قاسىم-جومارت توقاەۆ پەن ۆلاديمير پۋتين بىرلەسكەن مالىمدەمە قابىلدادى

قازاقستان رەسپۋبليكاسىنىڭ پرەزيدەنتى ق.ك.توقاەۆتىڭ جانە رەسەي فەدەراتسياسىنىڭ پرەزيدەنتى ۆ.ۆ.ءپۋتيننىڭ «قازاقستان جانە رەسەي حالىقتارى اراسىنداعى دوستىق پەن تاتۋ كورشىلىكتىڭ جەتى نەگىزى تۋرالى» بىرلەسكەن مالىمدەمەسى

بۇگىندە الەم كۇردەلى ءارى قارقىندى وزگەرىستەردى باستان وتكەرىپ وتىر. حالىقارالىق قاتىناستار جۇيەسى اۋىر سىن-قاتەرلەر مەن قاۋىپتەرگە تاپ بولدى, جاھاندىق تۇراقسىزدىق پەن سەنىم داعدارىسى بەلەڭ الىپ, قاۋىپسىزدىك پەن ورنىقتى دامۋدى قامتاماسىز ەتۋدىڭ قالىپتاسقان تاسىلدەرى قايتا قارالۋدا.

قازاقستان مەن رەسەي ورنىقتى دامۋعا جول اشاتىن ءارى حالىقارالىق احۋالدى تۇراقتاندىرىپ, تۇبەگەيلى ساۋىقتىرا الاتىن نەعۇرلىم ادىلەتتى الەمدىك ءتارتىپتى قالىپتاستىرۋدىڭ بالاماسى جوق ەكەنىنە سەنىمدى.

وسىنداي كەزەڭدە ءوزارا قۇرمەتكە, تاتۋ كورشىلىككە, ۇلتتىق مۇددەلەردى ەسكەرۋگە جانە تەڭ قۇقىلى ارىپتەستىككە سۇيەنگەن مەملەكەتارالىق ىقپالداستىقتىڭ بەرىك ءارى ۋاقىت سىنىنان وتكەن نەگىزدەرى ايرىقشا ماڭىزعا يە.

ەلدەرىمىز اراسىنداعى بايلانىس ءدال وسى قاعيداتتارعا نەگىزدەلگەن تىعىز تاريحي تامىرلاستىققا, ءوزارا قولداۋعا جانە ەكىجاقتى ءتيىمدى ىنتىماقتاستىققا سۇيەنەدى. وسىعان وراي قازاقستان جانە رەسەي حالىقتارى اراسىنداعى دوستىق پەن تاتۋ كورشىلىك قاتىناستاردىڭ مىناداي نەگىزدەرىن نىعايتۋعا كۇش-جىگەر جۇمسالادى.

ءبىرىنشى نەگىز – تاريحي تامىرلاستىق جانە ونى دوستىق پەن تاتۋ كورشىلىك رۋحىندا وبەكتيۆتى پايىمداۋعا جاۋاپكەرشىلىكپەن قاراۋ

قازىرگى داۋىردە تاريحي جادىعا جاۋاپكەرشىلىكپەن قاراۋدىڭ, ونى وبەكتيۆتى پايىمداۋدىڭ, سونداي-اق قازاقستان مەن رەسەي حالىقتارى اراسىنداعى دوستىقتى, تاتۋ كورشىلىك قاتىناستى نىعايتۋ ءۇشىن پايدالانۋدىڭ ماڭىزى ارتىپ كەلەدى.

ەكى ەلدىڭ تاريحى ءوزارا تىعىز بايلانىستا ءوربىدى. حالىقتارىمىز ءارتۇرلى كەزەڭدەردى بىرگە وتكەردى, اۋىر سىناقتاردى ەڭسەرىپ, ەلەۋلى جەتىستىكتەرگە قول جەتكىزدى. بۇل تاريحي تاجىريبە ءوزارا قۇرمەت پەن تاتۋ كورشىلىك بايلانىستاردىڭ ماڭىزدى بولىگىنە اينالىپ, ادامنىڭ عارىشقا العاشقى ۇشۋى سياقتى ۇلى جەتىستىكتەردە كورىنىس تاپتى. وسىدان تۋرا 65 جىل بۇرىن يۋري گاگارين «بايقوڭىر» عارىش ايلاعىنان عارىشقا ساپار شەكتى.

