استانا. 16 مامىر. بۇگىن شەشەنستان رەسپۋبليكاسى نوجاي-يۋرت اۋداندىق ىشكى ىستەر ءبولىمىنىڭ 57 جاستاعى باستىعى ناجۋد گۋگيچەۆ بايتاركي سەلوسىنىڭ 17 جاسار تۇرعىنى لۋيزا گويلابيەۆامەن ۇيلەنۋ تويىن وتكىزگەلى جاتىر. بۇل تۋرالى Lenta.ru حابارلادى.
شەشەنستان ليدەرى رامزان كادىروۆ ءوزىنىڭ Instagram جەلىسى ارقىلى جۇرتتى وسى تويعا شاقىردى. ونىڭ جازۋىنشا, بۇعان دەيىن عاسىردىڭ ەڭ ەستە قالارلىق نەكە تىركەۋ ءراسىمى بريتانيا حانزاداسى ۋيليامس پەن ميددلتوننىڭ اراسىندا ءوتتى دەپ ەسەپتەپ كەلگەن. الايدا, سوڭعى كۇندەردىڭ وقيعاسى مىڭجىلدىقتىڭ باستى سالتاناتى گۋگيچەۆ پەن گويلابيەۆانىڭ تويى بولعالى تۇرعانىنا كوزىن جەتكىزە تۇسكەن.
رەسمي مالىمەتتەر بويىنشا, بۇل تويعا ءمان بەرىپ جاتقان باق-تار سانى قازىر 1,5 مىڭنان اسقان. ول شىن مانىندە عاسىر تويى بولعالى تۇرعان سياقتى. «بىزگە تويعا بايلانىستى اۆستراليا مەن موناكودان دا حابارلاسىپ جاتىر», دەگەندى قوستى كادىروۆ.
«سونىمەن, 16 مامىر كۇنى ساعات 16:45-تە گروزنىيدىڭ احاج-ىندا ناجۋد پەن لۋيزانىڭ رەسمي تۇردە نەكەگە تىركەلۋ ءساتى بولادى. تويعا ءبارىڭىزدى شاقىرامىن», - دەپ جازدى شەشەنستان پرەزيدەنتى.
كادىروۆ بۇل تويدىڭ قاتاڭ تۇردە يسلام شارياتى مەن رەسەي فەدەراتسياسىنىڭ زاڭىنا سايكەس وتكىزىلۋىن قاتتى قاداعالايتىندارىن مالىمدەدى. «ءبىزدىڭ داستۇرىمىزدە, ارينە, تويعا دەيىن احاج-عا بارۋ جوق», - دەدى ول. «مەن شەشەن بيلەرىنىڭ ۇلكەن اۋەسقويىمىن. تويدا ەڭ سۇلۋ قىزبەن بيلەۋدى ارمانداپ ءجۇرمىن», - دەدى رامزان كادىروۆ.
شەشەنستان پرەزيدەنتى كەزىندە گۋگيچەۆ پەن گويلابيەۆانىڭ جەكە ومىرلەرىنە ارسىزدىقپەن ارالاسقانداردىڭ سوت الدىندا جاۋاپ بەرەتىنىن ايتتى. قازىر وسىعان بايلانىستى ءتيىستى تالاپ-ارىز دايىندالىپ جاتىر.
مامىر ايىنىڭ باسىندا «نوۆايا گازەتادا» 17 جاسار گويلابيەۆانى 57-دەگى گۋگيچەۆتىڭ الىمجەتتىكپەن ايەل ەتىپ العالى جاتقانى تۋرالى حابار شىقتى. وندا اۋداندىق ىشكى ىستەر ءبولىمى باستىعىنىڭ جاس قىزدى ەكىنشى ايەل ەتىپ العالى جاتقانى, قالىڭدىعىن بىرەۋلەر رەسپۋبليكا اۋماعىنان تىسقارى الىپ كەتپەۋ ءۇشىن بارلىق جەردە بەكەت قويعانى ءسوز بولادى. كەيىرىنەك بۇقارالىق اقپارات قۇرالدارىندا گويلابيەۆانىڭ ءوزى مەن ونىڭ تۋىستارىنىڭ بۇل تويعا قارسى ەمەس ەكەندەرىن بىلدىرگەن مالىمدەسى جاريالاندى. وسىدان كەيىن «نوۆايا گازەتانىڭ» بۇل ماسەلەنى كوتەرىپ كەلگەن ءتىلشىسى ەلەنا ميلاشينا ءوز ومىرىنە قاۋىپ تونۋىنەن ساقتانىپ, شەشەنستاننان كەتۋگە ءماجبۇر بولدى.