استانا. 25 تامىز. بۇگىن فۋتبولدان قازاقستان پرەمەر-ليگاسىنىڭ 24 تۋرى شەڭبەرىندە ءبىر ويىن وينالدى. الماتىدا جەرگىلىكتى «قايرات» پاۆلوداردىڭ «ەرتىسىن» قابىلداپ, 5:2 ەسەبىمەن جەڭىسكە جەتتى. بۇل تۋرالى egemen.kz حابارلادى.
كەزدەسۋ اسا تارتىستى ءوتتى. ويىننىڭ 7-مينۋتىندا قوناقتار ەسەپ اشىپ ۇلگەردى. گولدىڭ اۆتورى – ەۆاندرو رونكاتتو. ارادا 8 مينۋت ۋاقىت وتكەندە يسلامبەك قۋات مەرگەندىگىمەن كوزگە ءتۇسىپ, تارازى باسىن تەڭەستىردى. ۇزىلىسكە دەيىن وسى ەسەپ وزگەرگەن جوق.
بۇل جولى «قايراتتىڭ» باس جاتتىقتىرۋشىسى ۆلاديمير ۆايسس الاڭعا نەگىزگى قۇرامدى شىعارماعانىن ايتا كەتەيىك. وعان كوماندانىڭ ەۋروپا ليگاسى ىرىكتەۋ ءتۋرنيرىنىڭ پلەي-وفف باسەكەسىندە سىنعا ءتۇسۋى سەبەپ.
ەكىنشى تايمدا دا «ەرتىس» ويىنشىلارى بەلسەندى قيمىلدادى. ءتىپتى 56-مينۋتتا قوناقتار ساپىنان الاسسان ن'ديايە ناتيجەلى سوققى جاساپ, پاۆلودارلىقتار تاعى دا ەسەپتە العا شىقتى. وسى گولدان كەيىن ۆايسس الاڭعا كوماندانىڭ سۇرمەرگەنى جەرار گوۋدى شىعاردى. جاتتىقتىرۋشىنىڭ بۇل قادامى ءوز جەمىسىن بەرىپ, يۆۋارلىق شاۋىلشى باس-اياعى 7 مينۋتتىڭ ىشىندە ءدۋبلدىڭ اۆتورى اتاندى. اتاپ ايتقاندا, ول 68 جانە 75-مينۋتتاردا قارسىلاستارىنىڭ قاقپاسىن ءدال كوزدەدى.
وسى گولداردان كەيىن الاڭ يەلەرىنىڭ ويىنىنا قان جۇگىرىپ, شيراقتىق تانىتا باستادى. ناتيجەسىندە ويىن سوڭىنا دەيىن داۆيد لوريا قورعاعان «ەرتىستىڭ» قاقپاسىنا تاعى ەكى دوپ ەنگىزدى. 78-مينۋتتا ەرمەك قۋانتاەۆ ەسەپتى 4:2-گە جەتكىزسە, كەزدەسۋدىڭ نۇكتەسىن 87-مينۋتتا دجوردجە دەسپوتوۆيچ قويدى.
بۇل جەڭىسىنەن كەيىن «قايرات» ۇپاي سانىن 26-عا جەتكىزىپ, تۋرنير كەستەسىندە جەكە-دارا كوش باستادى. ال «ەرتىس» ازىرگە 6-ورىندا كەلەدى.
24-تۋر شەڭبەرىندەگى قالعان ويىنداردىڭ ناتيجەلەرىن پرەمەر-ليگا بىلە الاسىزدار.
«قايرات» (الماتى) – «ەرتىس» (پاۆلودار) 5:2 (1:1)
گولدار: يسلامبەك قۋات 15, جەرار گوۋ 68, 75, ەرمەك قۋانتاەۆ 78, دجوردجە دەسپوتوۆيچ 87 – ەۆاندرو رونكاتتو 7, الاسسان ن'ديايە 56.
وسى ويىننىڭ قورىتىندىسى بويىنشا تۋرنير كەستەسى
ۇزدىك مەرگەندەر:
جەرار گوۋ («قايرات») – 20 گول;
لۋكا روتكوۆيچ («وقجەتپەس») – 11 گول;
دۋشان ساۆيچ («جەتىسۋ») – 9 گول.
25- تۋر ويىندارى 12-13 قىركۇيەكتە وينالادى. اتالعان تۋرداعى قارسىلاستار تومەندەگىدەي:
«اتىراۋ» – «قايرات»
«ەرتىس» – «اقتوبە»
«ورداباسى» – «استانا»
«تاراز» – «وقجەتپەس»
«قايسار» – «توبىل»
«شاحتەر» – «جەتىسۋ».
ەلامان قوڭىر.
دەرەك: egemen.kz.
سۋرەت: vk.com.