قوستاناي. 18 مامىر. قوستانايدا «جۇلدىز» قالالىق العاشقى ونەر بايقاۋىنىڭ گالا كونتسەرتى جانە جەڭىمپازداردى ماراپاتتاۋ سالتاناتى ءوتتى. بۇل تۋرالى egemen.kz ءتىلشىسى حابارلادى.
قوستاناي قالاسىندا تۇڭعىش رەت ءوتىپ وتىرعان «جۇلدىز» بايقاۋىنا 7 جانە 17 جاس ارالىعىنداعى ونەرلى بالالار قاتىستى. ولار قازىلار القاسىنا ۆوكال, حور, بي جانە مۋزىكالىق اسپاپتا شىعارما ورىنداۋ ونەرلەرىن ۇسىندى. بايقاۋ قورىتىندىسىندا جەڭىمپازدار ديپلوم مەن ارنايى سىيلىقتارعا يە بولدى.
بايقاۋدى «سوتسيۋم ي يا» قوعامدىق بىرلەستىگى مەن قوستاناي قالالىق اكىمشىلىگى ۇيىمداستىردى. بايقاۋعا قالاداعى بارلىق مەكتەپتەن تالانتتار قاتىسىپ باقتارىن سىنادى. بايقاۋدىڭ ەرەكشەلىگى, ول بىرنەشە ساتىدان تۇردى, بىرنەشە اي بويى تالانتتار ىرىكتەلدى. مىسالى, وعان تەك ۆوكال بويىنشا قاتىسۋعا عانا 30 سۇرانىس جاسالدى. بالالار ءاندى ءتۇرلى جانردا ايتتى. مىسالى جەڭىمپازداردىڭ ءبىرى, س.ماۋلەنوۆ اتىنداعى گيمنازيانىڭ وقۋشىسى ءمادينا داكىشەۆا ۇستازىمەن بىرىگىپ, كۇردەلى دجازدىق كومپوزيتسيانى ورىنداپ شىقتى.
ۇيىمداستىرۋشىلار بايقاۋدىڭ ەندى ءداستۇرلى وتەرىنە سەنىمدى.
ءنازيرا جارىمبەتوۆا.
دەرەك, سۋرەت: alau.kz