قازاقستاندا ءموبيلدى اۋدارىمدارعا قاتىستى تەكسەرۋ اياسىندا حابارلاما العان ازاماتتار 30 جۇمىس كۇنى ىشىندە تۇسىنىكتەمە بەرۋگە نەمەسە دەكلاراتسيا تاپسىرۋعا مۇمكىندىك الادى. بۇل تۋرالى قارجى ۆيتسە-ءمينيسترى ەرجان ءبىرجانوۆ مالىمدەدى, دەپ حابارلايدى Egemen.kz.
ۆيتسە-ءمينيستردىڭ ايتۋىنشا, سالىق ورگاندارى ءتيىستى حابارلامالاردى جىبەرۋدى باستاپ كەتكەن.
«جۇمىس ءجۇرىپ جاتىر, ءبىز بارلىق سانات بويىنشا حابارلامالار جىبەرىپ وتىرمىز. حابارلاما العان ازاماتتاردا 30 جۇمىس كۇنى مەرزىم بار. ناتيجەنى سالىق تولەۋشىلەردىڭ كەرى بايلانىسىنان كورەمىز», دەدى ول.
ۆيتسە-مينيستر وسى ۋاقىت ارالىعىندا تۇسىنىكتەمە نەمەسە دەكلاراتسيا تاپسىرۋعا مۇمكىندىك بەرىلەتىندىگىن, ازىرگە ايىپپۇل نەمەسە شەكتەۋ شارالارى قاراستىرىلماعانىن ايتتى.
سالىق كودەكسىندەگى وزگەرىس: كونستيتۋتسيالىق سوتقا جۇگىنۋ كەزىندە تولەنەتىن باج سالىعى جويىلۋى مۇمكىن.
ەسكە سالا كەتەيىك, بۇعان دەيىن سالىق ورگاندارى كاسىپكەرلىك قىزمەتتەن تۇسكەن, بىراق تىركەلمەگەن كىرىستەردى انىقتاۋ ءۇشىن تەكسەرۋ جۇرگىزىپ جاتقانى حابارلانعان بولاتىن.
مامانداردىڭ مالىمەتىنشە, باقىلاۋ كەزىندە 3 اي ىشىندە 100 ادامنان كوپ اۋدارىم الۋ جانە اۋدارىم سوماسىنىڭ 1 020 000 تەڭگەدەن اسۋى ەسكەرىلەدى.
ەسكە سالا كەتەيىك, بۇعان دەيىن ءماجىلىس دەپۋتاتى ازات پەرۋاشەۆ سالىق رەجيمى بويىنشا ەل اۋماعىندا بىرىڭعاي مولشەرلەمە ەنگىزۋدى ۇسىنعان ەدى.