قازاقستان سپورتشىلارى ءتۇرلى دودالاردا باق سىناپ, ءساتتى ونەر كورسەتىپ جاتىر. كەزەكتى جارىس كۇندەلىگىندە حوككەي, تەننيس, كۇرەس, فۋتبول جاڭالىقتارىن ۇسىنامىز, دەپ حابارلايدى Egemen.kz.
تسيۋريح (شۆەيتساريا) قالاسىندا حالىقارالىق حوككەي فەدەراتسياسىنىڭ (IIHF) كونگرەسى ءوتتى. جيىندا كەلەسى الەم چەمپيوناتى 2027 جىلدىڭ 14–30 مامىرى ارالىعىندا گەرمانيانىڭ ديۋسسەلدورف, مانگەيم قالالارىندا ۇيىمداستىرىلاتىن بولىپ بەلگىلەندى. جارىسقا ەلىمىزدىڭ قۇراماسى دا قاتىسادى. ال ايەلدەر كومانداسى 2027 جىلعى 1–7 كۇندەرى وڭتۇستىك كورەيانىڭ سۋۆون قالاسىندا جالاۋى جەلبىرەيتىن ءىۆ ديۆيزيونىنداعى الەم چەمپيوناتىندا باق سىنايدى.
جاستاردىڭ «رولان گارروسىندا» زاڭعار نۇرلان ۇلى ءساتتى ونەر كورسەتىپ جاتىر. العاشقى اينالىمدا ۇلىبريتانيالىق مارك سەبانعا سان سوقتىرعان قازاق تەننيسشىسى كەلەسى كەزدەسۋدە امەريكالىق اگاسسي راشەردى 6:2, 6:1 ەسەبىمەن ويسىراتا ۇتتى.
بىرىككەن كۇرەس الەمى (UWW) ريزابەك ايتمۇحاندى مامىر ايىنىڭ ەڭ ۇزدىك ەركىن كۇرەس شەبەرى دەپ تانىدى. بيىل اسا اۋىر سالماقتا ونەر كورسەتكەن قازاق بالۋانى جاستار اراسىنداعى ازيا بىرىنشىلىگىندە (U23) باس جۇلدە ولجالادى. ءبىر ايتا كەتەرلىگى, ريزابەك بارلىق باسەكەنى مەرزىمىنەن بۇرىن اياقتادى. گرەك-ريم كۇرەسى شەبەرلەرى اراسىندا ونداي اتاق ارمەنيالىق دجانەس نازاريانعا بۇيىرسا, ايەلدەر كۇرەسىنەن امەريكالىق كايلي ۋەلكەر ۇزدىك شىقتى.
اننا دانيلينا مەن اقش-تىڭ وكىلى دجەيمس ترەيسي «رولان گارروستىڭ» ارالاس جۇپتار اراسىنداعى سايىستىڭ شيرەك فينالىندا يتاليالىق سارا ەرراني مەن اندرەا ۆاۆاسسوريدەن ۇتىلدى. ەسەپ – 2:6, 2:6. اپەننين تۇبەگىنىڭ تەننيسشىلەرى بىلتىر ءدال وسى تۋرنيردە توپ جاردى.
ەرتەڭ ۇلان-باتىردا كۇرەس تۇرلەرىنەن حالىقارالىق ءتۋرنيردىڭ شىمىلدىعى تۇرىلەدى. جارىستى گرەك-ريم كۇرەسى شەبەرلەرى باستايدى. موڭعولياعا ساپار شەككەن بەس بالۋانىمىزدىڭ اراسىنان اسا اۋىر سالماقتاعى الىشەر ەرعالي مەن ولجاس سىرلىبايدى ەرەكشە اتاپ وتۋگە بولادى. ايەلدەر كۇرەسىنەن سەگىز سپورتشىمىز بوزكىلەمگە شىعادى. ولاردىڭ بارلىعى دا كىل مىقتىلار. اراسىندا وليمپيا ويىندارى مەن الەم چەمپيوناتتارىندا ولجا سالعان ەلميرا سىزدىقوۆا مەن ءجاميلا باقبەرگەنوۆا بار. ەركىن كۇرەستەن ازامات داۋلەتبەكوۆ (92 كگ) باستاعان 18 ءاپايتوس كۇش سىناسادى.
سپورتتىق ستاتيستيكانى سەرىك ەتكەن «Flashscore» پورتالى «قايرات» كلۋبىنىڭ قاقپاشىسى تەمىرلان اناربەكوۆتى ۋەفا چەمپيوندار ليگاسىنىڭ شارتتى قۇرامىنا ەنگىزدى. قانداسىمىزدان بولەك, مىقتىلار تىزىمىندە الەسساندرو باستوني, ۆيردجيل ۆان دەيك, رودينەي, برايم دياس, ۆيتينيا, مايكل وليسە, لامين يامال, كيليان مباپپە, گارري كەين, حۆيچا كۆاراتسحەليا سىندى اتاقتى فۋتبولشىلار بار.
6 ماۋسىمدا انگليانىڭ بورنمۋتىندا اسا اۋىر سالماقتاعى كاسىپقوي بوكسشى يۆان دىچكو (15-1, 14 كو) جارىس قوجايىنى حارۆي دايكسپەن (7-0-1, 0 كو) جۇدىرىقتاسادى. سوڭعى جەكپە-جەگىن بىلتىر قىركۇيەك ايىندا وتكىزگەن قوستانايدىڭ الىبى لاس-ۆەگاستا امەريكالىق دجەرمەين فرانكليننەن (24-3, 15 كو) جەڭىلگەن ەدى.