وسى تۇرعىدا قازاقستان رەسپۋبليكاسى مەن رەسەي فەدەراتسياسىنىڭ ۇلتتىق مەملەكەتتىلىگىن قالىپتاستىرۋدىڭ بىرەگەي جولىن مويىندايمىز.

ۇلى وتان سوعىسىنداعى جەڭىس ورتاق جادىمىزدا ەرەكشە ورىن الادى. حالىقتارىمىز ناتسيزمگە قارسى يىق تىرەسە شايقاستى, مايداندا ەرلىك كورسەتىپ, تىلدا جانقيارلىقپەن ەڭبەك ەتتى, ءومىر ءسۇرۋ, بوستاندىق جانە ادام قادىر-قاسيەتىن اياققا تاپتاتپاۋ ءۇشىن كۇرەسىپ, قۇقىقتارىن قورعادى.

قازاقستان مەن رەسەي تاۋار اينالىمىن 30 ملرد دوللارعا ۇلعايتادى

ءبىز مايداندا قازا تاپقانداردىڭ الدىندا باسىمىزدى يەمىز, ارداگەرلەرگە جانە ورتاق جەڭىسكە ۇلەس قوسقان بارلىق جاندارعا قۇرمەت كورسەتەمىز. ۇلى وتان سوعىسى جىلدارىنداعى كەڭەس حالقىنىڭ تارتقان تاقسىرەتىن ەستە ساقتاۋ جانە ماڭگى ۇمىتپاۋ – پارىزىمىز. وسى وقيعالار تۋرالى ەستەلىكتەردى ايالاپ ساقتاپ, وعان جاۋاپكەرشىلىكپەن قاراۋ كەرەك. ونى بۇرمالاۋعا نەمەسە كونيۋنكتۋرالىق ماقساتتا پايدالانۋعا جول بەرمەي, ۇستانىمداردى جاقىنداتاتىن فاكتورعا اينالدىرۋ قاجەت.

وتكەن تاريحتى, اسىرەسە, ونىڭ قاسىرەتتى بەتتەرىن وبەكتيۆتى, بايىپتى ءارى سىندارلى كوزقاراسپەن پايىمداۋ عانا حالىقتار اراسىنداعى ءوزارا تۇسىنىستىكتى نىعايتىپ, جىككە ءبولىنۋدىڭ الدىن الۋعا قىزمەت ەتە الادى.

حالىقارالىق قوعامداستىقتى تاريحي شىندىقتى ساقتاۋعا, ەكىنشى دۇنيەجۇزىلىك سوعىس جىلدارىنداعى ناتسيزمگە, فاشيزمگە جانە ميليتاريزمگە قارسى ورتاق كۇرەستى دارىپتەۋگە, ونىڭ قورىتىندىلارىنا بەرىلگەن ادامگەرشىلىك جانە قۇقىقتىق باعالاردى قايتا قاراۋ ارەكەتتەرىنە قارسى تۇرۋعا, جالپى ادامزاتقا قاسىرەت اكەلگەن تاريحتىڭ اششى ساباعىن ۇمىتپاۋعا شاقىرامىز.

ءبىز بولاشاق ۇرپاققا ورتاق تاريحىمىزعا ادال ءارى قۇرمەتپەن قاراۋدى اماناتتاپ قالدىرۋعا مىندەتتىمىز.

ەكىنشى نەگىز – ەۋرازيالىق ينتەگراتسيانى دامىتۋعا, وڭىردە ىنتىماقتاستىق, قاۋىپسىزدىك جانە ديالوگ كەڭىستىگىن قالىپتاستىرۋعا كۇش-جىگەر جۇمىلدىرۋ

تاۋەلسىز مەملەكەتتەر دوستاستىعىن (تمد) ماڭىزدى ديالوگ الاڭى جانە كەڭ اۋقىمدى باعىتتار بويىنشا ىنتىماقتاستىقتىڭ ءتيىمدى تەتىگى رەتىندە قاراستىرامىز. تمد-نىڭ ەۋرازياداعى وڭىرلىك تۇراقتىلىق پەن قاۋىپسىزدىكتى قامتاماسىز ەتۋدەگى ەلەۋلى ءرولىن اتاپ وتەمىز. وسى فورماتتاعى ۇيلەسىمدى سىرتقى ساياساتتى تەرەڭدەتۋگە مۇددەلىمىز. ۇيىمنىڭ سىرتقى بايلانىستارىن بىرلەسە كەڭەيتۋگە نيەتتىمىز.

