استانا. 6 ناۋرىز. پرەزيدەنت نۇرسۇلتان نازارباەۆ ەلىمىزدىڭ بارلىق وڭىرلەرىنەن كەلگەن, ەكونوميكانىڭ ءتۇرلى سەكتورلارىندا, مادەني-الەۋمەتتىك سالالاردا جانە مەملەكەتتىك قىزمەتتە ىستەيتىن ايەل جۇرتىنىڭ وكىلدەرىمەن كەزدەستى. بۇل تۋرالى akorda.kz حابارلادى.
مەملەكەت باسشىسى ولاردى كەلە جاتقان حالىقارالىق ايەلدەر كۇنىمەن قۇتتىقتاپ, قازاقستاننىڭ بارشا ايەلدەر قاۋىمىنا باقىت, دەنساۋلىق جانە باق-بەرەكە تىلەدى.
نۇرسۇلتان نازارباەۆ مەملەكەتتىك ساياساتتىڭ باسىم باعىتىنىڭ ءبىرى ايەلدەردىڭ ءال-اۋقاتىن جاقسارتۋ ەكەنىن اتاپ ءوتتى.
– تاۋەلسىزدىك جىلدارىندا ءبىز كوپ نارسەنى ەڭسەردىك. قازىر ەلىمىزدە بەرەكە مەن تىنىشتىق ورنادى. «قازاقستان-2050» ستراتەگياسى, «نۇرلى جول» جانە باسقا بارلىق باعدارلامالار وسىنى كوزدەيدى. ايەلدەر, وتباسىن ساقتاۋشى رەتىندە باق-بەرەكەنى ەڭ الدىمەن بالالارىنان, داستارقانىنان سەزىنەدى, سول ارقىلى مەملەكەتتىڭ قامقورلىعىن سەزىنەدى», – دەدى پرەزيدەنت.
مەملەكەت باسشىسى ەلدەگى ايەلدەر قاۋىمى وكىلدەرىنىڭ بەلسەندىلىگى ارتىپ كەلە جاتقانىنا توقتالدى.
– بۇگىندە مەملەكەتتىك قىزمەتتەگى قىزمەتكەرلەردىڭ باسىم بولىگىن ايەلدەر قۇرايدى. دەنساۋلىق ساقتاۋ سالاسىندا ولاردىڭ ۇلەسى 75 پايىزعا, ءبىلىم بەرۋ سالاسىندا 65 پايىزعا دەيىن جەتەدى. بيزنەستەگى باسشىلاردىڭ دا 40 پايىزى نازىك جاندى ارۋلار, – دەدى نۇرسۇلتان نازارباەۆ.
ەلباسى تۋ دەڭگەيىنىڭ ءوسۋى جالعاسىپ كەلە جاتقانىنا, تەك بىلتىردىڭ وزىندە دۇنيەگە 400 مىڭ ءسابي كەلگەنىنە نازار اۋداردى.
نۇرسۇلتان نازارباەۆ بيىل ەل تاۋەلسىزدىگىنە 24 جىل تولاتىنىن ەسكە سالدى.
– بۇل ۋاقىت قاس قاعىمدا وتە شىقتى, سەبەبى ءبارىمىزدىڭ نازارىمىز جۇمىستا بولدى. بۇگىن سونىڭ ناتيجەسىن كورىپ وتىرمىز – ءبىز قۇرعان مەملەكەتتى بۇكىل الەم تانيدى, قۇرمەتتەيدى, – دەدى.
مەملەكەت باسشىسى ەلدەگى تۇراقتىلىقتىڭ ارقاسىندا ەكونوميكامىز قارقىندى دامىپ كەلە جاتقانىن ايتتى.
– بۇگىندە جەر بەتىندە, بۇۇ مالىمەتى بويىنشا, 800 ميلليون ادام اشتىقتان جاپا شەگۋدە. جىل سايىن ازىق تاپشىلىعىنىڭ كەسىرىنەن 6 ميلليون بالا, 30 ميلليون ەرەسەك ادام ولەدى. 400 ميلليون ادام اۋىز سۋعا زارۋلىك زاردابىن تارتادى. جىل سايىن پلانەتامىزدا 30 اسكەري قاقتىعىس بولىپ, سونىڭ سالدارىنان ساعات سايىن 40 ادام قازا تابادى. سوندىقتان, ەلدىڭ ىشكى تۇراقتىلىعىن كوزدىڭ قاراشىعىنداي قورعاۋعا ءتيىسپىز, – دەدى نۇرسۇلتان نازارباەۆ.
