قاسىم-جومارت توقاەۆ پەن ۆلاديمير پۋتين كەلىسسوزدەردى رەسمي دەلەگاتسيا مۇشەلەرىنىڭ قاتىسۋىمەن كەڭەيتىلگەن قۇرامدا جالعاستىردى, دەپ حابارلايدى Egemen.kz.
مەملەكەت باسشىسى رەسەي پرەزيدەنتىنىڭ قازاقستانعا جاساعان ساپارى جان-جاقتى ستراتەگيالىق سەرىكتەستىك جانە وداقتاستىق رۋحىنداعى قارىم-قاتىناستاردىڭ ەرەكشە سيپاتىن كورسەتەتىنىن اتاپ ءوتتى.
«قازاقستان ءۇشىن ەڭ اۋەلى رەسەيمەن جاقىن ءارى دوستىق بايلانىستار ايرىقشا ماڭىزدى دەسەك, ارتىق بولمايدى. بىرلەسكەن كۇش-جىگەردىڭ ارقاسىندا ەكىجاقتى ىنتىماقتاستىق بارلىق سالادا سەنىمدى تۇردە دامىپ كەلەدى ءارى ونى مەملەكەتارالىق بايلانىستاردىڭ ناعىز ۇلگىسى دەپ اتاۋعا بولادى. ءبىز شاعىن قۇرامدا ناتيجەلى كەلىسسوز جۇرگىزىپ, سان قىرلى سەرىكتەستىگىمىزدى نىعايتۋعا نيەتتى ەكەنىمىزدى راستادىق. ەلدەرىمىزدىڭ اراسىندا ەشقانداي شەشىلمەگەن ماسەلە جوق. تەك وڭ ديناميكا بايقالادى. وسى قارقىندى ساقتاپ, جاڭا جوبالار مەن باستامالار ارقىلى ىنتىماقتاستىقتى دامىتا بەرەمىز. بۇل ورايدا بۇگىن قابىلداناتىن «قازاقستان جانە رەسەي حالىقتارى اراسىنداعى دوستىق پەن تاتۋ كورشىلىكتىڭ جەتى نەگىزى تۋرالى» بىرلەسكەن مالىمدەمەنىڭ ماڭىزىن ەرەكشە اتاپ وتكىم كەلەدى. اتالعان قۇجات قارىم-قاتىناسىمىزدىڭ سيپاتىن تانىتادى جانە ونى ۇزاقمەرزىمدى نەگىزدە تەرەڭدەتۋگە بەيىل ەكەنىمىزدى كورسەتەدى», دەدى پرەزيدەنت.
مەملەكەت باسشىسىنىڭ ايتۋىنشا, الەمدەگى كۇردەلى احۋالعا قاراماستان, ەكىجاقتى ىقپالداستىق, اسىرەسە, ەكونوميكا سالاسىندا تابىستى ءوربىپ كەلەدى. وڭىرارالىق ىنتىماقتاستىق فورۋمدارىن وتكىزۋ داستۇرگە اينالدى.
«رەسەي قازاقستان ەكونوميكاسىنا قارجى قۇيعان ەلدەردىڭ اراسىنداعى ەڭ ءىرى ينۆەستور سانالادى. قازاقستاننىڭ رەسەي ەكونوميكاسىنا سالعان قارجىسى 9 ميلليارد دوللاردان استى. بۇل – وتە جاقسى كورسەتكىش, ەكى ەل پرەزيدەنتتەرىنىڭ اكىمشىلىكتەرى مەن ۇكىمەتتەرىنىڭ بىرلەسە اتقارعان جۇمىسىنىڭ ناتيجەسى. وسى قارقىندى ارى قاراي جالعاستىرۋعا ۋاعدالاستىق. بۇگىندە ينۆەستيتسيانىڭ جالپى كولەمى 53 ميلليارد دوللار بولاتىن 177 بىرلەسكەن جوبانىڭ پۋلى جاساقتالدى, ونىڭ ىشىندە 122-ءسى ىسكە اسىرىلدى, ياعني, وپەراتسيالىق كەزەڭگە ءوتتى,» دەدى قاسىم-جومارت توقاەۆ.
تاۋەلسىزدىك سارايىندا ۆلاديمير ءپۋتيندى سالتاناتتى قارسى الۋ ءراسىمى ءوتتى
سونداي-اق پرەزيدەنتتىڭ مادەني-گۋمانيتارلىق سالاداعى ىنتىماقتاستىققا ايرىقشا نازار اۋدارىپ, قازاقستان مەن رەسەيدىڭ كوپجاقتى الاڭدار اياسىنداعى ىقپالداستىعىنا ءمان بەردى.