پرەزيدەنت: بيىل ءۇشىنشى قازاقستان – رەسەي مەديافورۋمى وتەدى

قازاقستان مەن رەسەي ەۋرازيالىق ەكونوميكالىق وداق (ەاەو) نەگىزگى تىرەگى سانالاتىن ەۋرازيالىق ەكونوميكالىق ينتەگراتسيانىڭ وزەگىن قالىپتاستىرادى. بىرلەستىكتىڭ بەدەلى ارتىپ كەلە جاتقانىن راستايمىز جانە ونىڭ ءتيىمدى جۇمىس ىستەۋى ازاماتتاردىڭ ءال-اۋقاتىنا ايتارلىقتاي وڭ ىقپال ەتەتىنىن مويىندايمىز. ەاەو-نىڭ ينتەگراتسيالىق مۇمكىندىكتەرىن تولىق ىسكە اسىرۋ جانە ۇلتتىق ەكونوميكالاردىڭ باسەكەگە قابىلەتتىلىگىن ارتتىرۋ جونىندەگى مىندەتتەردى بىرگە شەشۋ ارقىلى ورتاق نارىقتاردىڭ جانە تاۋارلاردىڭ, كورسەتىلەتىن قىزمەتتەردىڭ, كاپيتال مەن جۇمىس كۇشىنىڭ ەركىن قوزعالىسىن دامىتۋ بويىنشا جۇمىستى جالعاستىرۋ ماڭىزدى دەپ سانايمىز. قازاقستاننىڭ ەاەو-عا توراعالىعى ۇيىمعا وڭ سەرپىن بەرەدى دەپ سەنەمىز.

ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) وڭىرلىك تۇراقتىلىقتى قامتاماسىز ەتۋدەگى نەگىزگى ءرولىن مويىندايمىز جانە رەسەي فەدەراتسياسىنىڭ قازىرگى توراعالىعى شەڭبەرىندە دە ۇقشۇ الەۋەتىن ودان ءارى جەتىلدىرۋگە باعىتتالعان ۇستانىمدى اتاپ وتەمىز.

حالىقتارىمىزدىڭ يگىلىگى ءۇشىن ۇيىمنىڭ داعدارىستارعا دەن قويۋ تەتىكتەرىن جەتىلدىرۋگە, ونىڭ ۇجىمدىق كۇشتەردىڭ جاۋىنگەرلىك دايارلىعىن شىڭداۋعا, سىرتقى ساياسي ۇيلەستىرۋدى تەرەڭدەتۋگە, قاۋىپسىزدىككە تونگەن ورتاق سىن-قاتەرلەر مەن قاۋىپتەرگە قارسى كۇرەستى كۇشەيتۋگە بىرلەسىپ اتسالىسۋعا دايىنبىز.

ءۇشىنشى نەگىز – ورتاق شەكارا تاتۋ كورشىلىك پەن ىنتىماقتاستىق كەڭىستىگى رەتىندە

ەلدەرىمىزدى الەمدەگى ەڭ ۇزاق جانە ۇزدىكسىز جالعاسقان قۇرلىق شەكاراسى بىرىكتىرەدى. ونىڭ ماڭىزى گەوگرافيالىق شەڭبەردەن الدەقايدا جوعارى. ول تۇراقتىلىقتىڭ, ءوزارا ەكونوميكالىق بايلانىستاردىڭ, وڭىرارالىق ىنتىماقتاستىقتى تەرەڭدەتۋدىڭ فاكتورى رەتىندە قىزمەت ەتەدى. شەكارا ماڭىنداعى پروتسەستەردىڭ قارقىنى ءومىر تالابىنا نەگىزدەلگەن جانە شەكارا ماڭىنداعى ەلدى مەكەندەردە تۇراتىن حالىقتىڭ مۇقتاجدىقتارىنا مۇقيات قاراۋ, تاريحي تۇرعىدان قالىپتاسقان سان قىرلى بايلانىستاردى ساقتاۋ جانە نىعايتۋ, تۇرعىندار ءۇشىن بارىنشا قولايلى جاعداي جاساۋ ءارى كوشى-قون سالاسىنداعى سىندارلى ىقپالداستىقتى ساقتاۋ نيەتىنە ساي ايقىندالۋعا ءتيىس.

