10 كۇن ىشىندە ەل تۇرعىندارى زەينەتاقى جيناقتارىنداعى قاراجاتىن قولدانىستاعى ەرەجەمەن پايدالانا الادى. سەبەبى ەلىمىزدە 5 ماۋسىمنان باستاپ زەينەتاقى شوتتارىنداعى جەتكىلىكتىلىك شەكتەرىن ەسەپتەۋدىڭ جاڭا ادىستەمەسى كۇشىنە ەنەدى, دەپ حابارلايدى Egemen.kz.
جاڭا ەرەجەگە سايكەس, زەينەتاقى شوتىندا قالۋى ءتيىس ەڭ تومەنگى سوما ايتارلىقتاي ارتۋى مۇمكىن. بۇل ءوز كەزەگىندە ازاماتتاردىڭ زەينەتاقى جيناقتارىن الۋ مۇمكىندىگىن شەكتەيدى.
بىرىڭعاي جيناقتاۋشى زەينەتاقى قورى (بجزق) جاڭا شەكتەردى ادىستەمە كۇشىنە ەنگەننەن كەيىن ءۇش جۇمىس كۇنى ىشىندە جاريالاۋى ءتيىس. بولجام بويىنشا, جەتكىلىكتىلىك شەگى 5-7 ماۋسىم ارالىعىندا بەلگىلى بولادى.
جەتكىلىكتىلىك شەگى قالاي ەسەپتەلەدى؟
بۇرىنعى ەسەپتەۋ جۇيەسى ازاماتتىڭ بولاشاق جارنالارىن ەسكەرۋگە نەگىزدەلسە, جاڭا ءتاسىل زەينەتكە شىققاننان كەيىن ءومىر بويى تولەنەتىن تولەمدەردى قامتاماسىز ەتۋگە قاجەتتى سومانى ەسەپتەۋگە باعىتتالعان.
ەسەپتەۋ كەزىندە ينۆەستيتسيالىق تابىستىلىق, جىل سايىنعى يندەكساتسيا, ازاماتتىڭ جاسى, ءومىر ءسۇرۋ ۇزاقتىعى جانە زەينەتاقى الۋ مەرزىمى سياقتى فاكتورلار ەسكەرىلەدى. مامانداردىڭ ايتۋىنشا, بۇل وزگەرىس اسىرەسە جاستار ءۇشىن قولجەتىمدى قاراجات كولەمىن ازايتۋى مۇمكىن.
زەينەتاقى قاراجاتىن قالاي تەكسەرۋگە بولادى؟
ازاماتتار ءوز زەينەتاقى جيناقتارىن eGov Mobile قوسىمشاسى, بجزق جەكە كابينەتى نەمەسە eGov پورتالى ارقىلى تەكسەرە الادى.
زەينەتاقى قاراجاتىن پايدالانۋ ءۇشىن ارنايى شوت اشۋ قاجەت. ءوتىنىم enpf-otbasy.kz پلاتفورماسى ارقىلى بەرىلەدى. قاراجات تۇرعىن ءۇي ساتىپ الۋ, يپوتەكانى وتەۋ, العاشقى جارنا, ەمدەلۋ نەمەسە تۇرعىن ءۇي دەپوزيتىن تولىقتىرۋ ماقساتىندا قولدانىلۋى مۇمكىن.
«كونۆەرتتەگى جالاقى» زەينەتاقى مەن جاردەماقىعا قالاي اسەر ەتەدى؟
سونىمەن قاتار, زەينەتاقى جيناقتارىنىڭ ءبىر بولىگىن جاقىن تۋىستارعا بەرۋ مۇمكىندىگى قاراستىرىلعان. ياعني ازاماتتار اتا-اناسى مەن بالالارىنا, جۇبايى مەن باۋىرلارىنا نەمەسە اتا-اجەسى مەن نەمەرەلەرىنە زەينەتاقى قاراجاتىن اۋدارا الادى.