استاناداعى ەقىۇ باعدارلامالار ءوفيسى وڭتۇستىك قازاقستان وبلىسىنىڭ ورتالىعى – شىمكەنت قالاسىندا وتكەن قازاقستاندا ادام ساۋداسىمەن كۇرەس سالاسىنداعى ادام قۇقىقتارىن قورعاۋدىڭ وزەكتى ماسەلەلەرى بويىنشا ارنايى بايانداما تۇساۋكەسەرىنە قاتىسىپ, زورلىق-زومبىلىقتان زارداپ شەككەندەرگە الەۋمەتتىك كومەك كورسەتۋ بويىنشا دوڭگەلەك ۇستەل جۇمىسىنا جاردەم جاسادى.
ارنايى بايانداما قازاقستان رەسپۋبليكاسى پرەزيدەنتى جانىنداعى ادام قۇقىقتارى جونىندەگى كوميسسيا مەن حالىقارالىق جانە ۇكىمەتتىك ەمەس ۇيىمداردىڭ ءوزارا ءىس-قيمىلى ناتيجەسىندە ازىرلەندى. ول ەقىۇ-نىڭ وسى سالاداعى كەيبىر قىزمەتىن جانە ەقىۇ ادام ساۋداسىنا قارسى كۇرەس جونىندەگى ارنايى وكىلى مەن ۇيلەستىرۋشىسىنىڭ 2013 جانە 2014 جىلدارى قازاقستانعا ساپارلارىنىڭ قورىتىندىلارى بويىنشا جاسالعان ەسەپتەرىنىڭ ۇسىنىمدارىن قامتيدى.
ادام ساۋداسىنىڭ قۇرباندارىنا كومەك كورسەتۋگە قاتىسى بار 150-گە جۋىق قاتىسۋشى, سونىڭ ىشىندە ورتالىق جانە ايماقتىق بيلىك ورگاندارى, ادام قۇقىقتارى جونىندەگى كوميسسيانىڭ مۇشەلەرى, عالىمدار, ازاماتتىق قوعام بەلسەندىلەرى مەن قۇقىق قورعاۋشىلار, حالىقارالىق كوشى-قون ۇيىمى جانە ەل وڭىرلەرىنەن كەلگەن ۇكىمەتتىك ەمەس ۇيىمداردىڭ وكىلدەرى ارنايى باياندامانى تالقىلاۋعا سالدى. قاتىسۋشىلار ەسەپتiڭ قورىتىندىلارىنا, اتاپ ايتقاندا, ادام ساۋداسىنان زارداپ شەككەندەرگە ارنالعان ۇلتتىق قايتا باعىتتاۋ تەتىگىن قۇرۋعا جانە ولاردى الەۋمەتتىك قىزمەت كورسەتۋمەن قامتاماسىز ەتۋگە باعىتتالعان ۇسىنىمدارىنا قولداۋ ءبىلدىردى.
«ۇكىمەت پەن ازاماتتىق قوعام ادام ساۋداسى قۇرباندارىنا كومەك كورسەتۋدەگى ۇيلەستىرۋدى كۇشەيتۋ ءۇشىن بىرگە جۇمىس ىستەۋگە ءتيىس. حالىقارالىق ۇيىمدار مەن ايماقتىق ۇكىمەتتىك ەمەس ۇيىمداردىڭ باستامالارى قۇزىرەتتى مەملەكەتتىك ورگانداردىڭ تاراپىنان ءتيىستى باعالاۋدى تابا الماي وتىر. ءبىز ازاماتتىق قوعام ۇيىمدارىنىڭ الەۋەتىن پايدالانىپ, ادام ساۋداسى قۇرباندارىنىڭ وزدەرىنىڭ قۇقىقتارى تۋرالى حاباردار بولۋىنا ەرەكشە نازار اۋدارۋىمىز كەرەك», – دەدى وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقباەۆ.
«ادام ساۋداسى ادام قۇقىقتارىن ورەسكەل بۇزۋ بولىپ تابىلادى جانە ول, ەڭ الدىمەن, ترانسۇلتتىق ۇيىمداسقان قىلمىستىڭ ەڭ اۋىر تۇرلەرىنىڭ بىرىنە جاتادى. ونىمەن ءتيىمدى كۇرەسۋ ءۇشىن ۇلتتىق جانە حالىقارالىق دەڭگەيلەردە كەلىسىلگەن, جۇيەلى جانە ۇيلەستىرىلگەن ءتاسىلدىڭ بولۋى قاجەت», – دەپ اتاپ ءوتتى استاناداعى ەقىۇ باعدارلامالار ءوفيسىنىڭ باسشىسى, ەلشى ناتاليا زارۋدنا.
ءىس-شاراعا دەنساۋلىق ساقتاۋ جانە الەۋمەتتىك دامۋ, ىشكى ىستەر مينيسترلىكتەرىنىڭ, وبلىس اكىمدىگىنىڭ وكىلدەرى, ادام قۇقىقتارى جونىندەگى كوميسسيا مۇشەلەرى مەن ساراپشىلارى, سونداي-اق حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىستى.
«ەگەمەن-اقپارات».