شەكارا ماڭىنداعى ىنتىماقتاستىق ساۋدا-ساتتىق, كولىك, كاسىپكەرلىك, ءبىلىم بەرۋ سالالارىنىڭ جانە مادەني الماسۋلاردىڭ جاندانۋىنا ىقپال ەتەدى, وڭىرلەر اراسىنداعى بايلانىستاردى نىعايتادى جانە قوسىمشا ءوسىم مۇمكىندىكتەرىنە جول اشادى. قازاقستان مەن رەسەي اراسىنداعى مىزعىماس شەكارا الداعى ۋاقىتتا دا سەنىمنىڭ, تاتۋ كورشىلىك قاتىناستاردىڭ جانە ورتاق يگىلىكتىڭ شەكاراسى بولىپ قالا بەرۋگە ءتيىس.

باعالى سىي: قازاقستان اۋماعىنا ءتورت امۋر جولبارىسى اكەلىندى

ەۋرازيا كەڭىستىگىندەگى ورتاق ءوزارا بايلانىستى نىعايتۋ ماقساتىندا قازاقستان مەن رەسەيدىڭ ەكونوميكالىق الەۋەتىن بىرىكتىرۋدى قۇپتايمىز. بۇل ءبىزدىڭ قۇرلىقتاعى بارلىق ەلدىڭ جانە بىرلەستىكتەردىڭ ءال-اۋقاتى مەن وركەندەۋىنە نەگىز بولادى.

وڭىرارالىق كووپەراتسيانى تەرەڭدەتۋگە باعىتتالعان «ترانسالتاي ديالوگى» جانە ء«بىزدىڭ ورتاق ءۇيىمىز – التاي» حالىقارالىق ۇيلەستىرۋ كەڭەسى سياقتى باستامالار شەڭبەرىندەگى ءوزارا ءىس-قيمىلدى جالعاستىرامىز.

شەكارا ماڭىنداعى اۋماقتاردىڭ ەكولوگيالىق جاعدايى ءۇشىن ورتاق جاۋاپكەرشىلىك جۇكتەۋ – پارىزىمىز. ياعني ەكوجۇيەلەردى ساقتاۋ, ونەركاسىپتىڭ تابيعاتتى لاستاۋىنا جول بەرمەۋ, بيوالۋانتۇرلىلىكتى قورعاۋ جانە تابيعي رەسۋرستارعا ۇقىپتى قاراۋ بىرلەسكەن كۇش-جىگەردى قاجەت ەتەدى.

ترانسشەكارالىق سۋ وبەكتىلەرى ماسەلەسى دە ماڭىزدى. ورتاق وزەندەردى پايدالانۋ جانە ونىڭ رەسۋرستارىن ۇتىمدى باسقارۋ, قورشاعان ورتاعا تەرىس اسەردى ازايتۋ, بىرلەسكەن مونيتورينگ, عىلىمي ىنتىماقتاستىق, سونداي-اق ەكولوگيالىق قاۋىپسىزدىك تالاپتارىن ساقتاي وتىرىپ, بىرلەسكەن شارۋاشىلىق قىزمەتىن جۇرگىزۋ, كولىك بايلانىسىن جاقسارتۋ جانە تۋريستىك سەكتوردى كەڭەيتۋ ورنىقتى دامۋدىڭ كەپىلى بولادى.

كاسپي وڭىرىندەگى ماسەلەلەرگە قاتىستى ءىس-قيمىلدى ۇيلەستىرۋ ايرىقشا ماڭىزعا يە. كاسپي – بىرەگەي تابيعي جۇيە. سوندىقتان كاسپي ماڭىنداعى مەملەكەتتەر كەلىسىپ ارەكەت ەتۋى قاجەت. وسى رەتتە سان سالالى ەكولوگيالىق پروبلەمالار سالدارىنان, سونىڭ ىشىندە كاسپي تەڭىزىنىڭ تارتىلا باستاۋىنان تۋىنداعان الەۋمەتتىك-ەكونوميكالىق تۇيتكىلدەردى بارىنشا ازايتاتىن ۇجىمدىق شارالاردىڭ وزەكتىلىگى جوعارى.

