قازاقستان مەن رەسەي پرەزيدەنتتەرى بىرلەسكەن مالىمدەمە جاسادى

قاسىم-جومارت توقاەۆ رەسەي پرەزيدەنتىنىڭ مەملەكەتتىك ساپارىن ەكى ەلدىڭ ستراتەگيالىق سەرىكتەستىگى مەن وداقتاستىق قاتىناستارىن دامىتۋداعى ماڭىزدى وقيعا رەتىندە قاراستىراتىنىن اتاپ ءوتتى.

«ەڭ الدىمەن, كەزدەسۋىمىزدىڭ قارساڭىندا جاريالانعان مازمۇندى ماقالاسى ءۇشىن رەسەي پرەزيدەنتىنە العىس ايتامىن. بۇل ماتەريالدى حالقىمىز ىقىلاسپەن وقىدى. ويتكەنى ماقالادا تاتۋ كورشىلىك پەن ءوزارا قۇرمەتكە نەگىزدەلگەن ىنتىماقتاستىقتى تابىستى ىلگەرىلەتۋ ءۇشىن ماڭىزى زور ناقتى دەرەكتەر مەن پايىمدار كورىنىس تاپقان. بۇكىل ەۋرازيالىق كەڭىستىكتەگى تۇراقتىلىق پەن وركەندەۋگە ورتاق جاۋاپكەرشىلىك ارقالاۋ – قازاقستان-رەسەي ىقپالداستىعىنىڭ نەگىزگى ءمانى دەگەن پىكىرمەن كەلىسپەسكە بولمايدى. قازاقستان تاراپىنا ايتىلعان جىلى لەبىزدەر مەن ەلىمىزدە جۇرگىزىلىپ جاتقان رەفورمالارعا بەرىلگەن جوعارى باعا ءۇشىن شىنايى ريزاشىلىعىمدى بىلدىرەمىن», دەدى قاسىم-جومارت توقاەۆ.

قازاقستاننىڭ رەسەي ەكونوميكاسىنا سالعان قارجىسى 9 ميلليارد دوللاردان استى

قازاقستان پرەزيدەنتىنىڭ ايتۋىنشا, بۇگىنگى ساپار ەكىجاقتى ىنتىماقتاستىق اياسىنداعى ساپالى وزگەرىستەردى ايقىن كورسەتتى.

«مۇنى مىناداي وبەكتيۆتى كورسەتكىشتەردەن اڭعارامىز: ساۋدا-ساتتىق كولەمى 30 ميلليارد دوللارلىق مەجەگە جەتەدى دەپ بولجانىپ وتىر, ال ەكونوميكامىزعا قۇيعان ينۆەستيتسيا بويىنشا رەسەي باسقا ەلدەر اراسىندا ءبىرىنشى ورىنعا شىقتى. ەكونوميكالىق ىنتىماقتاستىق اياسىنداعى باستامالار تىزىمىنە 177 پەرسپەكتيۆتى جوبا كىردى, ونىڭ 122-ءسى وپەراتسيالىق تسيكلگە ءوتتى, ياعني, ىسكە اسىرىلدى. قازاقستان رەسەيمەن ماڭگى دوستىقتى جانە ستراتەگيالىق سەرىكتەستىكتى جوعارى باعالايدى. ءبىز رەسەيدى ءاردايىم ەۋرازياداعى تاريحى باي ءارى دامۋ الەۋەتى زور مەملەكەت دەپ سانايمىز. قازىردىڭ وزىندە سانكتسيالار سالدارىنان تۋىنداعان قيىندىققا قاراماستان, رەسەي ەكونوميكاسى ساتىپ الۋ قابىلەتىنىڭ پاريتەتى بويىنشا الەمدە – ءتورتىنشى ورىنعا, ال ەۋروپادا ءبىرىنشى ورىنعا شىقتى. مۇنى ءىرى حالىقارالىق قارجى ينستيتۋتتارىنىڭ مالىمەتتەرى راستايدى. بىلتىر رەسەيدىڭ نومينالدى ىشكى جالپى ءونىمى 2,5 تريلليون دوللاردان استى. بۇل – كەرەمەت ناتيجە. رەسەي تابيعي رەسۋرستارى مول, ينجەنەرلىك-عىلىمي ەليتاسى مەن بىلىكتى جۇمىسشىلارى بار ەل رەتىندە جاھاندىق ەكونوميكاداعى جەتەكشى ورنىن ەشقاشان جوعالتپايدى. سايكەسىنشە, دۇنيەجۇزىلىك گەوساياسي ساحنادا ماڭىزدى ءرول اتقارادى. ىنتىماقتاستىق پەرسپەكتيۆاسىنا قاتىستى ءسوز قوزعاعاندا, بۇگىن قابىلدانعان «قازاقستان جانە رەسەي حالىقتارى اراسىنداعى دوستىق پەن تاتۋ كورشىلىكتىڭ جەتى نەگىزى تۋرالى» بىرلەسكەن مالىمدەمەنىڭ ەرەكشە ماڭىزىنا توقتالعىم كەلەدى. اتالعان قۇجات ماقساتتاردى ايقىنداۋ تۇرعىسىنان مۇقيات ويلاستىرىلعان. وندا ەلدەرىمىزدىڭ ستراتەگيالىق سەرىكتەستىگى جانە تاتۋ كورشىلىك قاتىناستارىن ودان ءارى دامىتۋدىڭ سەنىمدى نەگىزى مەن ۇزاقمەرزىمدى باعدارى كورىنىس تاپقان», دەدى مەملەكەت باسشىسى. ەسكە سالايىق, كەشە رەسەي پرەزيدەنتى ۆلاديمير پۋتين قازاقستانعا مەملەكەتتىك ساپارمەن كەلدى. «Egemen Qazaqstan» گازەتىندە ۆلاديمير پۋتيننىڭ «رەسەي – قازاقستان: ەۋرازيا تورىندەگى وداق» اتتى ماقالاسى جاريالاندى.