بۇگىن الماتىدا توعىزىنشى Almaty Half Marathon ءوتتى. وعان 44 ەلدەن 900-گە جۋىق جەلاياق كەلىپ, توعىز جىل ىشىندەگى شەتەلدىك قاتىسۋشىلار سانى بويىنشا رەكورد جاڭاردى, دەپ حابارلايدى Egemen.kz.
اتالعان مارافون بيىل توعىزىنشى رەت ۇيىمداستىرىلىپ وتىر. جىل سايىن قاتىسۋشىلار گەوگرافياسى كەڭەيىپ كەلەدى. بيىل جارىسقا 821 شەتەلدىك سپورتشى (جالپى سانىنىڭ شامامەن 8%-ى) ارنايى قاتىسۋ ءۇشىن الماتىعا كەلدى.
قىزىلوردادا 400 ادام قاتىسقان مارافون ءوتتى
ەڭ كوپ قاتىسقان ەلدەردىڭ ۇشتىگى: رەسەي (346), قىرعىزستان (146) جانە وزبەكستان (81). سونىمەن قاتار قىتاي (37), اقش (32), ۇلىبريتانيا (28), ۋكراينا (21) جانە بەلارۋس (18) ەلدەرىنەن دە قاتىسۋشىلار بولدى. بۇل دودا ازيا, ەۋروپا, سولتۇستىك جانە وڭتۇستىك امەريكا, افريكا مەن تاياۋ شىعىس ەلدەرىنەن كەلگەن جەلاياقتاردى بىرىكتىرىپ, الماتىنىڭ حالىقارالىق جۇگىرۋ كارتاسىنداعى ماڭىزدى ورتالىق ەكەنىن تاعى ءبىر مارتە دالەلدەدى.
«سپورتتىق تۋريزم – قالانى حالىقارالىق دەڭگەيدە تانىتۋدىڭ ەڭ ءتيىمدى قۇرالدارىنىڭ ءبىرى. سونداي-اق, جۇگىرۋشىلەر كوبىنە جالعىز كەلمەيدى: ولارمەن بىرگە وتباسى مۇشەلەرى مەن دوستارى دا كەلەدى, بۇل ءوز كەزەگىندە تۋريستەر سانىن ارتتىرادى. كوپتەگەن شەتەلدىك قوناق ءۇشىن بۇل جارىس قازاقستانمەن العاشقى تانىستىققا اينالىپ, قايتا ورالۋعا سەبەپ بولادى. ءبىزدىڭ زەرتتەۋىمىزگە سايكەس, باسقا قالالاردان جانە شەتەلدەن كەلگەن قاتىسۋشىلاردىڭ 79,3%-ى الماتىعا قايتا كەلۋدى جوسپارلاپ وتىر. بۇل جاڭا ساپارلار مەن قالانىڭ ينۆەستيتسيالىق تارتىمدىلىعىنىڭ ارتۋىن بىلدىرەدى», دەدى ء«بىرىنشى بولۋ − باتىلدىق» كورپوراتيۆتىك قورى قامقورشىلىق كەڭەسىنىڭ توراعاسى عالىمجان ەسەنوۆ.
ۇيىمداستىرۋشىلار ەكولوگيالىق تالاپتارعا ەرەكشە نازار اۋدارعان. EcoNetwork سەرىكتەسى مارەدە ينتەراكتيۆتى ەكولوگيالىق ايماق ۇيىمداستىرىپ, جارىس باعىتى بويىندا پلاستيك قالدىقتاردى جيناۋدى قامتاماسىز ەتتى. جينالعان قالدىقتاردىڭ بارلىعى قايتا وڭدەۋگە جىبەرىلەدى.
سونداي-اق, سورە الدىندا قاتىسۋشىلار قاجەتسىز, بىراق جارامدى قالىڭ كيىمدەرىن قالدىردى. «جىلۋ» جوباسىنىڭ كومانداسى ولاردى جيناپ, سۇرىپتاپ, مۇقتاج جاندارعا جەتكىزدى.
ايتا كەتەيىك, 31 مامىر كۇنى وتەتىن Astana Half Marathon جارىسىنا تىركەلۋ جالعاسىپ جاتىر. بۇل ءىس-شارا ەلىمىزدىڭ تۇكپىر-تۇكپىرىنەن جۇگىرۋ اۋەسقويلارىن بىرىكتىرەدى.
سونىمەن قاتار 2026 جىلى 27 قىركۇيەكتە وتەتىن 15-ءشى مەرەيتويلىق Almaty Marathon-عا دا تىركەلۋ اشىق. بۇل ورتالىق ازياداعى ەڭ ءىرى جۇگىرۋ جارىسى بولماق.