ءتورتىنشى نەگىز – ەكونوميكالىق سەرىكتەستىك

ەكونوميكالىق كووپەراتسيا قازاقستان مەن رەسەي قارىم-قاتىناستارىنىڭ نەگىزگى تىرەكتەرىنىڭ ءبىرى. لايىم سولاي بولادى. كوپ جاعدايدا ەلدەرىمىزدىڭ ەكونوميكالارى ءبىرىن-ءبىرى تولىقتىرادى, بۇل ۇزاقمەرزىمدى ءارى ورنىقتى دامۋدىڭ بەرىك نەگىزىن قالايدى.

ەكىجاقتى ساۋدا بەلسەندى دامىپ كەلەدى, كولىك-لوگيستيكا باعىتتارى كەڭەيىپ, ونەركاسىپ سالاسىنداعى ىقپالداستىق تەرەڭدەۋدە, بىرلەسكەن ينۆەستيتسيالىق جوبالار ىسكە اسىرىلۋدا. مىڭداعان كاسىپورىن ءوندىرىس تىزبەكتەرىن قالىپتاستىرۋعا, جۇمىس ورىندارىن اشۋعا جانە زاماناۋي تەحنولوگيالاردى ەنگىزۋگە ۇلەس قوسىپ جاتىر.

بۇل جەردە شاعىن جانە ورتا بيزنەستىڭ اتقاراتىن ءرولى ەرەكشە, ول ەكىجاقتى بايلانىستاردى ارتاراپتاندىرۋعا, جاڭا نارىقتاردى يگەرۋگە, يننوۆاتسيالار مەن تسيفرلىق شەشىمدەردى ىلگەرىلەتۋگە ىقپال ەتەتىن بولادى.

ينۆەستيتسيالىق ءوزارا ءىس-قيمىل ونەركاسىپتى جاڭعىرتۋعا, ينفراقۇرىلىم, ەنەرگەتيكا, كولىك جانە جوعارى تەحنولوگيا سالالارىن دامىتۋعا قوسىمشا مۇمكىندىك بەرەدى. دۇربەلەڭگە تولى دۇنيەدە وسى وڭىرلىك ەكونوميكالىق سەرىكتەستىك ورنىقتىلىق پەن پروگرەستىڭ ماڭىزدى فاكتورىنا اينالۋدا.

قازاقستان مەن رەسەي اراسىنداعى كولىك بايلانىسىن نىعايتۋ جونىندەگى بىرلەسكەن جۇمىستى جالعاستىرامىز. ازاماتتارعا قولايلى جاعداي جاساۋ ماقساتىندا قازاقستان-رەسەي مەملەكەتتىك شەكاراسى ارقىلى وتكىزۋ بەكەتتەرىن جاڭعىرتۋ بويىنشا كەشەندى قادامدار قابىلدانادى, بۇل جۇك تاسىمالىن جەدەلدەتۋگە جاردەمدەسەدى.

ەلدەرىمىزدىڭ اۋماعى ارقىلى وتەتىن نەگىزگى لوگيستيكالىق جولدىڭ ءبىرى – «سولتۇستىك – وڭتۇستىك» حالىقارالىق كولىك ءدالىزىن دامىتۋ ءىسى جالعاسادى.

«رەسەي – قازاقستان – قىتاي» باعىتى بويىنشا تەمىرجول تاسىمالىنىڭ تيىمدىلىگىن ارتتىرۋعا دا باسىمدىق بەرىلەدى.

قاسپي قۇبىر كونسورتسيۋمى سياقتى بۇرىننان قالىپتاسقان دالىزدەردى قوسا العاندا, ەنەرگەتيكالىق رەسۋرستاردىڭ لوگيستيكاسىنا ەرەكشە نازار اۋدارامىز.

قارجى سالاسىنداعى سەرىكتەستىككە, سونىڭ ىشىندە ۇلتتىق ۆاليۋتالارمەن ءوزارا ەسەپ ايىرىسۋ كولەمىن ۇلعايتۋعا جانە ورنىقتى تولەم-ەسەپ ايىرىسۋ تەتىكتەرىن دامىتۋعا ءمان بەرەمىز.

بىرجاقتى ەكونوميكالىق سانكتسيالاردىڭ تەرىس سالدارىن جۇمسارتۋ جانە رەتكە كەلتىرۋ جونىندەگى ءىس-قيمىلدى ودان ءارى ۇيلەستىرۋگە نيەتتىمىز.

