اقتاۋ. 16 مامىر. اقتاۋدا جانتۇرشىگەرلىك كولىك اپاتى بولدى. اپاتتىڭ جويقىندىعى سونشالىق, كولىكتىڭ ساۋ-تامتىعى قالعان جوق. الايدا, ەڭ قۋانىشتىسى, ادام شىعىنى تىركەلمەدى. بۇل تۋرالى tumba.kz سايتىنا سىلتەمە جاساپ, egemen.kz ءتىلشىسى حابارلادى.
وقيعا بۇگىن تۇندە جەرگىلىكتى ۋاقىت بويىنشا ساعات 01:00-دەر شاماسىندا بولعان. قالاداعى 8-ءشى شاعىن اۋداندا ورنالاسقان بوتانيكالىق باق پەن 22-ءشى شاعىن اۋدانداعى ەسكى بازار اراسىنداعى جول قيىلىسىندا تىركەلگەن اپاتتا ءورت ءسوندىرۋشى كولىك پەن «وپەل ۆەكترا» سوقتىعىستى.
اقتاۋ قالالىق توتەنشە جاعدايلار باسقارماسىنىڭ باسشىسى ەرلان ماۋلەنوۆتىڭ ايتۋىنشا, كەزەكشى بولىمگە ءورت شىعۋىنا بايلانىستى دابىل تۇسكەن. سول بويىنشا 3 ءورت ءسوندىرۋشى كولىك شۇعىل وقيعا ورنىنا اتتانادى. دابىل قوندىرعىسىن قوسىپ كەلە جاتقان كولىكتەردىڭ الدىڭعى ەكەۋى اتالعان جول قيىلىسىنان امان وتكەن. ال ءۇشىنشىسى جەڭىل كولىكپەن سوقتىعىستى.
توتەنشە جايت سالدارىنان جۇرگىزۋشىلەر جەڭىل جاراقات العان. اۋرۋحاناعا جەتكىزىلىپ, قاجەتتى دارىگەرلىك كومەك كورسەتىلگەننەن كەيىن ولار ۇيلەرىنە جىبەرىلدى.
كۋاگەرلەردىڭ ايتۋىنشا, اپات وتە جويقىن بولعان. سالدارىنان جەڭىل كولىك 100 پايىز جارامسىز بولىپ, قۇر مەتاللعا اينالعان. الايدا, جۇرگىزۋشىسى ءدىن-امان. ماماندار مۇنداي ساتتىلىكتىڭ وتە سيرەك كەزدەسەتىنىن, ءتىپتى 100-دەن ءبىرى عانا امان قالاتىنىن ايتۋدا.
گۇلايىم شىنتەمىرقىزى.
دەرەك: egemen.kz.
سۋرەت: tumba.kz.