بۇگىندە الەمدە باسەكەگە قابىلەتتى ەل بولۋدىڭ باستى شارتى – ساپالى ءبىلىم مەن مىقتى ادامي كاپيتال. وسى تۇرعىدان العاندا «سيريۋس – قازاقستان» جوباسى – ەلىمىزدىڭ ءبىلىم بەرۋ سالاسىنداعى ماڭىزدى ءارى بولاشاعى زور باستامالاردىڭ ءبىرى بولماق.
جوبانىڭ تاعى ءبىر ەرەكشەلىگى – زاماناۋي ءبىلىمدى ۇلتتىق قۇندىلىقتارمەن ۇشتاستىرۋىندا. وقۋ باعدارلامالارىنا «دومبىرا», «ۇلتتىق ونەر», «ۇلتتىق سپورت» سياقتى كۋرستاردىڭ ەنگىزىلۋى جاس ۇرپاقتىڭ تەك ءبىلىمدى عانا ەمەس, ۇلتتىق بولمىسى قالىپتاسقان ازامات بولىپ وسۋىنە ىقپال ەتەدى. ال ۇلتتىق بولمىس پەن مادەني قۇندىلىقتاردى ساقتاۋ قازاقستان ءۇشىن ستراتەگيالىق مىندەتتەردىڭ ءبىرى. قازىرگى جاستار جاھاندانۋ داۋىرىندە ءومىر ءسۇرىپ جاتىر, سوندىقتان ولاردىڭ زاماناۋي ءارى ۇلتتىق رۋحى مىقتى ازامات بولىپ قالىپتاسۋى ماڭىزدى.
الماتىدا «سيريۋس» مەكتەبى مەن ءبىلىم بەرۋ ورتالىعىنىڭ ىرگەتاسىن قالاۋ ءراسىمى ءوتتى
سونىمەن قاتار وتاندىق پەداگوگتەردىڭ ۇلەسىنىڭ جوعارى بولۋى ۇلتتىق ءبىلىم بەرۋ جۇيەسىنە دەگەن ۇلكەن سەنىمدى كورسەتەدى. بۇل ءوز كەزەگىندە ەلىمىزدىڭ ينتەللەكتۋالدىق الەۋەتىن كۇشەيتىپ, بولاشاقتا عىلىم مەن تەحنولوگيا سالاسىندا جاڭا بۋىن ماماندارىن قالىپتاستىرۋعا نەگىز بولادى.
«سيريۋس» مەكتەپتەرىندە «ادال ازامات» تاربيە باعدارلاماسى وقىتىلادى
ۇزاق مەرزىمدى پەرسپەكتيۆادا مۇنداي جوبالار قازاقستاننىڭ يننوۆاتسيالىق ەكونوميكاعا كوشۋىنە نەگىز بولادى. قازىرگى الەمدە مەملەكەتتەردىڭ كۇشى تابيعي رەسۋرستارمەن عانا ەمەس, بىلىممەن, عىلىممەن جانە تەحنولوگيامەن ولشەنەدى. وسى تۇرعىدان العاندا, «سيريۋس – قازاقستان» جوباسى ءبىلىم مەن عىلىمدى دامىتۋعا باعىتتالعان ماڭىزدى باستاما. ول زاماناۋي تەحنولوگيالاردى مەڭگەرگەن, سىني ويلايتىن, زەرتتەۋ جۇرگىزە الاتىن ءارى ۇلتتىق قۇندىلىقتاردى قۇرمەتتەيتىن جاڭا بۋىن جاستارىن قالىپتاستىرۋعا مۇمكىندىك بەرەدى.
گۇلجاينا ەلەۋسىنوۆا,
«تالداۋ» ۇلتتىق زەرتتەۋلەر جانە ءبىلىمدى باعالاۋ
ورتالىعىنىڭ باسقارما توراعاسى