كۇشەيىپ كەلە جاتقان گەوساياسي سىن-قاتەرلەر مەن سىرتقى قىسىم جاعدايىندا ەۋرازيالىق ينتەگراتسيالىق پروتسەستەردىڭ ورنىقتىلىعىن قامتاماسىز ەتۋ ءۇشىن كۇش-جىگەر جۇمىلدىرۋعا دايىنبىز.

ءبىز شارۋاشىلىق بايلانىستاردى تەك ۇلتتىق ەكونوميكالاردىڭ ءوسىم قۇرالى رەتىندە عانا ەمەس, سەنىمنىڭ, تۇراقتىلىقتىڭ جانە ءبىر-ءبىرىمىزدىڭ ءال-اۋقاتىمىزعا ءوزارا مۇددەلىلىكتىڭ اسا ماڭىزدى نەگىزى رەتىندە دە قاراستىرامىز.

بەسىنشى نەگىز – تىلدىك جانە مادەني ارالۋاندىلىق ورتاق يگىلىك رەتىندە, ءداستۇرلى قۇندىلىقتار مەن وركەنيەتتەر جاقىندىعى

ەلدەرىمىزدىڭ ورتاق مادەني مۇراسىن ساقتاۋعا, گۋمانيتارلىق الماسۋلار مەن بىرلەسكەن جوبالاردى ىسكە اسىرۋدىڭ جوعارى قارقىنىن قولداۋعا ەرەكشە ءمان بەرەمىز.

وركەنيەتتەر ارالۋاندىلىعىن قولداي وتىرىپ, ءبىر-ءبىرىمىزدىڭ مادەني-تاريحي بىرەگەيلىك پەن ءداستۇرلى رۋحاني-ادامگەرشىلىك قۇندىلىقتاردى ساقتاۋعا باعىتتالعان ارەكەتتەرىمىزدى قولدايمىز. ءوز قۇندىلىقتارىمىزدى, مودەلدەرىمىزدى تاڭۋعا جانە يدەولوگيالىق تەكەتىرەسكە جول بەرمەي, مادەني دەربەستىكتى تاباندى تۇردە قورعاۋدى جالعاستىرامىز.

كوپتىلدىلىك ماڭىزدى ارتىقشىلىق سانالادى ءارى تاريحي تۇرعىدا مادەنيەتتەر ءبىرىن ءبىرى بايىتقانىن كورسەتەدى. ول قارىم-قاتىناس جاساۋ, ءبىلىم الۋ, كاسىبي تۇرعىدان كەمەلدەنۋ جانە گۋمانيتارلىق ىقپالداستىق مۇمكىندىكتەرىن كەڭەيتەدى.

ورىس ءتىلى كوپتەگەن ەلدىڭ, سونىڭ ىشىندە قازاقستاننىڭ قوعامدىق, عىلىمي-ءبىلىم بەرۋ جانە مادەني ومىرىندە ماڭىزدى ورىن الادى. سونداي-اق كوممۋنيكاتسياعا پايدالاناتىن ءارى ادەبيەتتىڭ, عىلىم مەن ونەردىڭ باي مۇراسىنا قولجەتىمدىلىكتى قامتاماسىز ەتەتىن ماڭىزدى قۇرال بولىپ قالا بەرەدى.

ورىس ءتىلى جونىندەگى حالىقارالىق ۇيىمنىڭ قۇرىلۋىن قۇپتايمىز. تاراپتار ونىڭ قىزمەتىنە جاردەمدەسەتىن بولادى جانە بارلىق مۇددەلى مەملەكەتتى وسىعان شاقىرادى.

وسى ورايدا قازاقستان ءۇشىن قازاق ءتىلىن مادەني بولمىس-ءبىتىمىن ساقتاۋدا جانە قوعام بىرلىگىن نىعايتۋدا اتقاراتىن ءرولىن ەسكەرە وتىرىپ, مەملەكەتتىك ءتىل رەتىندە دايەكتى تۇردە دامىتۋدىڭ ماڭىزى زور.

رەسەيدىڭ ءبىلىم بەرۋ ۇيىمدارىندا قازاق ءتىلىن وقىتۋ كەڭەيىپ كەلە جاتقانىن قاناعاتتانۋشىلىقپەن اتاپ وتەمىز, بۇل رەسەيدەگى قازاق دياسپوراسى ءۇشىن قوسىمشا قولايلى جاعداي جاسايدى.