سوڭىندا مەملەكەت باسشىسى كوپ بالالى انالاردى – م.اكسيەۆانى التىن القامەن جانە ا.جۇماباەۆانى كۇمىس القامەن ماراپاتتادى.
كەزدەسۋگە مەملەكەتتىك حاتشى, پرەزيدەنتى جانىنداعى ايەلدەرى ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ.ابدىقالىقوۆا, پارلامەنت ءماجىلىسىنىڭ دەپۋتاتى گ.قاراعۇسوۆا, دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا, پارلامەنت ءماجىلىسىنىڭ دەپۋتاتى ي.ارونوۆا, سەمەي قالاسىنىڭ يننوۆاتسيالىق گۋمانيتارلىق-زاڭ ۋنيۆەرسيتەتىنىڭ رەكتورى ش.قۇرمانباەۆا, «قازاق ارۋى-2014» رەسپۋبليكالىق ارۋلار بايقاۋىنىڭ جەڭىمپازى گ.جولانوۆا, ءارتىس ب.ءسۇيىنشالينا, «استانا وپەرا» موبت بالەت ءارتىسى س.سۋنوگاۆا, تەننيسشى ز.دياس, «پلانەتا پاتشايىمى-2014» اتاعىنىڭ يەگەرى ا.جۇماباەۆا, بوكستان الەم چەمپيونى ن.قىزايباي, «قازاقستان» رترك بالالارعا ارنالعان «بالاپان» تەلەارناسىنىڭ ديرەكتورى ل.سۇلتانقىزى, ۆولەيبولشى س.التىنبەكوۆا, تانىمال «تاتيانالار تريوسىنىڭ» قاتىسۋشىلارى ت.بۋرميستروۆا, ت.پولتاۆسكايا جانە ت.مارتىنەنكو, «Turkvizion-2014» ءىى حالىقارالىق ءان كونكۋرسىنىڭ جەڭىمپازى ج.دوعالوۆا, كوپ بالالى انا م.اكسيەۆا, قازاقستان جاستارىنىڭ اراسىندا «جاسىل باستامالاردى» ىلگەرىلەتۋ باستاماشىسى ت.نەمتسان, اسكەري قىزمەتشى د.رىسبەكوۆا, پروفەسسور, قازاقستان ينجەنەرلىك اكادەمياسىنىڭ كوررەسپوندەنت-مۇشەسى ق.اققوشقاروۆا, «Astana Solar» فوتوەلەكترلىك مودۋلدەر قۇراستىرۋ زاۋىتىنىڭ تەحنيگى ا.تاششانوۆا, جەكە كاسىپكەر ا.قۇرماشوۆا, قوستاناي وبلىسىنان اۋداندىق اۋرۋحانانىڭ باس دارىگەرى ل.فينك, ق.ساتباەۆ اتىنداعى ەكىباستۇز ينجەنەرلىك-تەحنيكالىق ينستيتۋتىنىڭ دوتسەنتى د.سيۆاراكشا, «استانا وپەرا» موبت جەتەكشى ءسوليسى س.احمەتوۆا قاتىستى.
كەزدەسۋگە قاتىسۋشىلار مەملەكەت باسشىسىنا انا مەن بالاعا قامقورلىق جاساۋعا, وتباسىلىق قۇندىلىقتاردى نىعايتۋعا باعىتتالعان ساياسات جۇرگىزىپ وتىرعانى ءۇشىن العىستارىن ايتتى. سونىمەن قاتار حالىقتىڭ جانە ءاربىر قازاقستاندىق وتباسىنىڭ ءال-اۋقاتىن قامتاماسىز ەتۋگە باعىتتالعان باعدارلامالاردى جۇزەگە اسىرۋدى ءارى قاراي جالعاستىرۋدىڭ ماڭىزدىلىعىن اتاپ ءوتتى.
جولدىباي بازار.
دەرەك, سۋرەت: akorda.kz.