«جۋىردا استانادا قالا تۇرعىندارى مەن قوناقتارى ەرەكشە ىقىلاسپەن قابىلداعان قازاقستانداعى رەسەي كۇندەرى ءوتتى. ماڭىزدى ۋاقيعالار قاتارىندا بىلتىر ەلوردادا «قازاقستان مەن رەسەي ماڭگى دوستىعى اللەياسى» جانە ماسكەۋدە قازاقستان مەن رەسەي دوستىعى سكۆەرىنىڭ اشىلۋىن ايتۋعا بولادى. استانادا وتەتىن ءۇشىنشى «بولاشاق ويىندارى» گۋمانيتارلىق بايلانىستاردىڭ, ەڭ الدىمەن, ەلدەرىمىزدىڭ جاستارى اراسىنداعى ىنتىماقتاستىقتىڭ بەكي تۇسۋىنە ىقپال ەتەدى. قازاقستانداعى «سيريۋس» جوباسىن ەرەكشە اتاپ وتكىم كەلەدى. مۇنى قولدايمىن, بولاشاق مامانداردى دايارلاۋ ءۇشىن پايداسى زور دەپ سانايمىن.
ەكى ەل «ورتالىق ازيا – رەسەي» فورماتىندا جەمىستى جۇمىس اتقارىپ جاتقانىنا ايرىقشا توقتالعىم كەلەدى. اتالعان فورماتتى بۇكىل الەم ورتالىق ازياعا نازارىن تىگىپ وتىرعان ۋاقىتتا كۇشەيتە ءتۇسۋىمىز قاجەت دەپ ويلايمىن. ساپار قارساڭىندا جاريالانعان ماقالاڭىز ءۇشىن سىزگە ريزاشىلىعىمدى بىلدىرەمىن. وتە قىزىقتى ءارى مازمۇندى ماقالا ءبىزدىڭ قوعام تاراپىنان وڭ باعاعا يە بولدى. ءبىز ەلدەرىمىز اراسىنداعى ستراتەگيالىق سەرىكتەستىك پەن وداقتاستىق قاتىناستاردى نىعايتۋ باعىتىندا ءارى قاراي جۇمىس اتقارا بەرەمىز», دەدى پرەزيدەنت.
ۆلاديمير پۋتين تەڭ قۇقىلى جانە ءوزارا قۇرمەتكە نەگىزدەلگەن رەسەي مەن قازاقستاننىڭ قارىم-قاتىناسى قارقىندى دامىپ كەلە جاتقانىن جەتكىزدى.
«بىلتىر ماسكەۋگە مەملەكەتتىك ساپارىڭىز بارىسىندا جاساعان بىرلەسكەن مالىمدەمەدە بايلانىستارىمىز جان-جاقتى ستراتەگيالىق سەرىكتەستىك جانە وداقتاستىق دەڭگەيىنە كوتەرىلگەنىن اتاپ وتتىك. بۇل شىن مانىندە سولاي. ءبىز بارلىق باعىتتا جۇمىس جۇرگىزىپ جاتىرمىز. رەسەي جانە قازاقستان حالىقتارى اراسىنداعى دوستىق پەن تاتۋ كورشىلىكتىڭ جەتى نەگىزى جايىندا ماڭىزدى بىرلەسكەن مالىمدەمە قابىلدايمىز. سونىمەن قاتار كوپتەگەن ۇكىمەتارالىق, ۆەدومستۆوارالىق جانە كوممەرتسيالىق كەلىسىمدەر دايىندالدى. بۇل قۇجاتتار ەكونوميكا مەن ەنەرگەتيكادان باستاپ, مادەني-گۋمانيتارلىق قاتىناستارعا دەيىنگى ىنتىماقتاستىقتىڭ بارلىق سالاسىن قامتيدى. مۇنىڭ ءبارى ءوزارا ىقپالداستىعىمىزدىڭ ىرگەسىن نىعايتۋعا سەپتىگىن تيگىزەتىنىنە سەنىمدىمىن. 70 ينۆەستيتسيالىق جوبا جۇزەگە اسىرىلىپ جاتىر. بۇل – اۋقىمدى جۇمىستىڭ باستاۋى عانا. ءوزارا ىنتىماقتاستىعىمىزدىڭ جاقسى ناتيجەگە قول جەتكىزەتىن پەرسپەكتيۆتى باعىتتارى بايقالادى», دەدى رەسەي پرەزيدەنتى.
قاسىم-جومارت توقاەۆ پەن ۆلاديمير پۋتين شاعىن قۇرامدا كەلىسسوز جۇرگىزدى
بۇدان بولەك, كەزدەسۋدە ءوزارا ءتيىمدى ىنتىماقتاستىقتى كەڭەيتۋ جانە ءوندىرىس, ەنەرگەتيكا, كولىك-لوگيستيكا, اگروونەركاسىپ كەشەنى, تسيفرلاندىرۋ سالالارىنداعى بىرلەسكەن جوبالاردى جۇزەگە اسىرۋ پەرسپەكتيۆاسى تالقىلاندى.