ونى وقىپ-ۇيرەنۋ ۇزاقمەرزىمدى پەرسپەكتيۆادا ءوزارا تۇسىنىستىكتى تەرەڭدەتۋگە جانە ەكىجاقتى ىنتىماقتاستىقتى نىعايتۋعا ىقپال ەتەتىنىنە سەنىمدىمىز.

ءبىز زيالى قاۋىم وكىلدەرىنىڭ, پەداگوگتاردىڭ, عالىمداردىڭ, مادەنيەت قايراتكەرلەرىنىڭ جانە حالىقتارىمىزدىڭ تىلدەرى مەن مادەنيەتتەرىن ساقتاۋعا ءارى دامىتۋعا ىقپال ەتىپ جۇرگەن بارشا جاننىڭ ۇلەسىن جوعارى باعالايمىز.

قازىرگى تسيفرلىق داۋىردە ءتىلدىڭ ماڭىزى كەمىمەيدى, كەرىسىنشە ارتا تۇسەدى. تىلدىك ارالۋاندىلىقتى قولداۋ, تىلدىك مۇرانى تسيفرلاندىرۋ, ۇلت تىلىنە قۇرمەتپەن قاراۋ جانە باسقا تىلدەردى ۇيرەنۋ نيەتى ءبىر-بىرىنە قارسى قويىلماي, كەرىسىنشە ءبىرىن ءبىرى ءوزارا تولىقتىرا تۇسۋگە ءتيىس.

كوپتىلدىلىك قوعامنىڭ كەمەلدىگىنىڭ, اشىقتىعىنىڭ نىشانى جانە قازىرگى الەمدە باسەكەلەستىك ارتىقشىلىق سانالاتىنىنا سەنىمدىمىز.

قازاقستان مەن رەسەي حالىقتارىن وتباسىعا, اعا بۋىنعا, ەڭبەككە, جاۋاپكەرشىلىككە, ءوزارا قولداۋعا جانە اتا-بابا اماناتىنا دەگەن قۇرمەت بىرىكتىرەدى. بۇل قۇندىلىقتار عاسىرلار بويى ءبىزدىڭ قوعامدارىمىزدىڭ ادامگەرشىلىك تىرەگى بولىپ كەلدى. وعان ادال بولۋ زامان جەدەل وزگەرىپ جاتقان كەزدە ىشكى ورنىقتىلىقتى, ادامي قادىر-قاسيەتتى جانە ادامگەرشىلىك باعداردى ساقتاۋعا كومەكتەسەدى.

مادەنيەت, ونەر, ءدىني ارالۋاندىلىق, حالىقتىق داستۇرلەر ديالوگ, ءوزارا قۇرمەت جانە رۋحاني كەمەلدەنۋ كەڭىستىگىن قالىپتاستىرادى.

حالىقتارىمىزدىڭ دۇنيەتانىم تۇرعىسىنان ءبىر-بىرىنە جاقىندىعىنىڭ ءمانى – وسىدا.

التىنشى نەگىز – جاستار, ءبىلىم بەرۋ جانە سپورت سالاسىنداعى ىنتىماقتاستىق

قازاقستان-رەسەي قاتىناستارىنىڭ بولاشاعى كوبىنە جاس ۇرپاققا تاۋەلدى. ولاردىڭ الدىندا ساباقتاستىقتى قامتاماسىز ەتۋ, قول جەتكىزىلگەن ۋاعدالاستىقتاردى ورىنداۋ جانە ەكىجاقتى ىقپالداستىقتى جاڭا مازمۇنمەن تولىقتىرۋ مىندەتى تۇر.

اكادەميالىق الماسۋلار, بىرلەسكەن ءبىلىم بەرۋ باعدارلامالارى, ستۋدەنتتىك جانە عىلىمي باستامالار, جوعارى وقۋ ورىندارى فيليالدارىنىڭ قىزمەتى, ەكى ەل اۋماعىندا قازاقستان-رەسەي مەكتەپتەرىن اشۋ, وليمپيادالار وتكىزۋ, سونداي-اق ءبىلىم بەرۋ جانە عىلىمي ورتالىقتار اراسىنداعى تىكەلەي بايلانىستاردى دامىتۋ گۋمانيتارلىق ارىپتەستىكتىڭ بەرىك نەگىزىن قالىپتاستىرادى.

