جاقىن ارادا اقش-تىڭ كلاسسيكالىق راديوسىنىڭ اۋە تولقىنىندا قازاق مۋزىكاسى ورىندالاتىن بولدى.
حالىقارالىق ىنتىماقتاستىق جانە تاجىريبە الماسۋ ماقساتىندا «Classical KUSC» (لوس-اندجەلەس, اقش) راديوستانساسىنىڭ باس ماماندارى برەندا بارنەرس (وڭتۇستىك كاليفورنيا ۋنيۆەرسيتەتىنىڭ راديو جانە «Classical KUSC» پرەزيدەنتى) جانە كريستوفەر مەندەز (زاماناۋي تەحنولوگيالار مامانى) الماتىداعى «Classic» راديوسىندا («قازاقستان» رەسپۋبليكالىق تەلەراديوكورپوراتسياسىنىڭ قۇرامىنا كىرەدى) قوناقتا بولعاندا وسى ماسەلەگە وراي جۋرناليستەرگە ءوز پىكىرلەرىن ءبىلدىردى.
«KUSC» راديوسىنىڭ پرەزيدەنتى برەندا بارنس: «بۇل راديو مەن كورگەن كلاسسيكالىق مۋزىكانىڭ ۇزدىك راديولارىنىڭ ءبىرى. سىزدەرمەن تانىسىپ, ءارى ۇزاق مەرزىمدى ارىپتەستىككە قول جەتكىزگەنىمىزگە قۋانىشتىمىز. قالانىڭ كورىكتى جەرلەرىن ارالاپ, جاقسى اسەرگە بولەنگەن جايىمىز بار. بىزگە قازاق حالقىنىڭ قوناقجايلىعى, كاسىبي قارىم-قابىلەتى ۇنادى. قازاقستاننىڭ قازىرگى تابىستارىنا تاڭعالماسقا لاجىڭ جوق», دەپ اعىنان جارىلا اڭگىمەلەدى. ال, «Classic» راديوسىنىڭ ديرەكتورى راۋشان جۇمانيازوۆا ارىپتەسىنىڭ پىكىرىنە وراي «لوس-اندجەلەستىك ارىپتەستەرىمىزبەن كەزدەسۋىمىز ءساتتى ءوتتى. ءبىز كوپتەگەن پايدالى اقپاراتقا قول جەتكىزدىك. ەڭ باستىسى, لوس-اندجەلەستە, سان-فرانتسيسكودا, سانتا-باربارادا, سانتا-كلاريتا مەن پالم-سپرينگستا, تاۋزەند-وۋكستتە قازاق مۋزىكاسىن, ءبىزدىڭ كومپوزيتورلار مەن ورىنداۋشىلاردىڭ ونەرىن اۋە تولقىنىندا تاراتاتىن تۇراقتى باعدارلاما تۋرالى كەلىسىمگە قول جەتكىزدىك. قازاق اۋەنىنىڭ اۋە تولقىنى ارقىلى الەمگە پاش ەتىلۋى ءبىز ءۇشىن وتە ماڭىزدى», دەپ اتاپ كورسەتتى.
ەكىجاقتى كەزدەسۋلەر كلاسسيكالىق مۋزىكا فورماتىندا حابار تاراتاتىن راديونىڭ ەرەكشەلىگى تۋرالى ماسەلەلەرگە, مادەنيەت پەن ونەردى دامىتۋعا, جاڭا مەدياعا ارنالدى. تالقىلاۋعا, سونداي-اق «قازاقستان» رترك ينتەرنەت رەداكتسيا ءبولىمىنىڭ قىزمەتكەرلەرى جانە قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى قاتىستى.
ايتا كەتۋ كەرەك, «Classic» راديوسى حابار تاراتۋى تولىعىمەن ءتۇرلى جانرداعى جانە ۇلتتىق مەكتەپتەردىڭ اكادەميالىق مۋزىكاسىنا نەگىزدەلگەن بىرەگەي راديوستانسا بولىپ تابىلادى. بۇل – قازاقستان اۋماعىنداعى كلاسسيكالىق مۋزىكانىڭ تۇڭعىش جانە جالعىز راديوستانساسى. راديو 2011 جىلدىڭ 6 ماۋسىمىنان باستاپ جۇمىس ىستەيدى دەسەك, قازىرگى ۋاقىتتا ەكى ءىرى قالادا, الماتى (102,8 FM) مەن استانادا (102,7 FM) حابار تاراتۋدا. سونداي-اق, «Classic» راديوسى الەم بويىنشا بارلىق ارىپتەستەرىمەن تىعىز قارىم-قاتىناستا قىزمەت ەتەدى. اسىرەسە, ميۋنحەنمەن («BR-klassik») جانە ماسكەۋمەن («ورفەي») جاسالعان ىنتىماقتاستىق تابىستى جالعاسۋدا. ال, «BBC 3» (لوندون) جانە «Radio Classique» (پاريج) راديوستانسالارىمەن ىنتىماقتاستىق قارىم-قاتىناستار مۇنان دا اۋقىمدى باعىتتا دامىپ كەلەدى.
«Classical KUSC» راديوسىنا كەلسەك, اقش-تاعى كلاسسيكالىق مۋزىكانىڭ ءىرى قوعامدىق راديوستانساسى بولىپ تابىلادى. KUSC-ءتىڭ نەگىزگى مىندەتى كلاسسيكالىق مۋزىكانىڭ وڭتۇستىك كاليفورنيا تۇرعىندارى ءومىرىنىڭ اجىراماس بولشەگى رەتىندە ساقتاپ قالۋ جانە دامىتۋ بولىپ تابىلادى. راديوستانسانىڭ تاريحى 60 جىلدى قامتيدى.
راۋان ەسقالي.