ۇلى! مەن 25 جىلدان بەرى ماسكەۋدە تۇرامىن. كىندىك قانىم تامعان قاسيەتتى توپىراققا كەلگەنىمە باقىتتىمىن. الەمگە تانىمال تۇلعا – سىزبەن كەزدەسكەنىمە شەكسىز قۋانىشتىمىن. مەن ءار كەلگەن سايىن قازاقستاننىڭ ادام تانىماستاي وزگەرىپ جاتقانىن كورەمىن. استانا عاجايىپ قالاعا اينالىپتى. مەن قازاقستانىمدى ماقتان ەتەمىن. تىزگىنىن ءسىز سياقتى كورەگەن باسشى ۇستاعان قازاقستاننىڭ جارقىن بولاشاعىنا سەنەمىن», – دەدى رەسەيدەن ارنايى كەلگەن تاتيانا پولتاۆسكايا. ايتپاقشى, كەزدەسۋدە قازاقتىڭ كەلىنى, جاپون قىزى, «استانا وپەرا» تەاترىنىڭ بالەريناسى سەرينا سۋناگاۆا دا قازاق تىلىندە سويلەگەنىمەن قويماي, قازاق كەلىنىنە ءتان يناباتتىلىقپەن ەلباسىنا ءيىلىپ سالەم سالدى. ءسوز كەزەگىن قازاق گۋمانيتارلىق-زاڭ يننوۆاتسيالىق ۋنيۆەرسيتەتىنىڭ رەكتورى شىرىن قۇرمانباەۆا جالعادى. ول ءوزىنىڭ عالىم, رەكتور رەتىندە ەمەس, 5 نەمەرەنىڭ اجەسى رەتىندە سويلەگەلى وتىرعانىن ايتىپ, ۇرپاق تاربيەسىندەگى اجەلەر رولىنە توقتالدى. «قازىر ەل ءۇشىن اجەلەرىمىزدىڭ پاراساتى اسا ماڭىزدى. بۇگىندە الەم مويىنداعان ەلباسىن تەتەبالاداي دانا اجە تاربيەلەگەنىن ۇمىتپاعانىمىز ءجون. ول كىسىنى دانالىقتىڭ اكادەميگى دەي الامىز. «اجەنىڭ سۇيگەن جەرى وتقا كۇيمەيدى, وق تا تيمەيدى» دەيدى حالقىمىز. ۇلتتىڭ گەنەتيكالىق كودى دا – اجەنىڭ الديىندە. ۇلت ءداستۇرىن جاڭا زامانعا ساي جالعاستىرۋعا ءتيىسپىز. جاڭاشىل بالاباقشالار, نازارباەۆ زياتكەرلىك مەكتەپتەرى, نازارباەۆ ۋنيۆەرسيتەت – ۇلتتىق تاربيە مەن ءبىلىمنىڭ ايرىقشا سەرپىلىسى. بيىل نازارباەۆ ۋنيۆەرسيتەتتى العاشقى تۇلەكتەر ءبىتىرىپ, ۇلكەن ومىرگە جولداما الادى. ءسىزدى وسىناۋ ايتۋلى وقيعامەن قۇتتىقتايمىن. ءبىلىم مەن تاربيەدەگى بۇل يننوۆاتسيالار – ءسىزدىڭ يدەيالارىڭىزدىڭ ناتيجەسى! قازاقتىڭ اجەلەرى ءسىزدىڭ بارلىق باستامالارىڭىزدى قولدايدى. ءبىز قاشاندا ءسىزدىڭ سەنىمدى سەرىكتەرىڭىزبىز», – دەپ تۇيىندەدى ءسوزىن ش.قۇرمانباەۆا. كەزدەسۋ سوڭىندا مەملەكەت باسشىسى كوپبالالى انالار – مەرەكە اق­سيە­ۆانى «التىن القامەن» جانە اقنۇر جۇ­ما­باەۆانى «كۇمىس القامەن» ماراپاتتادى. دينارا بىتىكوۆا, «ەگەمەن قازاقستان». سۋرەتتەردى تۇسىرگەندەر س.بوندارەنكو, ب.وتارباەۆ.