قازاقستاندىق جوعارى وقۋ ورىندارىن تاڭدايتىن رەسەيلىك تالاپكەرلەردىڭ, رەسەيلىك جوعارى وقۋ ورىندارىندا وقىعىسى كەلەتىن قازاقستاندىق تالاپكەرلەردىڭ سانى ۋاقىت وتكەن سايىن ارتىپ كەلە جاتقانىن ەرەكشە اتاپ وتەمىز. بۇل كاسىبي جانە ادامي بايلانىستارعا ىنتالاندىرىپ, الداعى ۋاقىتتا ەكىجاقتى ىنتىماقتاستىقتىڭ ماڭىزدى رەسۋرسىنا اينالادى.

جاستار ءۇشىن مۇمكىندىكتەردى كەڭەيتۋگە, اكادەميالىق ۇتقىرلىقتى قولداۋعا, بىرلەسكەن زەرتتەۋلەر مەن يننوۆاتسيالىق جوبالاردى ىسكە اسىرۋعا باسىمدىق بەرەمىز. ءبىلىم مەن عىلىمعا سالىنعان ينۆەستيتسيالار, بۇل – تەحنولوگيالىق پروگرەسكە جانە مەملەكەتتەرىمىزدىڭ ءال-اۋقاتىنا قوسىلعان ۇلەس.

سالاماتتى ءومىر سالتىن ىلگەرىلەتۋ ماقساتىندا دەنە شىنىقتىرۋ مەن سپورتتى دامىتۋ سالاسىنداعى ءوزارا ءىس-قيمىلدى قۇپتايمىز. ەلدەرىمىزدە ءىرى حالىقارالىق سپورتتىق ءىس-شارالاردى وتكىزۋگە ىقپال ەتەتىن بولامىز.

جەتىنشى نەگىز – بولاشاققا ورتاق كوزقاراس

مەملەكەتتەرىمىزدىڭ الدىندا تەحنولوگيا, ەكولوگيالىق قاۋىپسىزدىك, ەكونوميكالىق ورنىقتىلىق, الەۋمەتتىك ادىلدىك جانە ازاماتتاردىڭ ءومىر ءسۇرۋ ساپاسىن ارتتىرۋ سالالارىن قامتاماسىز ەتۋ سەكىلدى ورتاق مىندەتتەر تۇر. بۇل سىن-قاتەرلەرگە ءتيىمدى جاۋاپ بەرۋ تۇراقتى ديالوگ پەن بىرلەسكەن جۇمىس ارقىلى عانا مۇمكىن بولادى.

ءبىز قازاقستان-رەسەي قاتىناستارىنىڭ بولاشاعىن ەلدەرىمىز تەڭ قۇقىقتى سەرىكتەستەر, ستراتەگيالىق وداقتاستار جانە تاتۋ كورشىلەر رەتىندە ارەكەت ەتەتىن ورنىقتى ءارى ءوزارا ءتيىمدى دامۋ كەڭىستىگى رەتىندە كورەمىز.

وسى ىقپالداستىق اياسىندا نەگىزگى شەشىمدەر ءوزارا قۇرمەت, سەنىم جانە ءبىر-ءبىرىنىڭ مۇددەلەرىن ەسكەرۋ تۇرعىسىنان قابىلدانادى, ال تۋىنداعان كەز كەلگەن كەلىسپەۋشىلىكتەر سىندارلى جانە اشىق ديالوگ رۋحىندا شەشىلەدى.

وسى جەتى نەگىزدى دايەكتى تۇردە بەكەمدەي وتىرىپ, ءبىز سەنىم مەن تۇراقتىلىقتى نىعايتامىز, حالىقتارىمىزدىڭ لايىقتى بولاشاعى ءۇشىن مۇمكىندىكتەردى كەڭەيتەمىز.

قازاقستان مەن رەسەيدىڭ ورتاق تاريحقا ءارى جاسامپازدىققا ۇمتىلۋعا ارقا سۇيەيتىن دوستىعى جانە تاتۋ كورشىلىگى كەلەشەكتە مەملەكەتارالىق قاتىناستارىمىزدىڭ سەنىمدى ىرگەتاسى بولاتىنىنا سەنىمدىمىز.