استانا. 6 ناۋرىز. قازاقستان پرەزيدەنتى بولۋعا نيەت بىلدىرگەندەردىڭ قاتارىنا تاعى ءبىر ادام قوسىلىپ, تىركەلگەن ۇمىتكەرلەردىڭ جالپى سانى 10-عا جەتتى. بۇل تۋرالى ورتالىق سايلاۋ كوميسسياسىنىڭ ءباسپاسوز قىزمەتى حابارلادى.
كوميسسيانىڭ اقپارى بويىنشا, كەشە, 5 ناۋرىز كۇنى ۇمىتكەرلىككە الماتىنىڭ 1971 جىلى تۋعان تۇرعىنى, اسكەري قىزمەتشى ەرجان مەرەكە ۇلى سەرعازين ءوزىن-ءوزى ۇسىنعان.
ءسويتىپ, قازاقستان پرەزيدەنتى سايلاۋىنا ۇمىتكەر رەتىندە ۇسىنىلعانداردىڭ سانى 10 ادامعا جەتتى.
بۇعان دەيىن ۇمىتكەرلىككە استانانىڭ 1959 جىلى تۋعان تۇرعىنى, جەكە كاسىپكەر اسقار سىرعاباەۆ, استانانىڭ 1969 جىلى تۋعان تۇرعىنى, «رۋحاني قوعام الەمى» قوعامدىق قورىنىڭ پرەزيدەنتى ليمانا قويشيەۆا, استانانىڭ 1977 جىلى تۋعان تۇرعىنى, ينجەنەر-قۇرىلىسشى باقىت ابدىكارىموۆ جانە استانانىڭ 1984 جىلى تۋعان تۇرعىنى, جۇرگىزۋشى سۋحراب مىرزاشوۆ, الماتىنىڭ 1958 جىلى تۋعان تۇرعىنى, قوعام قايراتكەرى ەسەنبەك وكتەشباەۆ, الماتىنىڭ 1946 جىلى تۋعان تۇرعىنى, زەينەتكەر ياكوبجان جۇنىسبەكوۆ, استانانىڭ 1969 جىلى تۋعان تۇرعىنى, «استانا مۇناي گرۋپ 2007» جشس ماي قۇيۋ بەكەتىنىڭ باستىعى قانات جۇمان ءوزىن-ءوزى ۇسىنعان ەدى. العاش بولىپ ۇسىنىلعان اسقار سىرعاباەۆ مەملەكەتتىك ءتىل ەمتيحانىنان وتە المادى.
ۇمىتكەرلىككە ۇسىنىلۋشىلار قاتارىنا قكحپ پارتياسى اتىنان ۇمىتكەر تۇرعىن سىزدىقوۆ تا قوسىلدى. ول 1947 جىلى تۋعان, مەملەكەتتىك بانك مەكەمەلەرى جۇمىسشىلارى كاسىپوداعىنىڭ اقمولا وبلىستىق فيليالىنىڭ توراعاسى.
ەسكە سالا كەتەيىك, ورتالىق سايلاۋ كوميسسياسى بەكىتكەن كۇنتىزبەلىك جوسپارعا سايكەس قازاقستان پرەزيدەنتىنىڭ كەزەكتەن تىس سايلاۋىنا ۇمىتكەرلەردى ۇسىنۋ 26 اقپان كۇنى باستالعان بولاتىن. سايلاۋ 2015 جىلعى 26 ساۋىرگە بەلگىلەنىپ وتىر.
مەملەكەت باسشىسى نۇرسۇلتان نازارباەۆ ازىرشە ءوزىنىڭ سايلاۋعا قاتىسۋى تۋرالى شەشىم قابىلداي قويعان جوق. 8 ناۋرىز قارساڭىندا استانادا قىز-كەلىنشەكتەرمەن كەزدەسكەن ول: «قازىر سايلاۋالدى ناۋقان باستالدى. كەزەكتەن تىس سايلاۋ وتكىزۋ يدەياسىن, نەگىزىنەن, ايەلدەر قولدادى. مەن بۇگىندە مىڭداعان حات الىپ جاتىرمىن. بۇگىن تاڭەرتەڭ ۇستەلىمدە ءبىر بۋما حات جاتتى, حات يەلەرى مەنەن سايلاۋعا ءوز كانديداتۋرامدى ۇسىنۋدى سۇراعان. مەنىڭ جەكە جوسپارىم مۇلدەم باسقا بولاتىن, شىنىمدى ايتسام», - دەدى.
ساكەن مايلىباي.
دەرەك, سۋرەت: ورتالىق سايلاۋ كوميسسياسى.