الماتى. 30 ماۋسىم. رەسەي فەدەراتسياسىنىڭ تەرگەۋ كوميتەتى بارناۋل قالاسىنىڭ اكىمى يگور ساۆينتسەۆتىڭ ۇستىنەن قىلمىستى ءىس قوزعادى. بۇل تۋرالى rus.azattyq.org حابارلادى.
قالا مەرى قىزمەت بابىن اسىرا پايدالانعان. تەرگەۋشىلەر 2010 جىلى ساۆينتسەۆتىڭ ەكى كومپانياعا جەر تەلىمدەرىن ارزان باعاعا جالعا بەرگەنىن انىقتادى. ءارى ول كومپانيا يەلەرى ساۆينتسەۆتىڭ جاقىن تۋىستارى بولىپ شىقتى. تەرگەۋ كوميتەتى قالا بيۋدجەتىنە 11 ميلليون رۋبل (50 ميلليون تەڭگە) شىعىن كەلگەنىن جاريالادى.
يگور ساۆينتسەۆ ەلدەگى بەدەلدى پارتيا – «ەدينايا روسسيانىڭ» مۇشەسى. ول بۇل قىزمەتكە 2010 جىلى تاعايىندالعان.
ايتا كەتەيىك, بارناۋل قالاسىنىڭ بۇرىنعى اكىمى دە جاساعان قىلمىسى ءۇشىن قىزمەتتەن بوساتىلىپ, سوتتالىپ كەتكەن بولاتىن.
تالعات ءسۇيىنباي.
دەرەك, سۋرەت: rus.azattyq.org.