ءيا, تاقىرىپقا شىعارىپ وتىرعانىمىزداي, تاريح قويناۋىنا كەتىپ بارا جاتقان 9 مامىر – جەڭىستىڭ 70 جىلدىعى قارساڭىندا «قازاۆتوجول ۇك» اق باتىس قازاقستان وبلىستىق فيليالىنىڭ ۇجىمى وكىلدەرى ورال قالاسىندا تۇراتىن قوس مايدانگەر – قايىرجان بايمەنوۆ پەن ىسقاق وتەپوۆتىڭ ۇيلەرىنە بارىپ جەڭىس مەرەكەسىمەن قۇتتىقتاپ, سىي-سياپات جاساعان ەدى.
ىشكى ىستەر قىزمەتىنىڭ وتستاۆكاداعى پولكوۆنيگى, وتىز جىلدان استام عۇمىرىن قۇقىق قورعاۋ سالاسىنا ارناعان ىسقاق اقساقال سول ساتتە اكىمدىكتە وتكىزىلەتىن قۇرمەتتەۋ راسىمىنە كەتكەن ەكەن. سوندىقتان جاۋمەن شايقاستا كورسەتكەن باتىل قيمىلدارى مەن ەرلىگى ءۇشىن «قىزىل جۇلدىز» جانە «وتان سوعىسى» وردەندەرىمەن ماراپاتتالعان مايدانگەرمەن كەزدەسە الماي قالعانىمىزعا ءسال وكىنىش تە بىلدىرگەن ەدىك. الايدا مۇنىڭ ورنىن توقساننىڭ وتكەل بەرمەس اسۋىن ەمىن-ەركىن باعىندىرعان ەكىنشى مايدانگەر قايىرجان بايمەنوۆ تولىقتىرعان-تىن. – مەن سوعىسقا 1942 جىلدىڭ تامىز ايىندا الىندىم, – دەپ باستادى اڭگىمەسىن «زا وتۆاگۋ» مەدالى مەن «وتان سوعىسى» وردەندەرىنىڭ يەگەرى قايىرجان بايمەن ۇلى. – كوپ كەشىكپەي مارشال باگراميان باسقاراتىن 2-ءشى بالتىق مايدانىنا قاراستى 68-ءشى پولكتىڭ قۇرامىندا لەنينگراد قالاسى مەن بالتىق بويى ماڭىندا قيان-كەسكى ششايقاستارعا كىرىسىپ كەتتىك. ءبىزدىڭ مايداننىڭ نوۆوسوكولنيكي تۇبىندە 3-ءشى بالتىق مايدانىنىڭ جاۋىنگەرلەرىمەن بەتپە-بەت كەزدەسىپ قالعان ساتتەرى دە بار. وسىعان ءبىر تاماشا مىسال كەلتىرگىم كەلەدى. – 1943 جىلى اۋىر جاراقات الىپ گوسپيتالدا ەمدەلىپ شىققاننان كەيىن سوعىسقا قايتا كىردىم, – دەپ جالعادى اڭگىمەسىن قارت مايدانگەر. – بۇل كەزدە مەن سنايپەرلەر ساپىندا بولاتىنمىن. قاندى جورىق كەزىندە ءبىر تەرەڭ سايدىڭ ىشىمەن كەلە جاتىپ, ءسال مىزعىپ الۋعا توقتاعان ەدىك. ءبىر كەزدە وكپە تۇسىمنان: «باۋىرىم, قازاقپىسىڭ؟» – دەپ ءتىل قاتقان ايەل ادامنىڭ داۋىسى ەستىلدى. وت پەن وقتىڭ ورتاسىندا بۇل نە ىستەپ جۇرگەن ايەل دەگەن وي سانامنان جۇگىرىپ ءوتتى دە, داۋىس شىققان جاققا قاراي جالت بۇرىلدىم. ايەل دەگەنىم ورىمدەي قىز ەكەن. كوزدەرى وتتاي جايناپ تۇر.ۇستىندە گيمناستەركا. اياعىندا كەرزى ەتىك. قاپەلىمدە نە دەرىمدى بىلمەي كىدىرىپ قالدىم. تەك سودان كەيىن عانا: – ءيا, قازاقپىن, – دەدىم. – قايدانسىڭ؟ – دەپ ول تاعى دا ءتىل قاتتى. – ورالدانمىن, – دەدىم مەن بۇل جولى ەش ىركىلمەستەن. – ءتىپتى جاقسى, مەن دە سول جاقتانمىن. وردادا تۋىپ-ءوستىم. ەسىمىم – ءمانسيا, – دەدى ول ماعان جىلى جۇزبەن. – ءبىزدىڭ بۇل ءتىل قاتىسۋىمىز ۇزاققا سوزىلمادى. سوعىس جاعدايى ۇزاق اڭگىمەنى كوتەرمەيدى عوي. بۇل قازاقتىڭ باتىر قىزى مانشۇك مامەتوۆا ەدى. وسى قايتالانباس كورىنىس پەن كەزدەيسوق كەزدەسۋ كوڭىلىمدە ماڭگى ۇمىتىلماستاي بولىپ جاتتالىپ قالدى, – دەيدى قايىرجان اعا.
تەمىر قۇسايىن,
«ەگەمەن قازاقستان».
ورال.